Binatang mangaresar sa nbie nof tasik dalam
13:1-10
1 Mpene kswalan binatang sa nbie nof tasik dalam.
Binatang a ne soruny buti ma ulnir itw.
Ma na sornir mpane e makotar ramin.
Ma na ulnir e rarengi ngribatin yatkar ma rarikan Ratu.
2 Binatang ma kswalan a ne farlan rate silayar sa.
Ma emnir e farlan beruang emnir,
ma sukany e farlan singa sukany.
Mpe naga ne nal ni fakoran ma ni kuase ber binatang a ne ma namtoran naga ni kadere ma nfarete.
3 Ne kswalan binatang a ne ulnir sa nof ulnir itw a ne.
Na uluny a ne sinri silai namin.
Luryain e ni mngale ne nose ma ketla i nmat nempa lere ye mngale ne nfin lo.
Ma tomwatar monuk na saryamprene rampriang ma rsalan binatang a ne mpa rlarat i.
4 Ma tomwatar a ne rsatngur ber naga ne fali i nal kuase ber binatang a ne.
Ma rsatngur ber binatang a ne nbal ma rfalak,
“To fen lese nbal ma namkoran a nlengan binatang a ne!
Ma to fen lese ma bise ma nafufu i a nbal!”
5 Ratu ninrang ma binatang a ne natanuk la nafdas i ma narikan Ratu.
Ma Ratu ninrang a nbal ma nfarete tomwatar doan bulan buty fat resin du.
6 Ne i ntabw ma narikan Ratu,
narikan Ratu ngarany,
narikan ain ma namin,
ma narikan tomwatar monuk ma ramin surga nbal.
7 Ratu ninrang i a nbal ma naprang nor Ratu Ni tomwat lelerpar ma nafufu sir.
Ma nal kuase ber i a nbal ma nfarete tomwatar monuk na saryamprene,
ma rof nusar mpane,
das matnir mpane,
ma liliryar mpane.
8 Ma tomwatar monuk na saryamprene keta rsatngur ber binatang a ne.
Ma lan tomwatar ma to rsatngur ber i a ne ma rarengi ngarnir a na kitap momorip.
Sir ngarnir a ne ma rarengi na kitap momorip noak ma saryamprene to namin a fuky.
Kitap momorip a ne Domba Anak ma rfen i a ne Ni kitap.
9 Mpa ka mdyengar fen ngamone ibar ye.
10 Ibar a ne nfalak farye,
“Ratu ntetak feti tomwatar ketnir keta rnau sir a na sel,
ma ketnir a nbal e keta rfen sir ror smade.
Ma safe ma ntetak a ne keta diat desar,
mpa ketnir rof sir a ne keta ramin sel,
ma ketnir a nbal e keta rmat ror smade.
Iane nwayat ma Ratu Ni tomwatar ka rsabar ma rabare suse ma diat sir a ne,
ma ka dedesar ma ralele Ratu.”
Binatang kedua nbie nof ompak dalam
13:11-18
11 Ne kswalan binatang sa nbal ma nbie nof ompak dalam.
Binatang a ne sornir du farlan domba anak sornir.
Ma liriny silai farlan naga liriny.
12 Binatang pertama ne nsiduk binatang kedua ma nal ni kuase monuk ber i ma nfarete.
Ma nribut tomwatar monuk na saryamprene ma rsatngur ber binatang pertama ma ni sinri nfin a ne lo.
13 Binatang kedua ne nose [fanikar ma nlie nlengan desar] kabain mpasalnar ma silai desar.
I ntolar au nof langit far saryamprene na tomwatar sonirlury.
14 Kuase ma binatang pertama nal ber i a ne nwayat ma bise ma nose kabain mpasalnar a ne.
I nfule tomwatar monuk na saryamprene nor kabain mpasalnar ma i nose ne.
Ma i nluan ma tomwatar rose walut rlarat binatang pertama ne felany.
I nluan ma rose farane la ralang binatang pertama ne.
Binatang a ne ma luryain e rafngal i ror smade ma rfen i nempa to nmat.
15 Binatang kedua ne ni kuase nbal ma nal sanawe ber walut ma felany farlan binatang pertama ne.
Iane nwayat ma bise ma natanuk mpa nluan ma rfen tomwatar monuk ma to rsatngur ber i a ne.
16 Binatang kedua nluan ma tomwatar monuk ka rfaniak limnir fian ma dednir.
Mpa tomwatar monuk ka rfaniak sir.
Sir a ne tomwat silayar nre tomwat biasar,
mangoskayar nre tomwatar ma rawatan,
karwar nre tomwat biasar.
17 Farlan tomwatar ma faniak to namin limnir fian ma dednir keta sir to rabel nre rafenry kabanir.
Faniak a ne nfatutu binatang pertama ne ngarany nre angkayar ma rfatutu ngarany.
18 Lan tomwate ma ni anfai silai ma keta nafai angkayar ne isiny.
Mpa ka tak Ratu ma nal anfai silai nema bise ma tkaul tal binatang a ne ni angkayar.
Fali angkayar a ne rfatutu tomwatar sa ngarany.
Angkayar a ne raty nem buty nem resin nem.