21
Maypui tuang Kaipat
1 Khoutei Jisu zauc pat pwkhou, lungcgaymei nunc puatkat khuk khou kaniw tuang puatkat phaic keylou bammei ta how the. 2 Lungcsimei maypui gaanv khat ni paic kanei na mi khou tei phaic keylou kanmei ta how the. 3 Khoutei Jisu rui sa the, "Ai rui nangniw khou kaling salou tuang e: meic baihmei guay tuang suangc mi maypui tuang tei geic liang e. 4 Kaniw hei thu kaniw tuang liamh laihmei khou rui tii tuang de, tiki mi pui hei thu maekna kamei tu nimei phaan tii tuang e."
Zuk Luai Nimei tuang Nchinmei
5 How gaymei tauc khatni puatkat swna katloumei puat rui kasiamhloumei Ravkai tuang how gaymei tei ziap gaanv saekc rui sa khwan e. Khoutei Jisu rui sa the, 6 "Nangniw ntaw how bammei hei, ntauh akhat rui ntauh akhat ruc khou nai bam dat lak nimei ganv guang puni. Kaguayna pangv key ngam kan puni."
7 Khoutei, "Dinhpouc, mi kiu tabui nungc pat puni cho? Mi kiu guang puni the twmei nchinmei tuang tabui nai puni cho?" twna kaniw rui thanv the.
8 Khoutei Jisu rui sa the, "Nangniw ta chaeng zay mbiangh mak khang ramhthay o. Kalam thu meic mpeyna azanc khou guangna, 'Ai hei kamei kiu the!' khatni 'Kaganv na the,' twna sa puni. Kaniw thei lay riu. 9 Rih chamv khatni rihthaumei chamv chu pwkhou ping nangh e. Mi guay hei pat rey puni; tiki nganvmei tei thu pat rap ni tu hamh mak he."
10 Khoutei kamei rui sa dat e, "Zaatc khat rui zaatc khat ta khatni guanghdic khat rui guanghdic khat ta adow puni. 11 Baengla daih mpeyna guang puni, kabamv mpeyna khou nkowmei khatni ravpyan mpeyna guang puni, meic pingmei tuang khatni sw nchinmei tuang mpeyna tingpuk khou pat puni.
12 "Tiki mi guay hei pat makmei hu khou, nangniw ta nymna rairiu puni. Kaniw rui nangniw ta sinagog khou phungc guang puni khatni kangkai khou lou puni, azanc zaeng rui nangniw ta guangh nunc hu khou khatni guanghkhyn nunc hu khou zay guang puni. 13 Mi tei nangniw khang gaychamv dinh khang kadouchamei sw dat puni. 14 Mi zaeng rui nang pumc khang akumhna daw duak nina cho twna kakhanh rey bam nangh e. 15 Nangniw ta zauczihmei nunc mwang daw ngam khang nangniw khang lat ni ningting ni tiilou puni. 16 Nangniw pui pu rui, chana rui, riang luaih rui khatni pam rui tinym puni, kumna nangniw gaanv saekc ta kaniw rui swluai puni. 17 Azaeng rui nangniw ta meic guayna rui karaeng puni. 18 Tiki nangniw sam lu na sini maan lak e. 19 Nangniw khaengvthaypui paan rui ringhpaan laatow puni.
Jerusalem ta Swmaan Nimei Lam Dincloumei
20 "Jerusalem ta hei rihmei rui ding bin guangmei ta how pwkhou, mi ta hei sw kamut kamai nimei na the twmei nangniw thay tho. 21 Mi khou kiu Judia khou bammei nunc chyngram thangc pak tat laa tho, kaidai lungc khou bammei nunc ni pak pat laa tho, kapaengc thangc bammei nunc gut dat laa ri tho. 22 Kalam thu mi hei hylou bammei latzan guay tei keylou khang guangmei tuang di the. 23 Mi ganv khou kiu nahguam bammei khatni angana puanc nouc bammei pui nunc tei sansi e dav! Kalam thu mi kandic khou hei ryanra daihmei khatni meicnunc khou kalungpuam keylou puni the. 24 Kaniw buy baeng mun khou theic puni khatni kaniw ta zaatc guayna khou kangmei swna zay tat puni. Jentailmei nunc tuang ganv luai mak saanv, Jerusalem ta hei Jentailmei guay rui ni bin bam puni.
Meic Nac Mpouh Guangmei
25 "Bw, neih, gaanchuangcna khou madanhmei pat puni. Zaatc kapwm khou duipui kamuatcmei khatni mi khwan khou tei rui swang maekna pingmei padik puni. 26 Kandih nam ruc khou guang punimei khang tei kakhanhna meicnunc tei pingna theic key puni; kalam thu tingpuk pumtan guay ta kanuk puni. 27 Mi ganv khou kiu, Meic Nac Mpouh pumtan khatni hymdaicna muangh khou keymei ta kaniw how puni. 28 Mi guay hei guang thau pw e thei, dingthauna nangniw py kaikhwang thau tho. Kalam thu nangniw ta thuak patlou nimei tei na guang the."
Tadut Bang khou rui Thay Nimei
29 Jisu rui kaniw khou mi latgiam hei salou e: "Tadut bang khatni thing bang guay ta tei zauc lo. 30 Mi tei kazik kasat pat pw e thei lauphwnswan na the twmei nangniw thay e. 31 Mi tei kumcna, mi guay hei pat pw e thei, Ravguangc Guangcdic na the twmei thay laa tho.
32 "Ai rui nangniw khou kaling salou tuang e: mi guay hei pat kan mak saanv, mi zuk hei luai ni tu hamh e. 33 Tingpuk kandih maan kan puni; tiki alat thu maan ni tu hamh e.
Nkhwan Bam o
34 "Tu mba zangv mbamei khatni mi panty tuang khang kapaemvmei rui nangniw lungc sw kambangvna bam khou phah nkhap kumcna Poubauhmei tingmik tei guanglou mak khang, nangniw kasiaththay o. 35 Kalam thu mi hei kandih nam ruc khou lungc bammei maansei katana khou guanglou puni. 36 Nangniw ntak nrakna nkhwan bam o, khatni pat nimei guay khou hei rui duak ngam khang khatni Meic Nac Mpouh hu khou ding ngam khang huayney tanh tan bam o."