Domba Anak ma Ni tomwatar ma nfair sir a ne
14:1-5
1 Mpene kswalan kabanir sa nbal:
iane kswalan Domba Anak ma namdir lenran Sion nor tomwate ribun rati buty fat resin fat.
Na tomwatar a ne dednir mpane e rarengi Domba Anaky a ne ngarany ma Amany ngarany a nbal.
2 Ne kdwengar tomwatar sa ma natanuk nof surga.
I liriny a ne farlan kjaip silai esan nre tarpake silai delak.
Liriny ma kdwengar a ne farlan tomwatar ma rampuat kecapi.
3 Mpe kdwengar tomwatar ribun rati buty fat resin fat a ne rbeu bew beberi sa.
Sir ramdir a na mangfaretar buty du resin fat ma kabanir fat ma rmorip farlan binatngar a ne sonirlury.
Ma sir monuk ye ma ramdir a rkolu rai ni kadere.
To tomwate fen lese ma nafai beu ne lan tomwate ribun rati buty fat resin fat a ne.
Sir a ne ma Domba Anaky nfair sir nof tomwatar monuk na saryamprene.
4 Sir a ne to nir sal ma rmorip e ranglerap farlan batdare sa ma to nafsau fuky.
Sir to rafngeryai tenir farlan merwanar ma rkoil batar.
Sir dedesar ma rlarat Domba Anak a ne far mpenempen.
Sir a ne ma Yesus ntebus sir ma reluk Ratu Ni tomwatar.
Sir ye farlan tomwatar nir snyomp luryanir desar ma rloik ber Ratu ma Domba Anak.
5 Sir to lain sa ma rlepusuk ma to lain sa ma rose sale.
Malaektar tel rafbotin snyurat nof Ratu na lere ma nukun saryamprene
14:6-13
6 Ne kswalan malaektar sa ma nturim a na langit.
Malaekat a ne nose ma nafwibar Ibar Ngamone ma namin dedesar ber tomwatar monuk na saryamprene.
Sir a ne rof nusar mpane,
liliryar mpane ma das matnir mpane.
7 Malaekat a ne natanuk nor liriny silai,
“Ka myose alang ber Ratu ma ka mdyangin I.
Fali ni tewat lo ma Ratu neluk mangtetak ma ntetak tomwatar nir ngriar na saryamprene.
Ma ka msyatngur ber I.
I ye ma nose langit,
saryamprene,
tasik,
ma weye matnir monuk.”
8 Mpene malaekat kedua nma.
Malaekat ne nlarat malaekat pertama ne ma nfalak,
“Kote silai Babel ne nayatak lo,
kote ne namsos lo!
Fali tomwatar ma ramin kote ne rwayat ma tomwatar na nusar monuk ma rose kabain yatkar.
Iane farlan bate ma nafnabuk merwanar nor tuak ma rlarat ni makeus,
nema ranronr ror sir.”
9 Ne malaekat ketiga nma nbal ma nlarat malaektar du a ne.
I natanuk nor liriny silai ma nfalak,
“Ise ma nsatngur ber binatang ma nsatngur ber walut ma rose rlarat binatang a ne felany,
ma ise ma nfaniak dediny nre limany fian nor binatang a ne ni faniak,
10 keta Ratu nfatutu Ni resar desar ber tomwate ne,
ma nukun nafyatak i desar.
Iane feleles farlan ma nenum anggur nof Ratu Ni kompi ma to ralompe ror sasaf.
Tomwate ne ma keta nkoman suse maberat desar nor au ma belerang.
I keta nkoman suse ma farane na malaekat lelerpar ma Domba Anak sonirlury.
11 Ma au la rsiksa sir a ne keta nfolur dedesar.
Iane nwayat ma lere nronram e rkoman suse ne dedesar.
Sir a ne ma rsatngur ber binatang ma ni walut a ne,
ma rfaniak sir ror binatang ne ni faniak.”
12 Mpa Ratu Ni tomwatar a kmi,
ka mlyarat Ratu Ni faretar ma mimkoran ma milele Yesus.
Ma ka msyabar ma mibare susar ma mkyoman a ne.
13 Ne kdwengar liliri nof surga ma nfalak,
“Ka murengi farye:
Ntabw nof lere ye tomwatar ma rlarat dedesar Yesus terik ma rmat a ne,
ngamone desar ber sir.
Ma Ratu Smwangtany nfalak feti safe ma kfwalak ye botuan.
Iane feti keta sir rsenang ma to rkoman suse lo,
ma keta ronri sewe fali adat ngamonar ma sir rose ne.”
Ratu nal let isnir iane feti nukun tomwatar na saryamprene
14:14-20
14 Mpene kswalan mutan mafuty sa.
Na mutan das a ne tomwatar sa namtoran.
Tomwate ne felany farlan Yesus Tomwate Anaky.
I natulu makot mase ma nomat sabit ma nane.
15 Ne malaekat sa nbie nof Ratu Ni Das Silai dalam na surga.
I nfalak nor liriny silai ber tomwate ma namtoran mutan das a ne farye:
“Mwal nim sabit a ne ma mtwi mwal nim let isnir.
Fali ni tewat lo ma mwal let isnir a na saryamprene.”
16 Ne Tomwate ma namtoran mutan das a ne nal ni sabit ma nal let isnir na saryamprene.
17 Ne malaekat sa nbal nbie nof Ratu Ni Das Silai na surga.
I nomat a nbal sabit sa ma nane.
18 Ne malaekat sa nbal nma nof snyompe ain na surga.
Malaekat ne biase ma najake au na snyompe ain.
I nfalak nor liriny silai ber malaekat ma nomat sabit ma nane ne,
“Mwal nim sabit a ne la mkwait anggur bunir na saryamprene fali bunir rwabar lo.”
19 Mpe malaekat ne nal ni sabit ma nkait anggur bunir na saryamprene betno nyebas far ain silayar sa ma biase rferas anggur a na.
Anggur ain silai ne iane nfatutu Ratu Ni resar desar ber tomwatar ma rose kabain yatkar.
20 Ain ma rferas anggur a na ne namin kote burit.
Mpa ronr anggur bunir a ne far ain a ne ma rferas.
Ma nof ain ma rferas anggur bunir a na ne,
nlale dare farlan kewas ma nlale ma laswan kilo raty tel ma lamany fafa metrar du.