6
Jisu ta Nazareth khou Laalou Makmei
1 Jisu mi khou tei rui tat patna karamc kaidai khou guang the. Khoutei kaziap nunc ni kathei lay guang the. 2 Kumna Sabbath guang pwkhou kamei rui sinagog khou nchamlou thau the. Khoutei nking bammei meic mpeyna ngakna sa the, "Mi pu hei mi guay hei tabui thangc rui laa lana cho? Kakhou tiiloumei hei akumhmei ningting lana cho? Mi kumhmei charynmei taanv kabaanc khou rui pat bammei hei! 3 Mi pu hei Meri nac khatni Jakob, Joses, Judas khatni Simon chana thing taanhmeipu tei hamhna cho? Katanpui nunc ni mi khou hei aniw lungc nchamc bam tu hamh na cho?" twna sana kaniw kakhou phaysuy the.
4 "Muhzwng ta hei kanamv nac, kakai kaikhwangmei khatni kakai kaikhunhmei hamhna chakhwang swlou mak mak e," twna Jisu rui kaniw khou sa the.
5 Kumna nnaumei gaanv saekc na ta kabaanc bouclouna tigayloumei hamhna, kamei mi khou tei charynmei taanv taanclou ngam kan mak khe. 6 Kaniw lwm ti makna kamei ngak the.
Jisu rui Kaziap Ruhna Kanei ta Ndiu Patmei
Kumna Jisu namv guay khou tat lianglouna nchamlou the. 7 Kumna kamei rui ziap ruhna kanei ta tei kadaeng khou kaw guangna gaanv nei gaanv nei ndiu pat the. Simei bumaengc ta nthau ganh khang kaniw khou ngamv tiilou the. 8 Kumna builwang na hamhna ramh baihmei—ntyan ni, khau ni, bungkam khou syan ni phungh riu; 9 tiki phaythuapc tuangcna thiula kanei nu makna tat o twna sa the. 10 Kamei rui kaniw khou sa the, "Tabui bui bamv khou pwni nangniw guanglou pwkhou, mi bamv khou tei rui tat pat dat mak saanv, kaibang kalaic rio. 11 Tiki nangniw ta laalou makmei khatni nangniw lat nkinglou makmei bamv khou tei thu, mi khou tei rui nangniw tat pat dat ni khou kaniw ruc khou sakhi khang nangniw phaypav niang kadiw keylou duc o."
12 Khoutei kaniw tat pat lana lunghlaic nina e twna dinc the. 13 Kumna ravsic mpeyna ta nthau ganclou the khatni nnaumei mpeyna ta thauh teylouna tigaylou the.
Duiluploumei John ta Swluaimei
14 Khoutei guangh Heroda Jisu pary chu the. Kalam thu Jisu zanc tat thau the. Khoutei, "Kamei hei Duilupmei John tei ringcthau dat lana di the, kum lana mi kumhmei charynmei taanv guay hei taanh khang pumtan nai lana the," twna meic gaanv saekc rui sa the.
15 Tiki baihmei gaanv saekc rui, "Kamei Elija de," twna sa the.
"Kamei muhzwng akhat e, rey nungc muczwng kumhmei akhat e," twna baihmei rui sa the.
16 Tiki mi tei Herod chu lana, "Mi hei ai kapy dangv kanmei John tei ringcthau dat lana di the," twna sa the. 17 Kalam thu kamei rui asut kawmei kachana Philip now Herodia zaeng rui Herod kamei rui John ta nymna kangkai khou bangclou khwan e. 18 Tabui cho tiki, John rui Herod ta, "Nang chana now ta kawmei hei kariak rui nuh mak e," twna sa bam tina e.
19 Kum tina Herodia tei John ta karaeng the, kumna kata swluai nii the. Tiki sw luaimei chaeng maekna bam khwan e. 20 Kalam thu John hei ravchaptatmei khatni nthanmei mei e twmei Herod thayna kata ping e. Kumna kata swluai mak khang gaekna lou bam khwan e. Herod tei John lat tei chu pwkhou ramh sw laa khang thay mak khe; tiki kalat nking niina nking bam khwan e.
21 Herod rui katuang ricmei nunc, khatni meic daihmei nunc khatni Galili tuang meicpy nunc ta kata puanhmei ngai khou napkaw pwkhou, kadouchamei tingmik guang khwan e. 22 Khoutei Herodia nacpuib gutna alaemh the, kumna Herod khatni kamei lev dungc nchamc bammei guay ta tei tipianlou the. Kum tina guangh tei rui mi nacpui khou tei, "Nang rui kahaw hawmei ney o, ai tii puni. 23 Nang rui ney neymei, atuang guangcdic kapaek nganv tii puni," twna kakhou latryan swlou the.
24 Khoutei mi nacpui tei tat patna, "Ai tabui ney kho cho?" twna kapui khou thanv the. Khoutei, "Duilupmei John py tei," twna kapui rui sa the.
25 Khoutei kamei kaluak kalat guangh daeng khou guangna, "Duilupmei John py syandaih kuak khou louna ntaw dyng khou akhou tiiloumei ta ai kahaw e," twna sa the.
26 Khoutei guangh tei kalung mpeyna kabiu the, tiki kalatryan khatni kamei lev dungc nchamc bammei nunc zaeng rui kamei piu mak ngam mak khe. 27 Kadyng khou guangh tei rui latdanv patna John py laa guang khang rihmei gaanv khat ta ndiulou the. Kumna kamei kangkai thangc tatna John py dangv the. 28 Kapy tei syandaih kuak khou puanc guangna tunapui khou tei tiilou the. Kumna kamei rui kapui khou tiilou the. 29 Khoutei John ziap nunc rui mi chamv tei chu lana guangna kaphouc laana tarou khou mbeihlou the.
Jisu rui Meic Ching Panguh ta Tituloumei
30 Khoutei Latdiutatmei nunc tei Jisu daeng khou guang kaduai dat the. Kumna kaniw rui taanclou kanmei khatni nchamlou kanmei guay kakhou raclou the. 31 Kum tina, meic mpeyna guangmei guang, tatmei tat twna meic padik bam tipui zaeng rui tu zangvpui ganv khang sini maek khe. Khoutei Jisu rui kaziap nunc khou, "Meic maekpui bamv thangc tat pat lana matak khat nthaekc tat kho," twna sa the. 32 Kumna kaniw rana meic maekpui bamv thangc hih tuangcna tat the.
33 Tiki kaniw tat kanmei ta tei meic mpeyna how the, kumna mi tei kaniw e twmei kaniw thay the. Khoutei kaidai guay khou rui meicnunc pak guangna kaniw suangc mi bamv khou tei guang bam hu the. 34 Kumna Jisu hih khou rui tat pat pwkhou, meic kangdai ta tei how the. Khoutei kamei kaniw ta ningngam mak khe. Kalam thu kaniw tei gaengcloumei maekmei lauziu nunc kumc the. Khoutei kamei rui lat mpeyna kaniw khou nchamlou the. 35 Kumna neih khyam key pwkhou kaziap nunc kadaeng khou guangna sa the, "Mi hei meic lungc makpui bamv de. Kumna ntaw thu tingzyn di the. 36 Kum thena mi gaengv zaengv khou naimei namv nunc khatni kaidai nunc khou hei tatna kaniw tu nuhmei puat liu tu tat kan khang kaniw ta ndiulou ti tho."
37 Khoutei Jisu rui, "Kaniw tu khang nangniw rui tii tio," twna sa the.
Khoutei, "Aniw tatna denarij phay nei tuang ntyan liuna kaniw ta titu tio twna cho?" twna kaniw rui daw the.
38 Khoutei, "Nangniw khou ntyan dwm azuh nai cho? Tatna zauc o," twna Jisu rui sa the.
Khoutei kaniw thay laa khou, "Ntyan dwm panguh lev khav kanei nai e," twna sa the.
39 "Kum e thei, meicnunc ta tei kakang kakang swna mphuaih ndiakcmei ruc khou tidungc tho," twna Jisu rui kaniw khou sa the. 40 Khoutei kaniw meic phay khat tuang khatni riakngu tuang kang kang, karian karian swna tidungc key the. 41 Kumna Jisu rui ntyan dwm panguh lev khav kanei tei laana tingkauh thangc zauc kuna suaihiam neylouna ntyan dwm guay tei by baklou the, kumna nzanh khang kaziap nunc khou tiilou the. Khav kanei tei ni kamei rui kaniw khang nzanhlou the. 42 Kaniw meic guayna tu ngguna tu the. 43 Kumna kaniw rui tu nsaekcloumei tyan khatni khav tei nggiuh ruhna kanei padikna khuam guang khwan e. 44 Mi ntyan twmei tei nggaanvmei ching panguh khwan e.
Jisu Dui Ruc khou Tatmei
45 Mi tangv meic kangdai ta tei kamei ndiu ganc bam kanmei dak khou kaziap nunc tei hih tuangcna Bethsaida thangc kaan pat hu khang Jisu rui ndiulou the. 46 Kamei kaniw ta ramnavloupui tangv, huayney khang chyng but thangc tat the. 47 Zingbangc key pwkhou, hih tei zeihlat chung khou bam khwan e. Mi khou tei Jisu karana ramkiang khou bam khwan e. 48 Khoutei mpwan kaniw hu biak rui nliu riu guang tina, kaniw hih hwan ryanra bammei ta how lana, Jisu laukhwan khwanpaengc kaniw daeng nzwannac dui ruc khou tat guang khwan e. Kamei kaniw ta tat kaan ni kumc guang khou, 49 kamei dui ruc khou tat bammei ta kaniw how lana mi tei mbuhrav di the twna ningna kauc thau the. 50 Mi tei kaniw meic guayna how the, kumna ping the.
Mi dyng khou tei Jisu rui, "Neihla o, ai de. Ping rio," twna sa the. 51 Kumna kamei kaniw daeng khou guangna hih khou tei ku the. Khoutei mpwan tei nchwng kan the. Mi khou tei kaniw khang ngak the. 52 Kalam thu ntyan dwm panguh tuang kabac tei kaniw thay mak khe; kaniw lungning ndy the.
Jisu rui Gennesaret khou Nnaumei ta Tigayloumei
53 Kaniw kaan patna, Gennesaret ramv khou guang the, kumna dui khuangc khou hih bangclou the. 54 Kaniw hih khou tei rui tat pat rappuilev Jisu e twmei kaniw thay lana, 55 meicnunc tei mi ramv kapwm khou tei pak liklouna, kamei mi khou tei bam e twmei chu chumei bamv khou nnaumei nunc ta puanc guang geic the. 56 Namv khou, kaidai khou, lau khou, kamei guangloupui bamv bamv khou nnaumei nunc ta kaithyan bamv khou louna kaniw katuang pheychuanh tin na sini kahi khang huaycha the. Kumna kahitowmei guay gay dat the.