Mark
RUI HYMEI GAYCHAMV
1
Duiluploumei John
1 Ravguangc Nac Mpouha Jisu Khrista tuang gaychamv kahouhmei:
2-3 "Zauc lo, nang khang chaeng sw khang
ai rui atuang latdiumei ta nang
hu khou ndiulou e;
'Poubauhmei guang pw the,
kakhang chaeng sw tho;
kakhang chaeng sw ntyng tho,'
twna gaanv khat tazikramv khou kauc bam e!"
twna muhzwng Isaia rui hylou the.
4 Mi thei tei layna Duilupmei John b tazikramv khou guangna paapc guay kuaklou khang lunghlaicna duilupmei lam khou kauc ndauh bam khwan e. 5 Khoutei Judia tuang ramv kapwm khatni Jerusalem khou rui meic naina kadaeng khou guang khwan e. Kumna kaniw paap guay kalauhna John rui kaniw ta Jordan duiriang khou duiluplou bam khwan e.
6 John guaikuan hiw phey piu e, guaigic bungkam kamc e, khatni nkav lev nwmbangc khuaic dui rui kataek sw e. 7 Khoutei, "Akhang suangc ngamv daihmeipu gaanv khat athei khou guang e, ai thu nkhum keyna katuang phaythuapc riang rih khang na sini biuhpui mei hamh e. 8 Kamei rui nangniw ta Bumaengh Nthanmei rui luplou puni," twna kauc ndauh bam khwan e.
Jisu Duilupmei
9 Mi ganv khou tei Jisu Galili tuang Nazareth khou rui guang the, kumna John rui kata Jordan duiriang khou duiluplou the. 10 Kamei dui khou rui ku dat rappui dyng khou tingpuk kakhak patna Bumaengh akhouhna kumcna kakhou keyloumei ta kamei how the. 11 Khoutei, "Nang hei ai rui nzianmei Nac Mpouh e; nang ta alung kwn the," twna tingkauh thangc rui sa key the.
12 Mi dyng khou tei Bumaengh tei rui kata tazikramv thangc ndiu pat the. 13 Kamei tazikramv khou, Seitan rui nthiamna zaeng riakdei bamlou khwan e; kamei numbangc khouringc nunc lev bamlou khwan e; khatni kauh baanchara nunc guangna kata nkhavlou khwan e.
Jisu rui Achuanh Gaanv Padeih ta Kawmei
14 John ta nym kanpui tangv, Jisu Galili khou Ravguangc tuang gaychamv dinc guang the. 15 "Kating tangc the, kumna Ravguangc Guangcdic guang the, nangniw lunghlaic tho, kumna gaychamv khou lwm tho," twna dinc the.
16 Jisu Galili zeiclat paengc khou tat pat khou, Simon lev kachana Andriu zeihlat khou tei chiakc phaic bammei ta how the. Kaney tei achuanh khwan e. 17 Khoutei Jisu rui kaney khou, "Athei lay o, ai rui nang ney ta meic nymmei achuanc tiswlou puni," twna sa the. 18 Mi dyng khou tei kaney tuang chiak guay ganclouna Jisu thei lay the.
19 Kumna kamei tat pat kasuanh khath tw dat pwkhou Zebedi nac mpouh Jakob lev kachana John ta how the. Kaney tei hih khou chiakc kasiamh bam khwan e. 20 Mi dyng khou tei Jisu rui kaney ta kaw the. Khoutei kaney pu lev taanv phihmei nunc ta tei hih khou tei ganclou ducna Jisu thei lay tat the.
Nthan Makmei Bumaengc Gutmeipu ta Tigayloumei
21 Mi tangv kaniw Kapernaum kaidai khou gut the. Kumna Sabbath guang pwkhou, Jisu sinagog khou gutna nchamlou the. 22 Kamei rui nchamloumei khou tei kaniw ngak the, kalam thu Riakdanv tadin nunc kumh makna, ngamv naipui mei akhat swna kamei rui nchamlou the.
23 Simei bumaengc gutmei gaanv khat mi sinagog khou tei bam khwan e. 24 Kumna kamei rui kaucna sa the, "Nazareth mei Jisu, nang aniw lev tabui sw khang nai na cho? Nang aniw ta swmaan khang guang tu cho? Ravguangc tuang Nthanmeipu, nang thow cho twmei ai thay e."
25 Khoutei Jisu rui kata luhna," Reih rei bam o, nang kakhou rui tat pat kan tho!" twna sa the.
26 Khoutei simei bumaengc tei, mi pu ta tei titheilanc keylouna, kauc ranvna kauclouna kakhou rui tat pat kan the. 27 Khoutei meicnunc tei ngak the, kumna kaniw kaphianhna mi kumcna sa the: "Mi hei tabui cho? Riakdyn thanh! Kamei rui ngamv kazauhna simei bumaengc ruc khou nganv latdanv tii e, kumna kaniw piu e!"
28 Kumna asaanh mak khou kachamv tei Galili gaengv zaengv kapwm khou zin lik kan the.
Jisu rui Meic Mpeyna ta Tigayloumei
29 Kaniw sinagog khou tei rui patna Jisu Jakob lev John ta nduanghna nzut phutna Simon lev Andriu kai thangc tat the. 30 Khoutei Simon now pui ravmancna zip bam khwan e, kumna Jisu guang tanghpuilev mi pui lam tei salou the. 31 Jisu kadaeng khou guangna kabaanc sinna kata zay thau the. Khoutei kamei ravmanc bammei tei kakhou rui tat kan the. Kumna kamei rui kaniw tuang siamruai sw the.
32 Neih keyna zingc key pwkhou nnaumei nunc khatni ravsic gutmei nunc ta Jisu daeng khou laa guang the. 33 Kumna mi kaidai mei guay tei rui kaimun khou guang bam padik the. 34 Khoutei kamei rui ravpuatc kaza baic baicna nnaumei mpeyna ta tigaylou the, khatni ravsic mpeyna ta nthau ganclou the. Kamei rui ravsic nunc ta tei lat sa khang nuhlou mak e, kalam thu kaniw kata thay e.
Jisu Galili khou Chamv Dinhmei
35 Jisu laukhwan khwanzingh tinggaanc riu mak khou rui thauna rimh rimpui bamv thangc tat patna huayney the. 36 Khoutei Simon khatni kapam nunc rui Jisu ta suic tatna kata ariw pwkhou, 37 "Meic guayna nang ta phu bam e," twna kakhou sa the.
38 Khoutei kamei rui kaniw khou sa the, "Aniu baih baihmei kaigeimei kaidai guay khou ni ai chamv dinh khang tat kho. Kalam thu mi khang ai guang tuang e."
39 Kumna kamei kaniw tuang sinagog guay khou chamv dinclouna khatni ravsic alay ganclouna Galili ramv kapwm khou tatlou the.
Mphaanhmei Gaanv Khat ta Tigayloumei
40 Mphaanhmei gaanv khat Jisu daeng khou guangna khuksun keyna huaychana, "Nang rui ata sw-nthanlouc ni tw e thei, nang ata sw nthanlou ngam de," twna sa the.
41 Khoutei Jisu kalung khou ningngam makmei padik the,d Kumna kabaanc haemv patna kata kahina sa the, "Ai nuh the, nang nthan tho." 42 Mi dyng khou tei mphaanhmei ravpuatc tei kakhou rui tat pat kan the, kumna kata sw-nthanlou the. 43 Khoutei Jisu rui kakhou chariakhpui lat salou lana kadyng khou ndiu ganc kan the. 44 "Nang meic gaanv khat na khou sini mi hei raclou nuh mak e, tiki nang ta amuh khou lyan tat tho, kumna nang nthan the twmei kaniw khou lyan khang Mousi tuang latdanv thei layna puatkat kat tho," twna kadylou the.
45 Tiki kamei tat patna rac lik sikh sik thau the. Kumna mi chamv tei zin lik thau the. Kum tina kamei kaidai khou ndauhna gut dat ngam mak khena kaidai paengc thangc meic maekpui bamv khou bam the. Kumna kabamv kathuic khou rui meicnunc kadaeng khou guang bam khwan e.