Susar itw ma maberat desar nof Ratu
16:1-21
1 Mpene kdwengar lirin silayar sa nof Ratu Ni Das silai ma nfalak ber malaektar itw a ne.
Lirin a ne nfalak farye,
“Mtyi ma mbyui kompi masar itw ma nfen ber Ratu Ni resar a ne na saryamprene!”
2 Ne malaekat pertama nti ma nbui ni kompi far saryamprene.
Mpe metryat e babare diat tomwatar na saryamprene.
Sir a ne ma rfaniak sir ror binatang a ne ni faniak,
ma rsatngur ber binatang a ne ni walut.
3 Ne malaekat kedua nti nbui ni kompi ne far tasik.
Mpe tasik ne namemeye far mangmwatar darnir mpa kabanir ma rmorip a na tasik a ne rmat rafere.
4 Ne malaekat ketiga nti nbui ni kompi far keswar ma wey matnir.
Iane nwayat ma weyar monuk reluk dare.
5 Mpene kdwengar malaekat ma nkuase weyar monuk ma nfalak,
“Ko ye Ratu ma munglerap ma Ko ye ma mumin mof luryain lo terik lere ye.
Ko ye ma mtwetak ngriar mor malonri.
6 Fali tomwatar na saryamprene ma rfen Nim tomwatar ma Nim nabyar.
Mpa farlan lere ye Ko mose ma renum dare,
iane diat desar!”
7 Ne kdwengar liliri nbal nof snyompe ain ma nfalak,
“O Ratu Mangnrur Silai Ko ma Ni kuase ma nlie nlengan.
Safe-safe monuk ma Ko mtwetak la mukun tomwatar,
Ko mose mor malonri ma to musalan sou.”
8 Ne malaekat keempat nbui ni kompi ne far lere.
Mpe lere ne mefanas desar nwayat ma tomwatar bise ma rampu.
9 Ne lere ni mefanas nwayat ma tomwatar rampu mpa rsompe Ratu ma rtar ngarany,
fali Ratu Ni kuase ma nwayat ma sir rkoman suse maberat a ne.
Boloka sir rkoman suse maberat nempa to rtate nir salar ma to rdangin Ratu.
10 Ne malaekat kelima nbui ni kompi na binatang ma nfarete ne ni kadere.
Mpe ni ain farete ne makrokap.
Ma ni tomwatar rkarat kernir fali rkoman suse maberat desar.
11 Ne rsompe Ratu na surga nbal fali nir babare ma nir maningkyar ma rkoman a ne.
Boloka farane sir to rtate nir salar a ne.
12 Ne malaekat keenam nti nbui ni kompi na kewas silayar sa ngarany Efrat.
Ne kewas a ne nangret ma neluk dalamtene nwayat ma rayar rof timur bise ma rmpan ralyole far barat.
13 Ne kswalan smwangat yatkar tel.
Sa nbie nof naga babany,
sa nbie nof binatang babany,
ma sa nbal e nbie nof nabi wawayat babany.
Smwangat yatkar tel a ne rose felnir farlan latngare.
14 Smwangat yatkar tel a ne iane smwangat yatkar ma nir kuase ma rose kabain mpasalnar.
Sir rti ma rakmat rayar na saryamprene ni kateman.
Sir rti ma rafburat rayar a ne na anir sa ma keta rose ma rti rlarat prang silayar sa.
Sir rose farane na lere ma Ratu ma Ni kuase ma nlie nlengan a ne ma ntetak lo ma nafufu muswar.
15 Ne Yesus ninr Mangnrur Silai ne nfalak,
“Mdyengar fen ngamone!
Keta kmwa e farlan mangamnange fali to tomwate fen lese ma nafai.
Mpa ngamone ber tomwate ma ndaf Yakw ma najak dedesar.
Tomwate ma ndaf Yakw ma najak dedesar a ne,
keta najake ni rabit ma nangafel nema noak ma kmwa e i to namlus ma to nmeat.”
16 Mpene smwangat yatkar a ne rafburat rayar na anir sa ma Ibrani liriny rfalak feti Harmagedon.
17 Ma malaekat ketujuh nti nbui ni kompi na langit ma saryamprene twalelean.
Ne kdwengar tomwatar sa liriny nof Rai Ni kadere na Ratu Ni Das silai na surga.
Ne tomwate ne nfalak nor liriny silai,
“Safe-safe monuk a ne kufdiat lo!”
18 Mpe metryat e fitik na mpenempen ma tarpake delak nauran ma ruku silai.
Ntabw nof luryain ma tomwatar ramin saryamprene to lain sa ma ruku silai farane fuky.
Iane ruku silai ma nlie nlengan desar.
19 Ruku silai ne nwayat ma kote silai ma rtar feti Babel nangfat a nmpan tel.
Ma kote walyetar na saryamprene ramsos a nbal,
fali kabain yatkar ma sir rose ne.
Mpe Ratu nafdiat safe ma ntetak lo ma nukun tomwatar na kote silai Babel a ne.
I nfatutu feti I narese desar sir.
Ratu Ni resar a ne,
iane farlan anggur na Ni kompi mangfeni sa ma ka tomwatar a ne renum terik ma omp.
20 Ruku silai ne nwayat ma yamprenar monuk ratloram ma buburir to ramin lo.
21 Ma udan es farlan bati ma ntompur nof langit ma ntait tomwatar.
Es ma ntompur a ne bertyan fafa kilo buty lim.
Udan es silai ne nwayat ma tomwatar rsompe Ratu.