Tomwatar na surga rampumpuki sir fali Ratu nukun kote Babel
19:1-5
1 Mpene yakw kdwengar tomwatar yadin desar lirnir na surga. Sir ratanuk ror lirnir silai ma rfalak:
“Haleluya! Mya ma tdangin Ratu ma tsatngur ber I a ne. I ye Ratu Mangamin Medase!
Fali I ye ma Ni kuase silai
ma I ye ma nfair kit nof ninr salar!”
2 Mya ma tdangin Ratu fali noak ma I ntetak tomwatar nir ngriar, I nose nor malonri ma to nasalan sou.
Kote silai Babel ne farlan bat yatak ma nanronr nor merwanar.
Iane feti tomwatar na kote ne rwayat tomwatar na saryamprene ma rlarat nir adat yatkar mpa Ratu nukun sir.
Ratu nukun kote ne nbal fali sir rfen Ni mangkaryayar.
3 Ne kdwengar ma tomwat ngayadin a ne rfalak a nbal,
“Haleluya! Mya ma tdangin Ratu!
Fali au ma nane nafere kote silai ne, ni masun nal das ma to terik.”
4 Mpe mangfarete buty du resin fat, ma kabanir fat ma rmorip farlan binatngar a ne rsatngur ber Ratu ma namtoran Ni kadere ne. Ne sir rfalak, “Amen! Haleluya! Mya ma tdangin Ratu.”
5 Mpene kdwengar liliri nof Ratu Ni kadere ne ma nfalak,
“Mya ma tdangin Ratu ma tsatngur ber I a ne.
Kmi monuk ma mkyarya ber I.
Kmi monuk ma myalang Ratu ka mdyangin I,
boloka tomwat biase nre tomwat silayar a kmi.”
Domba Anak Ni festa nikah
19:6-10
6 Ne kdwengar tomwatar yadin desar lirnir. Lirnir a ne delak farlan kjaip silai ma tarpake delak nauran. Ne kdwengar lirnir a ne ma rfalak,
“Haleluya, mya ma tdangin Ratu!
Fali ninr Mangnrure ne, I a ne Rai ma nfarete na safe-safe monuk,
ma Ni kuase nlie nlengan.
7 Mya ma tampumpuki kit ma tdangin Ratu!
Mya ma tdangin I!
Fali ni tewat lo ma Domba Anak ni festa nikah.
Ma Domba Anak a ne Ni tnyiman bate nengar motak ma nika.
8 Ratu ninrang ma bate ma keta radu a rafsau ne nfonak rabit ma rose rof maloly lenan ngafele ma idak namamas. Maloly lenan ngafele ma idak namamas a ne nfatutu Ratu Ni tomwatar ma nir adat ngamonar.”
9 Ne malaekat ne nfalak ber yakw, “Ka murengi ngribatnir ye: Ngamone ber tomwate ma rundang i far Domba Anak ni festa nikah.” Ma nfalak a nbal, “Safe ma kfwalak ye Ratu Ni ngribatnir mpa ngribatnir ye botuan.”
10 Ne kswatngur a na malaekat ne sounlury. Nempa malaekat a ne nfalak, “Kete mswatngur ber yakw, nempa ka mswatngur ber Ratu! Fali yakw ye Ratu Ni mangkaryae motak farlan ko a nbal. Ma yakw ye feleles farlan wamir a nbal ma rafwibar na Yesus.”
Fali tomwatar ma rafwibar na Yesus ne, sir a ne ma rafbotin Ratu Ni snyurat.
Tomwate ma nfangat kud mafuti nafufu binatang a ne
19:11-21
11 Ne yakw kswalan e surga ntakbanril, ma kud mafuty sa nbotin. Tomwate ma nfangat kude ne ngarany, “I ma nose nlarat Ni yoyoding ma nose kabain botunar.” Noak ma raprang ma ntetak tomwatar nir ngriar e nose nor malonri. 12 Tomwate ne matnir a rfolur farlan au ma makotar yadin ramin uluny. Ma tenany e rarengi ngare sa, nempa to kekes ma rafai ngare ne isiny lan I e. 13 Ma I nfonak rabit ma nfen ber dare. Ma rafngare I feti, “Ratu Ni Ngribatnir.” 14 Ma suldadwar monuk na surga rfangat kud mafutyar ma rlarat I. Sir rfonak rabit mafutyar ma rangafel desar rof maloly lenan. 15 Ne smade sa ma nane nbie nof tomwate ne babany. Ma keta npaki smade ne la nafufu nusar monuk na saryamprene. Ma keta I nfarete sir nor Ni fakoran farlan ma nomat tetekan fnutan la nfarete sir. Ma I keta nferas anggur na ain ma rferas anggur a na ne. Anggur ma nferas a ne nfatutu Ratu Ni resar ma silai ber tomwatar ma rose kabain yatkar. 16 Ma na tomwate ne ni rabit ma ni lakbingan rarengi ngare feti, “Rai ber rayar monuk ma Mangnrur Silai ber mangnrurar monuk.”
17 Ne kswalan a nbal malaektar sa ma namdir lere dalam ma nfalak nor liriny silai ber mangkyar monuk na langit. Ne i nfalak, “Hei mangkyar monuk ma mtyurim, mya o, mya ma mibut a kmi ma mine tnyam faburat silai ma Ratu nasusan ye lo. 18 Kmi mya nema mine tomwatar isnir. Sir a ne rayar monuk na saryamprene ma rmat na prang dalam, suldadw ulnir ma suldadwar ma ramkoran noak ma raprang. Ma keta mine tomwatar ma rfangat kudar a ne numur kudar isnir a nbal. Ma keta mine tomwatar monuk isnir. Sir a ne tomwat biasar ma silayar, karwar, ma tomwat biasar.”
19 Mpene yakw kswalan binatang ma nbangal Ratu ne ma rayar monuk na saryamprene numur nir suldadwar, rafburat sir na ain lese. Sir rafburat sir ma rose ma raprang ma rbangal tomwate ma nfangat kud mafuti nor Ni suldadwar a ne. 20 Nempa sir romat desar binatang a ne nor ni nabi lepusuk. Ne ryebas rafmomorip sir far au ma belerang ma nfolur a ne. Nabi lepusuk ne ma luryain e nose kabain mpasalnar na binatang ne sounlury. I nose kabain mpasalnar ma nfule tomwatar. Sir a ne ma rsatngur ber binatang, ma rfaniak dednir. 21 Mpene tomwate ma nfangat kud mafuti ne nal smade ma nbie nof babany la nfen binatang a ne ni suldadwar monuk. Ma mangkyar monuk rma ma rane rafere sir terik ma rabotan.