10
Jisu rui Gaanv Riakchaneina Kaney ta Ndiu Patmei
1 Mi tangv, Poubauhmei rui baihmei gaanv riakchaneina kanei a ta kadah patna kamei guang nimei kaidai khatni namv guay khou gaanv nei gaanv nei ndiulou hu the. 2 Kumna Jisu rui kaniw khou sa the, "Lautay khang geic the, tiki tay nipui mei thu rau the. Mi zaeng rui lautay nipui meic ndiulou geic khang laupouc khou ney o. 3 Tat tho! Ai rui nangniw ta, lauziu nac nunc ta angiw pang khou ndiulou kumc ndiulou tuang e. 4 Khau, syankhau, khatni phaythuapc phungh rio; chaengkui khou meickai ta kachucna kaganv sw chanah tat rio.
5 "Nangniw gaanv khat kai khou gut pwkhou, reymei khou, 'Mi kai khou hei chuzaenghmei nai diu,' twna salou o. 6 Chuzaenghmei guanglou nuhpui mei, mi khou tei bam khwan e thei, nang rui tiimei chuzaenghmei tei kakhou nai bam kan ni the; kumh mak e thei, nang khou mi tei guang bam dat puni. 7 Nangniw khang kakai rui tii tiimei tei tu zangvna mi kai khou tei bam o. (Kalam thu taanv taanhpui mei thu kaphy laa biuc e); nangniw kaibang kalaic kalw tat rio.
8 "Nangniw kaidai akhat khou gut pwkhou, nangniw ta laalou e thei, nangniw khang tii tiimei tei tu o. 9 Mi khou tei nnaumei ta tigaylou tio, khatni 'Ravguangc Guangcdic nangniw daeng khou na guang the,' twna kaniw khou dinclou tio. 10 Tiki kaidai akhat khou nangniw guang pwkhou, nangniw ta laalou mak e thei, mi kaidai tuang chaengluang guay khou tatna, 11 'Aniw phay khou khuaploumei nangniw kaidai tuang niang nganv nangniw ruc khou sakhi khang kadiw keylou kan the. Tabui pwni Ravguangc Guangcdic na the twmei na thu thay o,' twna salou tio. 12 Ai rui nangniw khou sa tuang e; Latzan nungc kiu, mi kaidai ta tei suangc thu Sodom ta nzianlou kan ni de!
Lwm Makmei Kaidai nunc
13 "Khorazin, nang hei sansi e dav! Bethsaida, nang hei sansi e dav! Kalam thu nang ney khou taanclou kanmei charynmei taanv guay tei Tur lev Sidon khou taanclou bam khwan e thei, khaemseiphey piuna khatni mbut lowna theihdouc rui lunghlaic kan ni tuang di the. 14 Latzan nungc kiu nang ney ta suangc Tur lev Sidon ta nzianlou mbu kan ni de. 15 Kapernaum, nang ta tingpuk puanc ku tangclou puni twna ningna cho? Hamh e, nang ta taruaih khou zay keylou puni.
16 "Nangniw lat nkingmei nunc tei alat nking tu the; nangniw ta laalou makmei nunc tei ata laalou mak tu the; khatni ata laalou makmei nunc tei ata ndiu guangmeipu ta laalou mak tu the."
Riakchaneina Kaney tei Guang Datmei
17 Gaanv riakchaneina kanei b tei neihlana hanc guang datna, "Poubauhmei, nang zanc saanc pwkhou ravsic nunc nganv aniw kut gut the," twna sa the.
18 Khoutei Jisu rui kaniw khou sa the, "Seitan tingkauh thangc rui tingpalik kumcna taek key kanmei ta ai how the. 19 Nrui ta ni, ravga ta ni ni bin khang khatni zauczihmei ngamv guay ta ngam khang nangniw khou ngamv tiilou kan the. Ramh khat na rui sini nangniw ta kabiu lak e. 20 Tiki simei bumaengc nunc ta nangniw ngam the twna neihla nangh e, tiki nangniw zanc tingkauh thangc hylou the twna neihla o."
Jisu Neihlamei
21 Mi dyng khou tei, Jisu Bumaengh Nthanmei c paan rui neihlamei padikna sa the, "He, aPu, tingpuk kandih kaipouc, nang ta thuanc e, kalam thu nang rui mi guay hei ningtyng ntakmei nunc khou nkamhlouna alauc nunc khou lyanlou the. Ngguay, aPu, mi hei nang rui ningmei e.
22 "APu rui abaanc khou ramh guayna tiilou the. Pu na tei hamhna gaanv khat na sini Ka Nac Mpouh hei thow cho twmei thay mak e, khatni Ka Nac Mpouh lev Pu lam khou kakhou ndauhlou khang Ka Nac Mpouh hei rui kadahloupui mei na tei hamhna gaanv khat na sini Pu hei thow cho twmei thay mak e."
23 Khoutei Jisu kaziap nunc biak thangc karih patna kaniw khou na sa the, "Nangniw mi kumhmei hei how towmei hei nangniw sangay e! 24 Ai rui nangniw khou sa tuang e: muhzwng khatni guangh mpeyna ni nangniw howmei hei how nii khwan e, tiki kaniw how tow kan mak khe, khatni nangniw chumei hei chu nii khwan e, tiki chu tow kan mak khe."
Meic Gaymei Samariameipu Latgiam
25 Zauc lo, Riakdanv tadin gaanv khat dingthauna Jisu ta nchanvna, "Dinhpouc, ringcsuangmei laa khang ai tabui taanc nina cho?" twna sa the.
26 Khoutei, "Riakdanv khou tei tabui hylou bu cho? Mi khou tei nang akumhna pac tow bu cho?" twna Jisu rui sa the.
27 Mundawna kamei rui sa the, " 'Nang lungc kapwm rui, nang tuang ringhpaan kapwm rui, nang pumtan kapwm rui, khatni nang lungning kapwm rui Poubauhmei nang Racguangc ta nzian nina e,' khatni 'Nang kai kaining kaigeimei ta nang rana nang ta nzianmei kumcna nzian nina e,' twna hylou e."
28 Khoutei, "Nang daw nchumh the; mi tei sw tho, kumc e thei nang ringc puni the," twna Jisu rui daw the.
29 Khoutei karana kata ti-nzih nii lana, "Akai kaining kaigeimei kiu thow tei cho?" twna mi pu tei rui Jisu khou sa the.
30 Mi tei mundawna Jisu rui sa the, "Meic gaanv khat Jerusalem khou rui Jeriko thangc key the. Mi khou tei kwamtumei nunc baanc khou kamei keylou the. Kumna kaniw rui kaphey kabaan asut ngam the, kumna bailuai dunna ganclou ducna tat kan the. 31 Khoutei, amuh gaanv khat mi chaeng tei tat key nangc the, kumna kamei mi pu ta tei how lana chaeng naek akhat thangc ley tat kan the. 32 Mi tei kumc muaina Levimei gaanv khat ni kamei mi bamv khou tei guang pwkhou, mi pu ta tei how lana, chaeng naek akhat thangc ley tat kan the. 33 Tiki Samariameipu gaanv khat ni nggin keyna mi pu bamv khou tei key the. Kamei mi pu ta tei how pwkhou, kata ningngam mak khe. 34 Kumna kamei mi pu daeng khou tei guangna, kazam kazei khou thau khatni luairyn zouc lou the, kumna duamlou the. Kum lana, katuang takuanc khou tidungclouna ginbangvkai khou nduangh guangna kasiamruai swlou the. 35 Nthuanh thauna, denari kanei laa patna ginbangvkai kaipouc khou tiilouna, 'Kata hei zauclou bam khwan o; nang rui kakhou gut mbulou kanmei nai e thei ai guang dat pwkhou tiilou dat puni,' twna sa the.
36 "Mi nunc gaanv thumh khou hei, thow tei mi kwamtumei nunc baanc khou keyloumei pu tuang kaining kaigeimei e twna nang ning tu cho?"
37 "Kata nzianloumeipu tei the," twna Riakdanv tadin tei rui daw the.
"Nang ni mi tei kumcna taanc tho," twna Jisu rui kakhou kadylou the.
Jisu Martha lev Meri Kai khou
38 Jisu Kaziap nunc lev nggin tat bammei chaenglwan khou, namv akhat khou guang khou, kazanc Martha twna kawmeipui rui kata kakai khou tibangvlou the. 39 Kaswanrey Meri twna kawmeipui nai khwan e. Kamei tei Poubauhmei daeng khou dungcna kalat nking bam khwan e. 40 Tiki Martha thu siamruai sw khang tynna dwan manc bam khwan e. Khoutei kamei Jisu daeng khou guangna, "Poubauhmei, aswanrey rui taanv heizumei akhang na ganclou bammei hei nang thaylou makna cho? Ata nkhav khang kakhou salou o!" twna sa the.