Tomwatar na Babel nir adat farlan bat yatak
17:1-18
1 Malaektar sa nof malaektar itw ma nonry kompi itw a ne nma ma nfalak ber yakw,
“Mwa ye,
ma kuftutu ber ko feti keta Ratu nal tetetak safe,
ma ber bat yatak ma ngarany a nsor a ne.
Bate ne nfatutu tomwatar na kote silai Babel.
Kote ne namin a nlosir keswar yadin.
2 Rayar na saryamprene ranronr ror bate ne lo.
Ma tomwatar na saryamprene ni kateman ranabuk,
fali renum ni tuak.
Iane feti rlarat ni adat yatak a ne lo.”
3 Ne Ratu Smwangtany nkuase yakw ma malaekat a ne nor yakw far ain letkape.
Na iane kswalan bat sa namtoran binatang das.
Binatang a ne fuluny memeye,
ulnir itw ma soruny buty.
Ma na tenany ni kateman e rarengi ngribatnir ma rafbwere Ratu.
4 Bate ne nfonak rabit weympuse daran ma memeye farlan rai ni rabit.
Ma i npaki masar,
permata,
ma mutiara a nbal.
I nomat kompi mase ma nfen ber kabain yatkar ma rarai.
Iane nfatutu ni adat yatak ma nanronr a ne.
5 Na dediny a ne rarengi ngarar sa ma tomwatar to rafai isiny a fuky.
Ngare ne farye:
“Yakw ye kote silai Babel ma kweluk ene ber bat yatkar monuk na saryamprene.
Ma kabain yatkar monuk na saryamprene ye rma rof yakw.”
6 Ne kswalan bate ne nanabuk fali nenum Ratu Ni tomwatar darnir.
Tomwatar rfen sir a ne fali dedesar ma rafwibar Yesus ngarany.
Noak ma kswalan farane kumpriang desar.
7 Ne malaekat a ne nfalak ber yakw,
“Safema mumpriang?
La kfwalyole ber ko safe ma tomwatar to rafai fuky na bate ne,
ma binatang ma ulnir itw ma sornir buti ma bate nfangat a ne.
8 Binatang ma mswalan a ne luryain e nmorip nempa lere ye nmat lo.
Ma keta i nma nof tetebin mamate.
Ma tomwatar ma rmorip a na saryamprene keta rampriang ma rsalan binatang a ne.
Sir a ne ma ntabw nof ma saryamprene to namin a fuky e to rarengi ngarnir a na Kitap Momorip dalam.
Sir rampriang binatang a ne fali luryain e i nmorip a na saryamprene ma lere ye i to namin lo,
nempa keta i nbotin a nbal ma Ratu nafyatak i.
9 Mpa tomwate ma ni anfai silai ma keta i nafai na binatang a ne.
Binatang ulnir itw a ne isiny feti buburir itw ma bate ne namtoran das.
10 Ma ulnir itw a ne iane feti rayar itw.
Nof sir a ne rayar lim a rmat lo,
sa e lolone nfarete,
ma sa e to nma fuky.
Noak ma nma e nfarete nempa keta to dodo.
11 Ma binatang ma luryain e nmorip nempa lere ye to namin a ne,
i a ne rayar sa nof rayar itw a ne.
Ma keta i nbotin a nbal ma nfarete neluk rai kedelapan,
nempa keta Ratu nafyatak i desar.
12 Ma sornir buty ma mswalan a ne,
iane rai buti ma to rfarete fuky.
Ma keta ral kuase ber sir ma rfarete ror binatang a ne nempa to dodo.
13 Rai buti ne nir andaun lese,
ma ranrenre nir fakoran ma nir kuase ber binatang a ne ma nfarete.
14 Binatang ma rai buti ne keta raprang ror Domba Anak nempa keta nafufu sir.
Fali I neluk Mangnrur Silai ber mangnrurar monuk ma I ye Rai ber rayar monuk.
Ma Ni tomwatar a ne ror I a nbal.
Sir a ne ma nfil a nkese sir ma rlarat I dedesar.”
15 Ne malaekat ne nfalak ber yakw nbal,
“Weyar monuk ma mswalan ma bat yatak ma namtoran a ne,
iane tomwatar ma rma rof mpenempen na saryamprene.
Sir a ne ma rma rof nusar mpane,
liliryar mpane ma das matnir mpane.
16 Keta nait ni tewat e binatang ma rayar buti ma mswalan a ne dalmir maninik bat yatak a ne.
Ma keta ral monuk ni kabanir ma rlus i.
Ma rfen i ma rane isiny betno rapu linir.
17 Ratu nkarya na rai buti ne dalmir mpa sir rose rlarat Ni mpempeang.
Iane nwayat ma nir andaun lese ma ral nir kuase ber binatang a ne ma nfarete,
terik ma Ratu nafdiat Ni ngribatnir monuk.
18 Bat yatak ma mswalan a ne iane kote silai ma nfarete rayar na saryamprene.”