12
Sabbath Lam Dincloumei
1 Kaganv akhat khou Jisu Sabbath neic laupuk khou tat ruan pat khwan e. Kaziap nunc tei ndaepc khwan the, kumna gehu guy chuncna tu thau the. 2 Mi tei Pharisi nunc rui how lana Jisu khou, "Zauc lo, nang ziap nunc Sabbath neic taanc nuh makmei taanc bam e," twna sa the.
3 Khoutei Jisu rui kaniw khou sa the, "David khatni kamei nunc tei ndaepcpui ganv khou David rui tabui sw kan tu cho twmei hylou bammei tei nangniw pah mak he nah cho? 4 Akumhna kamei Ravguangc kai khou gutna amuh nunc na hamhna kamei ni, kamei nunc ni tu nuh makmei khaengloupui tyan tu kan tu cho? 5 Sabbath neic ravkai lungc khou bammei amuh nunc Sabbath riak swbak sini kakhuay maek e twmei nangniw Riakdanv khou pah mak nah cho? 6 Ai rui nangniw khou sa tuang e: Ravkai khang suangc daihmei mi khou hei bam e. 7 'Ai kahawmei thu zauzian ta de, khaengmei ta hamh e,' twna samei kabac hei nangniw thay khwan e thei, kakhuay maekmei nunc ta nkhuai e twna nangniw sa bam lak ni tuang e. 8 Kalam thu, Meic Nac Mpouh hei Sabbath kaipouc e."
Kabaanc Theihmeipu ta Tigayloumei
9 Jisu mi bamv khou tei rui tat pat lana kaniw tuang sinagog khou gut khwan e. 10 Kumna zauc lo, mi khou tei kabaanc kabiak khat theihmeipu gaanv khat bam khwan e. Khoutei, "Sabbath neic tigayloumei hei kariak thei layna nuh ny nuh mak cho?" twna kaniw rui Jisu khou kakhuay phuna thanv khwan e.
11 Khoutei Jisu rui kaniw khou sa the, "Nangniw thowkumhmei tuang lauziu akhat Sabbath neic khunh khou keylou bam e thei, kamei mi tei zay thau dat pu lak nah cho? 12 Kum e thei, maansei hei thu lauziu khang suangc adih kungc kan thah? Mi zaeng rui, Sabbath neic kariak thei layna gaymei taanv taanc nuh de." 13 Khoutei Jisu rui mi pu khou tei, "Nang baanc ntyng pat o," twna sa the. Khoutei kabaanc ntyng pat the. Kumna kabaanc akhat tei kumcna gay dat the.
14 Khoutei Pharisi nunc tei tat pat lana Jisu ta swluai khang kaphianh the.
Ravguangc rui Kapahloumei Bangc
15 Mi tei thay lana, Jisu mi khou tei rui tat pat kan the. Khoutei meic mpeyna kathei lay tat the, kumna kamei rui kaniw guay ta tigaylou the. 16 Kalam khou rac tat nuh mak e twna kaniw khou kadylou the. 17 Mi hei muhzwng Isaia khou mi kumcna saloumei tei guang tangc khang the:
18 "Zauc lo, ai rui kapahloumei abangc ta,
ai pianmei ai nzianmei ta.
Ai rui kakhou a Bumaengc tiilou puni;
kamei rui Jentailmei guay khou,
nchumhmei latzan kauc ndauh puni.
19 Kamei agina ni kaucna ni bam ni tu hamh e;
Meic gaanv khat na sini,
kakhwan chaengdai khou chu ni tu hamh e.
20 Buap bammei ntou bang ta kamei sw bau ganc lak e;
khou luih luina bammei mairiang ta kamei sw amit ni tu hamh e,
kamei rui nchumhmei latzan rui tingamlou mak saanv;
21 kumna Jentailmei guay kakhou lwmlou bam puni."
Jisu ta Ravsic Gutmei khang Nkhammei
22 Mi tangv kamik tiat, lat sa thay mak twmei, ravsic gutmei gaanv khat ta Jisu daeng khou phungc guang khwan e. Jisu rui tigaylou tina mi pu tei lat sa dat the khatni how dat the. 23 Khoutei meic guay tei ngak the, kumna "Kamei hei David Nac Mpouh kiu lana the ny?" twna sa the.
24 Pharisi nunc rui mi tei chu lana, "Mi pu hei rui ravsic nunc ta nthau patmei hei ravsic guay tuang kapy Beelzebul ngamv rui de," twna sa the.
25 Jisu rui kaniw lungning tei thay lana kaniw khou sa the, "Kalangv patna khat khat ta howthou kanmei guangcdic tei mut e, khatni khat khat ta howthouna kalangv pat kanmei kaidai hamh e thei kaikhunc tei ding ngam ni tu hamh e. 26 Kumna Seitan rui Seitan ta nthau pat e thei karana kata swbak the; kumc e thei akumhna kaguangcdic ding ngam nina cho? 27 Ai rui Beelzebul paan rui ravsic nunc ta hei nthau pat tuang e thei, nangniw nac nunc thu tabui paan rui ravsic nunc ta nthau ganh tu cho? Mi zaeng rui kaniw rui nangniw tuang latzanpouc nunc sw puni the. 28 Tiki ai rui ravsic nunc ta nthau ganhmei hei Ravguangc Bumaengc rui e. Mi rui lyanmei thu Ravguangc Guangcdic nangniw khou guang tangc the twmei tuang e.
29 "Hamh e thei kapumc tanhmei meic gaanv khat kai khou gutna kai nuam ni tw e thei, kapumc taanhmeipu ta tei karaklou rey mak e thei kakai gut ngam mak e. Karaklou rey tang khou rui kakai nuam nina de.
30 "Abiak liangh makpui mei tei ata howmumei e, khatni ai khuam kaduaimei khou kazauh makpui mei tei hac ganhmei nunc e 31 Mi zaeng rui ai rui nangniw khou sa tuang e: Meic nunc paap guay khatni Ravguangc ta sa kasicmeia guay tei kuaklou nuh de. Tiki Bumaengh ta sa kasicpui mei ta tei thu kuaklou mak e. 32 Meic Nac Mpouh ruc khou sina samei ta tei thu kuaklou nuh de, tiki Bumaengh Nthanmei ruc khou sina samei ta tei thu ntaw ni, guang nimei zuk thangc ni, kuaklou dat mak khe.
Kabang lev Kathai
33 "Kabang tei karav gay ti thei kathai gay the; kabangc tei karav si ti thei kathai si the. Kabang ta tei kathai khou tei rui thay the. 34 Nangniw nrui nac nunc! Nangniw sina akumhna gaymei lat sa ngam nina cho? Kalam thu lungning khou padikna naimei khou tei rui mwang rui sa pat tuang e. 35 Meicgaymeipu tei katuang gaymei lanvkai khou rui gaymei nrou pat e, khatni meicsimeipu tei katuang simei lanvkhuk khou rui simei nrou pat e.
36 "Ai rui nangniw khou sa tuang e: Latzan nungc kiu meicnunc rui sa zinza saloumei lat kathuic lam tei ni kaniw daw dat puni. 37 Kumna nang lat thei layna nang nchumh puni hamh e thei nkhuai puni."
Sw-nchinmei Lyanlou khang Samei
38 Khoutei mundawna Riakdanv tadin nunc khatni Pharisi nunc rui Jisu khou, "Dinhpouc, sw nchinmei taanv akhat taancloumei ta aniw kahaw e," twna sa the.
39 Khoutei mundawna kamei rui kaniw khou sa the, "Meicsimei khatni ravchap tat makmei mei nunc hei rui sw nchinmei ta phu e. Muhzwng Jona khou swlou kanmei sw nchinmei tei hamhna baihmei sw nchinmei lyanlou ni tu hamh e. 40 Jona tei khavdaih bung lungc khou zingbangc kathumh kalaanv kathumh bam kanmei tei kumcna, Meic Nac Mpouh hei zingbangc kathumh kalaanv kathumh kandih lungc khou bam puni. 41 Ntaw kin tuang mei nunc ta hei latzan sw pwkhou Ninevemei nunc thauna mi meickin ta hei nkhuaimei e twna sa puni; kalam thu kaniw thu Jona rui latdinc pwkhou lunghlaic kan the. Kumna zauc lo, Jona khang suangc daihmei mi khou hei bam e. 42 Mi meickin ta latzan swpui nungc kiu, dihba thangcmei liammav thauna mi meickin ta hei nkhuaimei e twna sa puni. Kalam thu kamei Guangh Solomon tuang ningting tei nking khang kamei kandih tin thangc rui guang khwan e. Kumna zauc lo, Solomon suangc daihmei mi khou hei bam e.
Simei Bumaengc Hanc Guang Datmei
43 "Simei bumaengc akhat meic gaanv khat khou rui tat pat lana, zaeng nthaekcloupui bamv khang phuna dui maekpui bamv khou ruan tat the, tiki phu tow mak pwkhou, 44 'Ai tat patmei akai khou tei hanc guang dat ni the' twna sa the. Kumna kamei guang pwkhou mi kai tei gey nthanlouna, lunghpui nanw lou chuy rih rina kai raeng ding bammei ta ariw the. 45 Khoutei kamei tat lana kakhang suangc simei bumaengc chanei ta nduangh guangna mi kai khou tei gut lungc the. Kumna mi pu tuang nkhamhmei lwnlung tei rey khou lwnlung khang tei suangc si the. Mi simei meickin khou hei ni mi hei kumcna guanglou puni."
Jisu Pui khatni Kachana nunc
46 Jisu rui meic kangdai khou tei lat sa bam khou, kapui lev kachana nunc kata kachuc niina kaizaeng khou ding bam khwan e. 47 Kumna meic gaanv khat rui kakhou, "Zauc lo, nang pui lev nang chana nunc nang ta kachuc niina kaizaeng khou ding bam e," twna sa the.b