Malaektar itw ronr suse maberat desar ber tomwatar
15:1-8
1 Mpene kswalan fanikar sa na langit ma nlie nlengan ma to lain sa ma tomwatar rsalan a fuky.
Iane feti malaektar itw ma ronr susar itw ma maberat desar.
Farlan susar itw ma maberat desar a ne omp lo,
iane nfatutu feti Ratu Ni resar omp lo.
2 Ne kswalan kabar sa ma farlan tasik ma idak far kristal ma ralompe ror au.
Ma kswalan a nbal tomwatar yadin ma ramdir rlosir tasik ma idak far kristal a ne.
Sir a ne ma rafufu binatang a ne fali sir to rmpeang ma rsatngur ber i.
Sir a nbal to rmpeang ma rsatngur ber binatang a ne ni walut ma to rmpeang ma rfaniak dednir ror binatang a ne ni angkayar ma ngarnir.
Sir ramdir ma romat kecapi ma Ratu nal ber sir a ne.
3 Ma sir rbeu beu ma luryain e Ratu nal ber Ni mangkaryae Musa ma nbeu.
Beu ne Domba Anak a nbeu nbal.
Beu ne farye,
“O Ratu Mangnrur Silai Ko ma Nim kuase ma nlie nlengan.
Nim karyayar a ne nlie nlengan ma nose ma tomwatar rampriang.
O Ratu,
Ko ye Rai ber nusar monuk na saryamprene.
Ko mumlonry ma mose lan kabain botunar.”
4 Keta tomwatar monuk rose alang ber Ratu Mangnrur Silai Ko,
ma keta rafbwerat Ko ngaram
fali lan Ko ye ma munglerap.
Ma keta nusar monuk rma ma rsatngur ber Ko
fali tomwatar monuk rsalan lo feti Ko mtwetak ngriar mor malonri.
5 Mpene kswalan Ratu Ni Das Silai na surga ntakbanril.
Ma na Das a ne Ratu Ni befak namin ma rnau Ni faretar a na.
6 Ne malaektar itw a ne rbie rof Ratu Ni Das Silai ne.
Sir mpane ronr susar itw ma maberat desar a ne ber tomwatar.
Malaektar a ne rfonak rabit mafutyar ma ramamas ma raskyau maloly mase ma rteri mpumprir.
7 Ne kabanir sa nof kabanir fat ma rmorip farlan binatngar a ne,
nonry kompi mase ber malaektar itw a ne.
Kompi mase ne nfen ber Ratu ni resar.
I a ne Ratu ma nmorip terik ma dedesar.
8 Ne metryat e Ratu Ni Das Silai ne nfen ber masu fali Ni dadangin ma nlie nlengan ma Ni kuase.
Ma to tomwate fen lese ma nti Ratu Ni Das Silai dalam terik ma susar ma maberat ma malaektar itw a ronr a ne omp.