13
Napphwn Nroumei Latgiam
1 Mi nungc tei Jisu mi kai khou tei rui tat pat lana Galili zeiclat paengc khou dungc key the. 2 Khoutei meic kangdai kadaeng khou huamc guang tikhou kamei hih akhat khou gutna dungc the, kumna meic kangdai tei dui paengc khou tei ding bam the.
3 Khoutei kamei latgiam swna lat mpeyna dinclouna sa the: "Zauc lo, lau taanhmeipu gaanv khat napphwn nrou khang tat pat the. 4 Kamei rui nrou pat khou, nap thw asaekc chaengluang khou keylou the, kumna nruayna nunc guangna mi tei khuaic tu kan the. 5 Baihmei asaekc rui niang geih makmei ntauh rou ding khou keylou the, kumna niang chalah tipui zaeng rui katumcna kak pat the. 6 Tiki neih suc pat pwkhou mi bwan nunc ta tei nggaan the, kumna kamaan zangc key ti makna, mi tei theic kan the. 7 Nap thw asaekc sauh bang ding khou keylou the, kumna sauh bang pang tei daic thauna zyn luai the. 8 Asaekc rui kandih gaymei khou keylou the, kumna kathai nthai the. Ngguay asaekc rui kathw phay khat, asaekc rui riakcharuk, asaekc rui tamruc nthai the.
9 "Nukuanc naimei kathuic chu kan diu."
Latgiam Swna Samei Lam
10 Khoutei kaziap nunc tei Jisu daeng khou guangna sa the, "Tabui swna nang kaniw khou latgiam swna sa tu cho?" 11 Khoutei kamei rui mundawna sa the, "Kalam kiu thu, Tingkauh Guangcdic tuang ntheihloumei tei nangniw thay khang dinclou tuang e, kaniw khou thu hamh e. 12 Kalam thu, asaekc naipui mei khang tei, liamh laihna nai khang tiilou puni; tiki khat sini maekpui mei khang tei thu, kakhou katitna naimei tei sini laa pat kan puni. 13 Kaniw howna howna how makpui zaeng rui, chuna chuna chu makpui zaeng rui, khatni kabah thay makpui zaeng rui, kaniw khou latgiam swna sa tuang e. 14 Muhzwng Isaia rui mi kumna dinc kasuakcloumei kaniw khou guang tangc the:
15 'Kaniw chuna chuna kabah thay mak puni;
Kaniw zaucna zaucna how mak puni.
Kalam thu kaniw lungning mpang the,
kaniw nu nkat ngam the,
khatni kaniw mik ni tiat ngam the,
hamh e thei kaniw mik rui how ni tuang e,
kaniw nu rui chu ni tuang e,
khatni kaniw lungning rui kabah thay ni tuang e,
kumna kaniw akhou hanc guangna,
ai rui kaniw ta tigaylou ni tuang e,'
16 "Nangniw thu adih sangay cho! Nangniw mik how the, nangniw nu chu the. 17 Ai rui nangniw khou kaling salou tuang e: muhzwng nunc khatni ravchaptatmei nunc mpeyna nangniw howmei hei how nii khwan e, tiki kaniw how tow kan mak khe khatni nangniw chumei hei chu nii khwan e, tiki kaniw chu tow kan mak khe.
Napphwn Nroumei Latgiam Kabac
18 "Mi zaeng rui, napphwn nroumei latgiam kabac hei nking o. 19 Guanghdic tuang latdyn hei chu laki kabah thay makpui mei khou tei rui kalungc khou nrouloumei lat ta tei simeipu rui guangna laa tat kan the. 20 Ntauh rou ding khou keyloumei thw kiu thu, lat tei chupuilev neihlana laaloupui mei tei e. 21 Tiki mi tei kalung syng khou laalou mak e, kumna mi tei tingsaengh mak e. Kumna lat zaeng rui ryanramei hamh e thei rai riumei guang pwkhou kamei mi tei mpat dat nuangc the. 22 Sauh bang ding khou keyloumei kiu thu, kamei lat tei chu the, tiki mi mbaanv tuang kadanmei khatni lanv ta kahawmei rui lat ta tei zyn luai the. Kumna lat tei kathai nthai mak khe. 23 Kandih gay khou keyloumei thw kiu thu, lat tei chu lana kabah thaypui mei ta tei e. Kaniw kathai nthai e—asaekc rui kathai phay khat, asaekc rui riakcharuk, khatni asaekc rui tamruc nthai e."
Napriak Latgiam
24 Jisu rui kaniw khou latgiam baihmei akhat sa dat e, "Tingkauh Guangcdic hei, mi hei kumh tuang e: Lau taanhmeipu gaanv khat rui kalaupuk khou gaymei kathw nroulou the. 1 25 Meic nunc zip kan khou, kata zauczihmei gaanv khat guangna gehu ding khou tei napriak thw nroulou ducna tat kan the. 26 Mi bang nunc tei thau patna kagwam ngguam pwkhou napriak tei how pat the.
27 "Khoutei kabangc nunc kaipouc khou tei guangna, 'Kaipouc, nang tuang laupuk khou gaymei kathw nroulou kan tu hamhna cho? Napriak bang nunc hei thu tabui thangc rui cho?' twna sa the. 28 Khoutei kamei rui kaniw khou sa the, 'Mi hei ata zauczihmei rui swlou tina the,' Khoutei bangh nunc tei rui, 'Kum e thei aniw tatna napriak bang guay tei phuai ganclou o cho?' twna thanv the. 29 Tiki, 'Phuai ganc nangh e, napriak bang phuai khou rui gehu bang ni phuai pat puni de,' twna daw the. 30 'Lau tay mak saanv thau kariu bam kan di tho. Mai ntei khang napriak guay tei khuam kaduaina bang rey tho, kumna gehu guay tei thu saemh khou laa guanglou tho,' twna lau tay pwkhou ai rui lau taymei nunc khou sa puni."
Gannaeng Thw Latgiam
31 Latgiam baihmei akhat ni Jisu rui kaniw khou sa dat e: "Tingkauh Guangcdic hei laupuk khou nrouloumei gannaeng thw tei kumh tuang e. 32 Mi thw tei ramh thw pang khou nthyam liangmei bamv khwan sini, mi tei thau pwkhou thu laupuk khou thaumei bang guay pang khou mi tei daic liangmei thing bang mbaih the. Kumna nruayna nunc rui kachy khou kabou guang dwan the."
Khay Latgiam
33 Baihmei latgiam ni Jisu rui kaniw khou sa the: "Tingkauh Guangcdic hei meicpui akhat rui zousunc giupaekc kathumh laa lana mi guay tei puang thau khang loumei khay tei kumh tuang e."
Jisu rui Latgiam Swna Samei Lam
34 Jisu rui meicnunc khou mi guay hei latgiam swna salou the; latgiam hamhna ramh baihmei kaniw khou sa mak e. 35 Mi hei,
"Ai rui kaniw khou latgiam sa puni,
kandih nai thau rap khou rui meic thay makmei tuang ai sa puni,"
twna muhzwng khou rui salou kanmei tei guang tangc khang the.
Napriak Latgiam Kabac Dinhmei
36 Jisu meic kangdai ta tei mpatlou lana kainung khou gut the. Khoutei kaziap nunc kadaeng khou guangna, "Laupuk khou napriak thaumei tuang latgiam kabac tei aniw khou dinclou o," twna sa the.
37 Khoutei kamei rui mundawna sa the, "Gaymei kathw nrouloumeipu tei Meic Nac Mpouh hei e. 38 Laupuk kiu mi kandic hei e; gaymei thw kiu guanghdic nac nunc hei e; napriak kiu simeipu nac nunc tei e. 39 Kata zauczihmei napriak nrouloumeipu kiu thu Ravsic e. Lau taymei ganv twmei kiu zuk luaimei ganv ta e; khatni lau taymei nunc kiu kauh baanchara nunc e. 40 Zuk luai pwkhou, napriak guay guay khuam kaduaina mai nteimei tei kumcna pat puni. 41 Meic Nac Mpouh rui katuang baanchara nunc ta ndiu pat puni, kumna kaniw rui meicnunc ta tiphaysuymei nunc khatni simei taanv taanhmei guay ta kaguangcdic khou rui khuam kaduai puni. 42 Kumna maikwam khou phaiclou puni. Mi khou kiu kaniw huc nkay ndyang kariakh riakna pui huay bam puni. 43 Mi ganv khou kiu ravchaptatmei guay neihmik kumcna kaniw Pu guangcdic khou gaanc puni. Kanukuanc naimei kathuic rui chu kan diu!
Ryloumei Lanv Latgiam
44 "Tingkauh Guangcdic hei laupuk khou phuplou bammei lanv kumhmei tuang e. Mi tei gaanv khat pu rui ariw pwkhou, kakuam binlou ducna, neihlana kakai tatna, katuang naimei guay zuanc lana, mi laupuk tei liu the.
Kaphut Latgiam
45 "Tingkauh Guangcdic hei lanvguanhmeipu akhat rui gaymei kaphut phumei kumh tuang ni e. 46 Kamei kamanv kunghmei kaphut akhat phu tow pwkhou, tat lana katuang naimei guay zuanc lana mi tei liu the.
Chiakc Phaihmei Latgiam
47 "Tingkauh Guangcdic hei duipui khou phaic gutna khav zaat guayna phaic binmei chiak tei kumh tuang e. 48 Chiakc tei padik pwkhou dui paengc khou zay patna, gaymei guay nggiuh khou khuaiclou the, tiki tu nuh makmei guay ndat ganc the. 49 Zuk luai pwkhou mi tei kumc puni. Kauh baanchara nunc patna ravchaptatmei pang khou rui meicsimei nunc ta kadah pat puni, 50 kumna maikwam khou phaiclou puni. Mi khou kiu kaniw huh nkay ndyang kariakh riakna pui huay bam puni.
Latdyn Thanh khatni Latdyn Guangc Thaymei Dinhpouc nunc
51 "Mi latgiam guay tuang kabac hei nangniw thay dai cho?" twna Jisu rui kaniw khou thanv tikhou, "Ngguay" twna kaniw rui daw the.
52 Kum tina kamei kaniw khou sa the, "Mi zaeng rui, Tingkauh Guangcdic khou ziap sw kanmei Riakdanv tadin nunc tei thu kakai lanvkai khou rui lanv thanh khatni lanv guangc laa pat bammei tei kumh tuang e."
Jisu ta Nazareth khou Laalou Makmei
53 Jisu mi latgiam guay hei salou tang lana, mi khou tei rui tat pat kan the. 54 Kumna karamc kaidai khou guang lana kaniw tuang sinagog khou nchamlou the. Khoutei kaniw ngakna, "Tabui thangc rui mi pu hei mi ningting khatni ngamv daihmei taanv taanhmei pumtan hei laa lana cho? 55 Mi pu hei thing taanv taanhmeipu nac tei hamh nah cho? Kapui Meri hamh nah cho khatni Jakob, Joseph, Simon, khatni Judas hei kachana nunc hamh nah cho? 56 Katanpui nunc ni aniu lungc nchamc bammei nunc hamh nah cho? Kum e thei, kamei mi guay hei tabui thangc rui laa lana cho," twna sa the. 57 Kumna kaniw kakhou phaysuy the.