Langit ma saryampren beberi
21:1-8
1 Mpene kswalan langit beberi ma saryampren beberi.
Fali langit ma saryampren baluan a ne rlie lo,
ma tasik to namin a nbal.
2 Ma kswalan kote lelerap ma tomwatar rtar feti Yerusalem beberi.
Kote ne ntompur nof surga fali Ratu ma ntolar.
Kote ne nangafel resi farlan batar sa ma rfonak i ma nangafel,
la ndaf ni tnyiman merwane ma nafsau nor i.
3 Ne kdwengar liliry silai nof Rai Ni Kadere ne ma nfalak,
“Mdwengar fen ngamone,
lere ye Ratu namin nor tomwatar.
I nmorip nor sir ma keta reluk Ni tomwatar.
Ma I nmorip nor sir ma keta neluk Ratu ma rsatngur ber I.
4 Ma keta I nkur lunir monuk,
fali kabanir monuk na momorip luryain a ne rlie lo.
Mpa keta to tomwate fen lese nbal ma nmat,
ma keta tomwatar to rtasing ma ralol,
ma keta tomwatar to dalmir suse lo.”
5 Ma I ma namtoran Rai Ni kadere ne nfalak,
“Mdyengar,
lere ye Yakw kose kabanir monuk ma rabeberi lo!”
Ne I nfalak a nbal ber yakw,
“Ka murengi ngribatnir ye fali safe ma kfwalak ye botuan mpa tomwatar bise ma ralele.”
6 Ne nfalak ber yakw nbal,
“Kose ksworu safe-safe monuk a ne lo.
Yakw ye Alfa ma Omega,
iane feti Yakw ye ma luryain e kumin lo,
ma keta kumin dedesar terik ler famudi.
Ise ma namwes keta kal weye ber i kof weye matan ma nal momorip,
ma keta nenum ma to nperlu ma nbayar.
7 Mpa ise ma nafufu nal smwangat yatkar nir ulun keta nonri kabanir monuk ma kfwalak a ne.
Ma keta kweluk Ratu ber i,
ma i neluk anakw.
8 Nempa ber tomwatar ma ramtaut ma ryoding feti ralele Ratu,
ma sir ma to ralele Ratu,
ma tomwatar ma rose kabain yatkar,
ma tomwatar ma rafen,
ma tomwatar ma ranronr,
ma tomwatar ma rsafak,
ma tomwatar ma rsampayang ber ratw wawatar,
ma tomwat lepuskwar monuk,
sir monuk a ne keta ryebas sir na au ma belerang ma rfolur a ne,
iane mamat kedua.”
Yerusalem beberi
21:9-27
9 Mpene malaekat sa nma ma nakmat yakw.
I a ne malaekat sa nof malaektar itw,
ma romat kompyar itw ma rfen ber sus famudyar itw ma maberat a ne.
Malaekat a ne nfalak ber yakw,
“Mwa ye ma kuftutu Domba Anak Ni tnyiman bate ber ko,
ma keta radu a rafsau ne.”
10 Ne Ratu Smwangtany nkuase yakw ma malaekat a ne nor yakw far bubuar silai ma medase desar.
Na iano malaekat a ne nfatutu kote lelerap a ne ber yakw,
iane Yerusalem ma ntompur nof surga ma Ratu ntolar a ne.
11 Kote ne itkyan fali Ratu Ni snyain nodir kote ne.
Ma kote ne itkyan farlan baty permata yaspis ma kotkyan.
Ma kote ne nfitik a nbal farlan kristal.
12 Ma ni tembok ma rose rbebar kote ne medase ma nmakoran,
ma ni finru matan buti resin du.
Na ni finru matan mpane rarengi Israel ni nuse buti resin du ngarnir a na,
ma malaektar buti resin du a rajake finru matnir a ne.
13 Ni finru matnir tetel a rfon mpane mnaur matnir.
Tel a rfon far timur,
tel far barat,
tel far trangan,
ma tel a nbal e far marmar.
14 Ma raftoran tembok ne ni fanderen na baty fakoran buti resin du.
Na batyar a ne rarengi Domba Anak Ni mangsiduk buti resin du ngarnir a na.
15 Malaekat ma natanuk nor yakw ne i nomat tetekan sasare ma rose rof mase.
Tetekan a ne la nsar kote ne ni finru matnir ma ni tembok.
16 Kote ne susnir fat,
ma laswan feleles farlan labryan.
Ne malaekat nsar kote ne nor ni tetekan.
Kote ne laswan,
labryan,
ma dasin e feleles.
Iane kilo meter ribun du a raty fat.a
17 Noak ma malaekat ne nsar kote ne ni tembok,
ni kafal e,
meter buty nem.
Malaekat ni sasare ne feleles farlan sasare ma tomwatar biase rpaki.
18 Kote ni tembok a ne rose rof baty permata yaspis.
Ma kote ne desar e rose rof mas botuan ma nfitik far totote.
19 Ma baty fakoran buti resin du ma neluk fanderen a ne,
rose rof baty permata.
Baty fakoran pertama e rose rof baty permata yaspis,
kedua e rof baty nilam,
ketiga e rof baty mira,
keempat e rof baty zamrud,
20 kelima e rof baty baiduri sepah,
keenam e rof baty delima,
ketujuh e rof baty ratna cempaka,
kedelapan e rof baty pirus,
kesembilan e rof baty topas,
kesepuluh e rof baty krisopras,
kesebelas e rof baty lasuardi,
ma keduabelas e rof baty kecubung.
21 Kote finru matan buti resin du a ne,
rose rof mutiara.
Ma kote ne ni srat silayar e rose rof mas botuan ma nfitik far totote.
22 Yakw to kweban Ratu Ni Das Silai na kote ne dalam,
fali Ratu ma Ni kuase ma nlie nlengan ma Domba Anak a ne,
koko sir a reluk Ratu Ni Das Silai.
23 Tomwatar na kote ne to rperlu ma lere nre bulan idak sir lo,
fali Ratu Ni snyain nodir kote ne nwayat ma kote ne idak,
ma Domba Anak nodir kote ne nbal farlan damar.
24 Nusar na saryamprene ye keta rmorip a na ngaodir a ne,
ma keta rayar monuk na saryamprene ronr nir anoskai far kote ne dalam.
25 Kote ne ni finru matnir e rtakbanril dedesar,
ma to lain sa ma rfolat fali to nronram a na iane lo.
26 Nusar monuk na saryamprene ye rmpeang ma ralang Ratu,
mpa ronr monuk nir anoskayar far kote ne dalam.
27 Nempa tomwatar ma rose kabain yatkar nre tomwat lepuskwar,
to rinrang ma rti kote ne dalam desar.
Lan tomwatar ma rarengi ngarnir a na Domba Anak ne Ni kitap momorip dalam,
ma bise ma rti kote ne.