Lama malaekat ne nfatutu kote ne ber yakw,
i nfatutu nbal kewas ma namlin farlan kristal.
Kewas ne nlale weye ma nal momorip.
Ma weye ne nlale nof Ratu Ni kadere ma Domba Anak Ni kadere.
2 Nof a ne weye ne nlale nlarat srat silayar na kote ne.
Na kewas ne seriny baldu,
katutnwar ma ral momorip a ne ramin.
Katutnwar a ne rabu ngarak dalam e lain buti resin du,
ma na bulan dalam e nabu lain lese.
Ma nusar na saryamprene ral katutnwar a ne ni donyar la rfarobat nir maningkyar.
3 To kekes ma to sasaf ma Ratu nsompe sir na kote ne.
Ratu Ni kadere ma Domba Anak Ni kadere ramin kote ne,
ma Ratu Ni mangkaryayar keta rsatngur ma rsampayang ber I.
4 Mpe keta rsalan desar souny ma rarengi ngarany na dednir.
5 Na kote ne to nronram lo,
mpa sir to rperlu damar nre lere ma nodir sir.
Fali Ratu ma neluk Mangnrur Silai ne,
koko I ma nodir kote ne.
Ma keta sir raktem Ratu rfarete reluk rai terik ma dedesar.
Yesus nafbotin feti keta nma nbali saryamprene
22:6-17
6 Mpene malaekat ne nfalak ber yakw,
“Ngribatnir ma kfwalak ye botuan ma tomwatar bise ma ralele.
Ratu ma neluk Mangnrur Silai ma nal Ni Smwangtany ber nabyar.
Ma I nsiduk Ni malaektar ma rti rakmat Ni mangkaryayar a ne ma rafbotin ber sir na safe-safe monuk ma to dodo e diat sir lo.”
7 Yesus nfalak,
“Mdyengar fen ngamone safe ma kfwalak ye!
Keta to dodo a nbal e kmwa lo.
Mpa ngamone ber tomwate ma nose nlarat Ratu Ni snyurat ma rarengi na kitap ye dalam.”
8 Ma yakw Yohanes,
koko yakw ma kdwengar ma kswalan kabanir monuk ma malaekat nfatutu ber yakw ne.
Lama kdwengar ma kswalan kabanir a ne,
yakw kose ma kswangitil na malaekat a ne sounlury.
9 Nempa i nfalak ber yakw,
“Kete mswatngur ber yakw,
nempa ka mswatngur ber Ratu!
Fali yakw ye Ratu ni mangkaryae farlan ko a nbal,
ma yakw ye feleles farlan wamyamar ma reluk nabyar.
Ma yakw ye feleles a nbal farlan tomwatar monuk ma rose rlarat ngribatnir ma rarengi na kitap ye dalam!”
10 Ne nfalak ber yakw nbal,
“Kete mumudim snyurat nof Ratu ma rarengi na kitap ye dalam,
fali kabanir monuk ye sesedin ma diat lo.
11 Tomwatar ma na nir momorip e rarai ma rose yatak,
ka tsalan lonri ma dedesar e rose farane.
Nempa tomwatar ma rmorip e ramlonry,
ka tsalan lonri ma dedesar e rmorip farane.
Ma tomwatar ma rmorip e rose rlarat Ratu Ni mpempeang,
ka tsalan lonri ma dedesar e rmorip farane nbal.”
12 Yesus nfalak,
“Mdyengar fen ngamone,
to dodo a nbal e Yakw kmwa,
ma keta kal sewe ber tomwatar,
ma kbwalas a nbal ma kukun tomwatar klwarat safe ma sir rose.
13 Yakw ye Alfa ma Omega,
iane feti Yakw ye ma luryain e kumin lo,
ma keta kumin dedesar terik ler famudi.”
14 Ngamone ber tomwatar ma rtefe nir rabit melaswar terik ma ranglerap.
Fali sir a ne ma Ratu ninrang sir ma ralyole kote ne ni finru matan ma rti kote dalam,
ma ninrang sir a nbal ma rane bunir rof katutnwar ma ral momorip a ne.
15 Nempa tomwatar ma rose kabain yatkar,
tomwatar ma rsafak,
tomwatar ma ranronr,
tomwatar ma rafen,
tomwatar ma rsampayang ber ratw wawatar,
tomwatar ma rmpeang lan ma rfalak kabain lepuskwar,
sir monuk a ne Ratu to ninrang sir ma rti kote dalam.
16 Yesus nfalak,
“Yakw ye Yesus.
Yakw kswiduk Ningw malaektar ber a kmi nema rafbotin kabanir monuk ye ber soranyar na pnuar mpane.
Yakw ye kof Daud ni dasdalam,
ma Yakw ye farlan ftun telyawar ma idak resi.”
17 Ratu Smwangtany ma Domba Anaky Ni tnyiman bate ne rfalak,
“Mya ye!”
Tomwatar ma rdengar a ne ka rfalak a nbal,
“Mya ye!”
Ise ma namwes ka nal weye nof weye matan ma nal momorip,
ma keta nenum e to nperlu ma nbayar.
Yohanes ni snyurat famudi
22:18-21
18 Yakw ye Yohanes.
Tomwatar a kmi ma mdyengar snyurat nof Ratu ma kurengi na kitap dalam ye,
ka mdyengar fen ngamone safe ma kfwalak ye,
“Ise ma ntafal ngribatnir sa na Ratu Ni snyurat ye,
keta Ratu ntafal ma nukun i nor susar yadin ma rarengi na kitap ye.
19 Ma ise ma nkes kalin ngribatnir sa nof Ratu Ni snyurat ma rarengi na kitap ye,
keta Ratu to nal ni wayat ma rarengi na kitap ye.
Ni wayat a ne,
iane feti i bise ma namin kote lelerap a ne,
ma bise nane buany nof katutun ma nal momorip a ne.”
20 I ma nfalak ngribatnir monuk ye ber yakw ne nfalak,
“Botuan,
keta to dodo e Yakw kmwa!”
Mpa yakw Yohanes kfwalak,
“Botuan,
la Yesus ninr Mangnrure nma!”
21 Yakw ktwak ma ka weni Yesus Ni Mangnrure nfatutu Ni dalamy ngamone ber Ratu Ni tomwatar monuk.
Amen!