Yesus nafbotin ber Yohanes na
Safe-safe ma keta rbotin na lere ma nma ne
Yohanes ni ngribatin luryain
1:1-3
1 Yakw ye Yohanes ma kweluk Yesus ninr Ray Silai Ni mangkaryae.
Yakw kurengi safe-safe ma Ratu nafbotin na surat ye dalam.
Ratu nafbotin ngriar a ne ber Yesus ninr Ray Silai,
betno Yesus ninr Ray Silai nafbotin ber kit ma teluk Ni mangkaryayar a ne,
nema tafai feti kabanir ma nafbotin a ne to dodo e rbotin lo.
Mpe I nsiduk Ni malaekat ma nafbotin ber yakw.
2 Ma yakw kusaur safe-safe monuk ma kswalan a ne.
Iane Ratu Ni ngribatnir ma safe-safe monuk ma Ratu nafbotin ber Yesus ninr Ray Silai.
3 Ngamone ber tomwatar ma rbaca safe ma yakw kurengi na surat dalam ye.
Ma ngamone ber sir a nbal ma rdengar,
ma rose rlarat safe ma rarengi na surat dalam a ne,
fali keta ni tewat ma safe-safe monuk a ne rbotin.
Salam ber soranyar ma ralele Ratu na pnuar itw
1:4-8
4 Surat ye nof yakw Yohanes.
Ma kurengi ber soranyar ma ralele Ratu na pnuar itw ma ramin propinsi Asia.
Yakw ktwak Ratu ma nfatutu dalamy ngamone ma nal maline ma ber a kmi.
I ye ma namin nof luryain,
lere ye ma namin terik ma dedesar.
Ma yakw ktwak a nbal ma Smwangtar itw ma ramin Ratu sounlury a ne rfatutu nir dalam ngamone ma rose ma myorip e mingamon.
5 Ma yakw ktwak a nbal ma Yesus ninr Ray Silai nfatutu Ni dalamy ngamone ma nal maline ma ber a kmi.
I ye ma biase nfalak safe ma botuan nof Ratu ber a kmi,
ma tomwatar bise ma ralele safe ma nfalak a ne.
I ye ma Ratu nafmorip I baluan desar nof mangmwatar.
Ratu nafmorip baluan I ma neluk Mangfarete ber rayar monuk na saryamprene.
I ye ma nkamis kit ma nmat la ntebus ninr salar.
6 I ye ma nose ma teluk Ni tomwatar na Ni ain farete,
ma nfil kit ma teluk mangsompar ma tkarya ber Amany Ratu.
Mpa mya ma tdangin Yesus ninr Ray Silai fali lan I ma Ni kuase terik ma dedesar.
Amen.
7 Mdyengar fen ngamone,
keta Yesus nma nof mutan dalam.
Ma keta tomwatar monuk rsalan I,
ma tomwatar ma luryain e rtebak I a ne rsalan I a nbal.
Ma tomwatar monuk ma rsalan I a ne keta rtasing ma ralol.
Au botuan!
Ka weni safe-safe monuk diat farane.
Amen.
8 Ne Ratu nfalak,
“Yakw ye Alfa ma Omega,
ma isiny feti Luryain ma Famudi.
Noak ma saryamprene to namin a fuky e Yakw kumin kof luryain,
lere ye ma kumin terik ma dedesar.
Yakw ye ma Ningw kuase nlie ma nlengan na langit ma saryamprene.”
Yohanes nsalan Yesus ninr Ray Silai na nus Patmos
1:9-20
9 Wangur,
yakw ye Yohanes ma taktem a talele Yesus ninr Ray Silai.
Taktem a talele Yesus ninr Ray Silai,
mpa tkoman suse nempa dalminrar dedesar ma ramkoran.
Kit taktem a teluk Ratu Ni tomwatar la tdaf Yesus Ni mamae ma nfarete neluk Rai.
Ma sir romat yakw ma ror yakw far nus Patmos,
fali yakw kufwibar Ratu Ni ngribatnir,
ma kufbwotin safe ma Yesus ninr Ray Silai nfalak ber yakw.
10 Na ler sa,
iane lere ma tomwatar rsampayang ber Ratu,
ne Ratu Smwangtany nkuase yakw.
Ne kdwengar liliri silai nof mudy farlan ma tomwatar roup terompet.
11 Ne liliri ne nfalak,
“Ka murengi monuk kabanir ma keta mswalan ye na kitpar sa betno kwirim ber soranyar na pnuar itw ye:
Efesus,
Smirna,
Pergamus,
Tiatira,
Sardis,
Filadelfia,
ma Laodikia.”
12 Mpe kbwal yakw ma kswalan feti ise ma natanuk nor yakw.
Ne kswalan diryar itw ma rose rof mase ma rtikloi faduk a na.
13 Ma kswalan tomwatar sa farlan Yesus Tomwate Anaky ma namdir diryar a ne twalelean.
I nfonak rabit melawas ma naskyau maloly mase la nteri pumpryan.
14 Uluny bukrir rangfuty farlan kapas,
ma matnir rfolur farlan au.
15 Emnir e rfolur farlan ma rapu tembaga.
Ma liriny farlan kjaip silai.
16 Ma nomat ftunar itw na limany fian,
ma smadar sa ma luri mudy nane nbie nof babany.
Ma souny idak farlan lere ma nbet na ler fardu langit.
17 Noak ma kswalan I e,
yakw kfwuf na sounlury farlan tomwatar sa ma nmat.
Nempa I nsaup limany na yakw ma nfalak,
“Kete mumtaut!
Yakw ye ma luryain e,
kumin lo ma keta kumin dedesar terik ler famudi.
18 Yakw ye ma kmworip terik ma dedesar.
Luryain e,
Yakw kmwat nempa Yakw kmworip kbwali ma lere ye msyalan Yakw ye.
Ma Yakw Ningw kuase ma kufmworip a kbwali mangmwatar,
ma Ningw kuase nbal ma kalin tomwatar kof mangmwat anir.
19 Mpa ka murengi safe-safe monuk ma mswalan ma lere ye rbotin lo,
ma safe-safe ma keta rbotin a nbal.
20 Ma keta kfwalyole safe-safe ma mswalan a ne farye:
Ftunar itw ma namin limangw fian a ne,
nfatutu malaektar itw ma rajake Ratu Ni soranyar na pnuar itw a ne.
Ma diryar itw ma faduk namin a ne rfatutu soranyar na pnuar itw a ne.”