Bate ma naga
12:1-6
1 Ne kswalan faniak silayar sa na langit.
Yakw kswalan batar sa nal lere neluk ni rabit la nteri tenany ma namdir bulan das.
Ma na ulun e rnau makota ma rose rof ftune buti resin du.
2 Ma bate ne nakeban sou i,
ma nose ma namtoranbab mpa nafwayak fali nkoman ma kampuny maninik.
3 Mpene kswalan faniak sa nbal na langit.
Ne naga memeye silayar sa nbotin.
Naga ne ulnir itw ma soruny buti.
Ma na ulnir mpane e makotar ramin.
4 Ma nal ikwran la nraus ftunar sepertiga na langit ma nyebas far saryamprene.
Bate ne nose ma namtoranbab.
Ma naga ne namdir bate ne souny nema noak ma namtoranbab e,
naga ne ntelan anaky.
5 Ne bate ne namtoranbab e Kanak merwane.
Ma naga ne nose ma ntelan kanak a ne nempa metryat e malaekat sa nasnyalik ma nrabut kanak ne ma nor i ber Ratu na Ni kadere ne.
Kanak a ne ma keta nfarete nusar monuk nor Ni fakoran.
Ma iane farlan ma nomat tetekan fnutan la nfarete tomwatar.
6 Mpe bate ne nafla far ain letkape.
Na iano i namin anir sa ma Ratu nau ber i a ne lo nema Ratu npiare i terik lere ribun raty du a buty nem.
Malaekat Mikael nafufu Naga
12:7-9
7 Ne prang silai na surga.
Malaekat sa ngarany Mikael.
Mikhael ye malaektar nir ulun.
I ye ma nor ni malaektar raale sir ror naga.
Naga ne ni malaektar rtulung i a nbal ma raprang ror Mikael.
8 Nempa Mikael nafufu naga ne.
Ma i natian naga nof surga ma malaektar monuk ma rlarat naga ne nbal.
9 Ne ryebas naga silai ne nor ni malaektar far saryamprene.
Naga ne ma rtar feti kasy makene.
Ma rtar a nbal feti Smwangat Yatkar Nir Ulun nre Setan.
I ye ma nfule tomwatar monuk na saryamprene.
Rbeu la rdangin Ratu
12:10-12
10 Ne kdwengar liliri silai nof surga ma nfalak,
“Lere ye ni tewat ma Ratu ninr Mangnrure nfair Ni tomwatar,
ma nfatutu Ni kuase,
ma nfarete neluk Ray.
Lere ye ni tewat ma Ray Silai ma Ratu nyoding a ne ma nfatutu Ni kuase.
Fali ryebas smwangat yatkar nir ulun far saryamprene lo.
Smwangat yatkar nir ulun ye ma dedesar ma nfasale waninrar ma ralele Ratu na ninr Ratu sounlury.
11 Waninrar ma ralele Ratu ne rafufu smwangat yatkar nir ulun lo.
Sir ral Domba Anak darany la rafufu smwangat yatkar nir ulun.
Sir bise ma rafufu i a nbal fali sir dedesar ma rafwibar feti Ray Silai ye nir Mangnrure.
Boloka tomwatar rose ma rfen sir,
nempa to rsue sir ma dedesar ma rfalak ibar na Ray Silai.
12 Mpa,
kmi monuk ma mimin surga ne,
ka msyenang resi!
Nempa ber kmi monuk ma myorip a na saryamprene ma safe-safe monuk ma ramin tasik ne keta suse desar ber a kmi.
Fali smwangat yatkar nir ulun nma ma nakmat a kmi nor ni resar ma nlie nlengan.
Ma i nafai feti let ber i ma nafyatak tomwatar a ne to dodo e omp lo.”
Naga nafuri bate ma namtoranbabe kanak merwane ne
12:13-18
13 Noak a ne naga nafai feti ryebas i far saryamprene.
Iane nwayat ma nafuri bate ma namtoranbabe kanak merwane ne.
14 Nempa Ratu nal slyapnir du ber bate ne farlan langam slyapnir.
Mpa nal slyapnir du a ne ma nturim dodo far ain letkape.
Ma ain a ne ma Ratu nau ber i ma namin.
Na iano Ratu npiare i terik ngarkar teli lian,
mpa naga ne to bise ma nose sasaf i.
15 Ne naga ne nasmpuring weye nof babany.
Weye ma nbie ne silai farlan kewas ma nlale far bate ne nema keta nakjaip kalin i.
16 Nempa saryamprene ntulung bate ne.
Mpa ompak namngang ma ntelan weye ma nbie nof naga babany a ne.
17 Mpe naga ne dalam maninik desar bate ne,
mpa nti nserang bate ne ni dasdalam walyetar.
Sir a ne ma rose rlarat Ratu Ni faretar,
ma ryoding feti Yesus ne nir Mangnrure.
18 Ne naga ne nti laran ma namdira iano.