Ratu nose ma kote Babel namsos
18:1-24
1 Mpene kswalan malaekat sa nbal ma ntompur nof surga.
Malaekat a ne ni kuase silai ma ni snyain idak ma nodir monuk saryamprene.
2 Ma i nfalak nor liriny silai,
“Kote silai Babel ne nayatak lo,
kote ne namsos lo!
Kote ne lere ye neluk ain ber smwangat yatkar monuk ma ramin.
Na ain a ne kabain yatkar monuk ramin.
Ma mangkyar ma tomwatar ramoli ma rane ne,
ramin ain a ne nbal.
Kabanir a ne ma tomwatar to rmpeang desar.
3 Kote ne nayatak lo fali tomwatar ma ramin kote ne rwayat tomwatar na nusar monuk ma rose kabain yatkar.
Iane feleles farlan tomwatar na kote Babel rafnabuk tomwatar na nusar monuk nema rlarat nir makeus ma ranronr ror sir.
Ma mangafen kabanir na saryamprene raoskai fali tomwatar na kote Babel rlarat lan nir makeus ma rselir kabain ngafelar rof sir.”
4 Ne kdwengar lirin walyete nbal nof surga ma nfalak,
“Hei kmi ma milele Yakw,
mifla mbyie myof kote ne!
Ma kete myose mlyarat tomwatar ma ramin a ne nir adat yatkar.
Nema noak ma Yakw kukun kote ne,
keta to kukun a kmi myor sir.
5 Fali tomwatar na kote ne ni salar yadin ratait terik langit,
mpa lere ye Yakw to kumlufe nir adat yatkar a ne.
6 Iane nwayat ma keta kbwalas ma kufyatak kote ne klwarat safe ma sir rose ber Ningw tomwatar.
Ma nof safe ma rose ber Ningw tomwatar a ne keta ktwafal ma kbwalas ber sir fen lain du.
Iane feleles farlan ma kose ma renum anggur fen lain du nlengan nof ma biase renum a ne.
7 Tomwatar na kote Babel a ne ka rkoman suse ma maberat desar ma ka rtasing ma raiuk liry.
Sir rkoman suse ma maberat farane fali luryain ma rmorip e raoskai desar.
Ma fali luryain e dedesar ma rafdas sir ma rfalak,
Yakw ye farlan rai bate ma kfwarete!
Yakw to kswom ma keta to kwoman suse!
8 Sir rafdas sir ma farane,
mpa Ratu keta nukun sir lan lere lese nor maningkyar,
rkoman lafar,
ma nose ma yadin nof sir a ne rmat mpa rampalim.
Ma keta au nane sir a nbal.
Fali Ratu ma ntetak nir ngriar a ne iane Ratu ma Ni kuase ma nlie nlengan.”
9 Ma rayar na saryamprene ranronr ror tomwatar na kote Babel lo.
Ma sir rmorip e raoskai nbal ror tomwatar na kote ne.
Sir a ne ma keta rtasing ma ralol noak ma rsalan masu nafanak na kote ne.
10 Ma sir ramdir dodo motak fali ramtaut feti suse na kote ne keta diat sir.
Ne sir rfalak,
“Ado,
yore desar,
yore desar kote silai Babel ma namkoran a ne!
Na lere lese motak e Ratu nukun a kmi lo!”
11 Mangafen kabanir na saryamprene rtasing ma rampalim kote ne nbal,
fali keta to kekes ma rselir nir kabanir lo.
12 Keta to kekes ma rselir nir kabanir.
Kabanir a ne rose rof mase,
perak ma mutiara.
Ma sir rfenri nbal malolyar ma kotkir far maloly lenan,
maloly weympuse daran,
sutera ma maloly memeye nempa to kekes ma rselir.
Kabanir ma rose rof katutnwar ma angtir a rangafel,
kabanir ma rose rof gading,
kabanir ma rose rof katutnwar ma kotkir,
rof tembaga,
rof fnutan ma rof pualam a nbal.
13 Sir rfenri nbal kayu manis,
kabanir ma rpaki ma rose ngule angat ngafele,
kabanir ma angtir a rangafel,
mur,
natan,
anggur,
ngul zaitun,
terigu ma gandum.
Sir rfenri nbal sapi,
domba,
kude,
kereta,
karwar,
ma rfenri tomwate nbal.
Sir rfenri kabanir monuk a ne nempa noak ma kote Babel ne namsos e to kekes ma rselir kabanir a ne rof sir lo.
14 Iane nwayat ma mangafen kabanir a ne rfalak ber tomwatar na kote Babel,
“Kabanir monuk ma mpyeang a ne to ramin lo,
ma kabain ngafelar ma angtir a rangafel ma rafsenange kmi a ne rlai lo,
ma to mkyeban sir lo!”
15 Mangafen kabanir a ne rfenri nir kabanir ber tomwatar na kote Babel,
mpa raoskai.
Nempa noak ma kote ne rkoman suse maberat e sir rtasing ma rampalim.
Ma ramdir dodo motak fali ramtaut feti kote ne ni suse keta diat sir.
16 Ne rfalak,
“Ado,
yore desar,
yore desar kote silai ne!
I ni tomwatar biase rfonak malolyar ma kotkir far maloly lenan,
maloly weympuse daran ma maloly memeye.
Ma sir biase rpaki mase,
permata ma mutiara.
17 Nempa lere lese motak e kabanir a ne rlai lo.”
Ma mangomat kabal,
tomwatar ma rkarya na kabal ma tomwatar ma raflolwain ma ranriak nir momorip,
sir monuk a ne ramdir dodo motak ma rsalan kote ne.
18 Noak ma rsalan ma masu nafanak far das na kote ne,
sir rfalak ror lirnir silai,
“Kote ne nbal.
To kote fen lese ma nbalak kote ne!”
19 Mpe ral afu ma ryefar na ulnir neluk faniak feti rampalim.
Ne rtasing ma ralol ma rfalak,
“Ado,
yore desar,
yore desar kote silai ne!
Tomwatar ma rkarya na kabal a ne rfenri nir kabanir ber tomwatar na kote Babel ma raoskai ne,
nwayat ma sir raoskai nbal.
Nempa lere lese motak e kote ne namsos lo!”
20 Ne liliri ne nfalak a nbal,
“Kmi ma mimin surga ka mimpumpuki kmi,
ma Ratu Ni tomwatar a kmi ka mimpumpuki kmi a nbal,
fali Ratu nbalas ma nukun kote ne.
Ma mangsidkwar a kmi ma nabyar,
ka mimpumpuki kmi a nbal,
fali Ratu nbalas ma nukun kote ne nlarat safe ma sir rose ber a kmi.”
21 Mpene malaekat sa ma namkoran npote baty silayar sa desar ma nyebas far tasik ma nfalak,
“Bati ma kyebas far tasik a ne,
iane nfatutu feti
kote silai Babel ne keta nayatak desar
ma keta tomwatar to rsalan i lo.”
22 Ma keta to sasaf a na kote ne desar,
keta to tdengar ma tomwatar rbeu,
rampuat kecapi,
roup a tburi ma roup buli.
Tuknar ma rafai resi keta to ramin lo.
Ma bati ma tomwatar rpaki la rputar gandum a ne keta to delak lo.
23 Ma keta tomwatar to rsalan damar idkir lo;
ma to rose festa nika lo.
Ratu nukun kote ne farane,
fali mangafen kabanir ma ramin a ne raoskai rlengan tomwatar na saryamprene,
ma rose nir snyafkar la rfule tomwatar na nusar monuk.
24 Ratu nukun kote Babel ne maberat desar fali rfen nabyar ma Ratu Ni tomwatar.
Ma sir rfen a nbal tomwatar monuk ma rlarat Ratu na saryamprene.