11
Huayneymei Lam Dincloumei
1 Zaeng neih khat, Jisu kabamv akhat khou huayney bam khwan e. Kumna kamei huayney tangv pwkhou, kaziap gaanv khat rui, "Poubauhmei, John rui kaziap nunc khang nchamloumei kumcna, aniw khang ni huayney nchamlou o," twna Jisu khou sa the.
2 Khoutei Jisu rui kaniw khou sa the, "Nangniw huayney khou mi hei kumcna ney o:
'APu, nthanmei nang zanc ta chakhwang champouh sw diu.
Nang guangcdic guang diu.
3 Neih khat khang biuhmei taektw,
aniw khang tingmik kathuic tiilou o. a
4 Aniw khou nkhuailoumei guay ta,
aniw kuakloumei kumcna,
aniw paap guay kuaklou o.
Aniw ta nthiammei khou zaylou rio' "
Ney o, Tiilou Puni
5 Khoutei Jisu rui kaniw khou sa the, "Nangniw pam daeng thangc nangniw zipchwng tatna, 'Champanv, ntyan dwm kathumh na tiilou o, 6 apam akhat nggin guangna kakhang titu khang maekna the,' twna sa pwkhou, 7 'Ata sw katuakclou ri tho, kaikhamv mbangh tangna angana nunc ta zip nduangh bam di the. Ai thauna tii dat ngam mak khe,' twna kainung thangc rui daw nuh e. 8 Ai rui nangniw khou sa tuang e: mi pu tei rui kapam e twna thauna ntyan tei tii mak sini, kamei rui katun tancna ney bam timei zaeng rui thauna kakhang kage naimei guay tei tii puni.
9 "Mi zaeng rui, ai rui nangniw khou sa tuang e: Ney o, nangniw khang tiilou puni; phu o, phu tow puni; kaikhamv nchow o, nangniw khang laanclou puni. 10 Kalam thu neypui mei tei rui laatow e, phupui mei tei rui phu tow e; khatni kaikhamv nchowpui mei khang tei laanclou e.
11 "Pu nunc, nangniw khou nangniw nac rui khav ney pwkhou, khav phaan nrui tii puni dinah cho? 12 Hamh e thei, ruayduih ney pwkhou ravga tii puni dinah cho? 13 Kumna, meicsimei nangniw sini nangniw nac nunc khang gaymei puat tii thay e thei, tingkauh thangc bammei nangniw pw rui thu tabui swna kakhou neymei kathuic khang Bumaengh Nthanmei tiilou mak nina cho?"
Jisu khou Ravsic Beelzebul Gut the twna Samei
14 Jisu rui lat sa thay makmei ravsic ta nthau ganclou khwan e. Kumna ravsic tei tat pat kan pwkhou, lat sa thay makmeipu tei sa thay dat the. Khoutei meic kangdai tei ngak the. 15 Tiki kaniw pang khou gaanv saekc rui thu, "Ravsic guay tuang kapy Beelzebul b paan rui kamei rui ravsic nunc ta tei nthau ganh bam tuang de," twna sa the. 16 Khoutei sw nchinmei tuang tingkauh thangc rui tii key o, twna gaanv saekc rui kata nchanvna sa the. 17 Khoutei Jisu kaniw lungning tei thay lana kaniw khou sa the, "Kalangv patna khat khat ta swkasic khang swmei guangcdic tei mut puni, khatni kalangv patna khat khat ta swkasic khang swmei kaikhunc tei bow puni. 18 Mi tei kumcna Seitan rui karana kata swkasic khang sw e thei, akumhna kaguangcdic ding ngam nina cho? Ai Beelzebul c paan rui ravsic nunc ta nthau ganh tuang de twna nangniw rui sapui zaeng rui, mi hei sa tuang e. 19 Ai ravsic nunc ta Beelzebul d paan rui nthau ganh tuang e thei, nangniw nac nunc thu thow paan rui kaniw ravsic nunc ta nthau ganh tu cho? Kaniw rui nangniw ta latzan sw puni. 20 Tiki ai rui ravsic nunc ta nthau ganhmei hei Ravguangc pumtan paan rui e. Mi hei Ravguangc Guangcdic nangniw khou guang tangc tina the.
21 "Kapumc taanhmeipu rui rihpwan rihna piu nthuihna kakai tei gaek bam pwkhou, katuang lanv guay tei lunghgeih mak khe. 22 Tiki kakhang suangc taanhmeipu guangna kata ngam pwkhou, kamei lwm bammei katuang rihpwan rihna guay asut kan puni khatni kamei rui asut guangloumei guay tei ni laa kan puni.
23 "Athei lay makmei nunc tei ata zauczihmei nunc e, khatni ai gaengc guang bammei khou hei nkhavlou makmei nunc tei hac ganhmei nunc e.
Simei Bumaengc Gut Datmei
24 "Simei bumaengc meic gaanv khat khou rui tat pat lana, zaeng swloupui bamv khang ramvkaengv khou phu tat the; tiki phu tow mak khe. Khoutei, 'Ai ganclou kanmei akai thangc tei hanc guang dat ni the,' twna kamei ning the. 25 Kumna kamei guang dat pwkhou, kai tei gey nthan thiakh thiakna tanvna lou chuy rih rylou bammei ta how the. 26 Kumna kamei tat lana kakhang suangc simei bumaengc chanei ta kaw lana mi khou tei lungc the. Khoutei mi pu tuang nkhamhmei lwnlung tei reymei khang suangc si diangc the."
Sangay Dianghpui Mei
27 Jisu mi hei sa bam khou, "Nang ta puancloumei pui tei khatni nang ta puanc noucloumei pui tei sangaymei pui e," twna meic pang khou rui ntumei gaanv khat rui kauc the.
28 Tiki Jisu rui mundawna, "Sangay dianghpui mei kiu thu, Ravguangc lat hei chuna piupui mei tei de," twna sa the.
Jona khou Sw-nchinlou Kanmei Kumhmei tei
29 Meic kangdai geic guang tipui ganv khou, Jisu rui sa the, "Ntaw kin khou lungc bammei nunc hei meicsimei nunc e. Sw nchinmei taanclou khang kaniw rui sa e, tiki Jona khou swlou kanmei tei hamhna, baihmei swlou ni tu hamh e. 30 Kalam thu Jona tei Ninevemei khang sw nchinmei tuang sw kanmei kumcna, Meic Nac Mpouh hei ni mi meickin khang hei sw nchinmei tuang sw puni. 31 Mi meickin ta hei latzan swpui ganv khou Dihba thangcmei Liammav thauna, mi meickin hei nkhuai e twna sa puni. Kalam thu ningtyngmei Solomon lat nking khang kamei kandih tin thangc rui guang khwan e, kumna ntaw mi khou bammeipu hei Solomon suangc daihmei e. 32 Mi meickin ta hei latzan swpui nungc kiu, Ninevemei nunc thauna mi meickin hei nkhuai e twna sa puni. Kalam thu Jona rui latdinc pwkhou kaniw lunghlaic kan the, kumna ntaw mi khou bammeipu hei Jona khang suangc daihmei e.
Meic Pumc khang Maibungc
33 "Meic gaanv khat na sini thauhmai daanc lana nkamhlou mak e, hamh e thei nggiuh rui gum binlou mak e. e Tiki gutmei guay gaanhmei tei how khang kahyang khou dungclou e. 34 Mik hei meic pumc tuang maibungc e. Nang mik gay ti thei nang pumc kapwm gaanc kah ka e, tiki nang mik si ti thei nang pumc zingc zing e. 35 Mi zaeng rui nang lungc khou naimei gaanhmei tei zingh mak khang sw o. 36 Mi zaeng rui, nang pumc khou zinghmei bamv maekna kapwmna gaanc kah ka e thei, thauhmai riw rui nang ta tigaancloumei kumcna, nang pumc kapwm gaanc puni."
Jisu rui Pharisi khatni Riakdanv Tadin nunc ta Luhmei
37 Jisu lat sa tangv pwkhou, Pharisi gaanv khat rui kata nap tu nchamclou khang kaw the. Kumna kamei guangna dungc key khwan the. 38 Nap tu ni khou Jisu kabaanc khiu makmei ta Pharisi tei howna ngak the.
39 Khoutei Poubauhmei Jisu rui kakhou sa the, "Nangniw Pharisi nunc- nkuakc khatni buangh guay thu kapaengc thaemc nthan chuy the, tiki nangniw lungc khou thu agaemvmei khatni simei rui padik e. 40 Mpangmei nunc! Kapaengc kasiamhloumeipu tei rui kalungc ni kasiamhlou tu hamh nah cho? 41 Nangniw tuang nkuakc khatni buangh lungc khou naimei guay tei tu zangv khang maekmei nunc khang tii tio. Kum e thei ramh guayna nangniw khang nthan puni.
42 "Pharisi nunc, nangniw sansi e dav! Kalam thu kadam ruh tuang thu riangtu, maruai, gannuy paannu tuang nganv tii lana nchumhna taanhmei khatni Ravguangc ta nzianmei khou thu ntaemv the. Nangniw kadam ruh tuang tiimei tei ni, nchumhna taanhmei lev Ravguangc ta nzianmei tei ni nchamcna ngaek ni tuang e.
43 "Pharisi nunc, nangniw sansi e dav! Kalam thu nangniw Sinagog khou bamvdaih dungc nii e khatni charuangc khou meicnunc rui kalumloumei ta laa nii e. 44 Nangniw hei sansi e dav! Kalam thu nangniw hei, tarou e twmei thay lamc makna karuc khou meicnunc kaluih tat bammei tarou nunc tei kumc e."
45 Khoutei, "Dinhpouc, nang mi kumcna sa bammei hei rui aniw zaw ni swkasic the," twna Riakdanv tadin gaanv khat rui sa the.
46 Khoutei Jisu rui kakhou sa the, "Riakdanv tadin nunc nangniw ni sansi e dav! Kalam thu nangniw rui meicnunc ta kaniw phungc tat lakmei puatphung tiphungclouna, mi tei nangniw baanc zung akhat na rui sini kahilou mak e.
47 "Nangniw sansi e dav! Kalam thu nangniw pupouc nunc rui swluai kanmei muhzwng nunc tuang tarou guay tei nangniw kasiamh e. 48 Mi zaeng rui, nangniw hei, nangniw pupouc nunc rui taanc kanmei tei thaymei nunc khatni kaniw taanv ta kazuanloumei nunc e. Muhzwng nunc ta kaniw swluai the, nangniw rui kaniw tuang tarou kasiamh the. 49 Mi zaeng rui, 'Ai rui kaniw khou muhzwng nunc khatni Latdiutatmei nunc ndiulou puni, kumna kaniw rui kaniw gaanv saekc ta swluai puni khatni gaanv saekc ta rai puni,' twna Ravguangc Ningting rui sa the. 50 Mi hei mbaanv damclou khou rui keylou kanmei muhzwng guay tuang zei manv tei mi meickin khou keylou khang e— 51 Abel khou rui thauna, ravchabamv lev Nthanmei bamv kak khou swluai kanmei Zekaria nganv tuang zei manv tei keylou khang e. Ngguay, ai rui nangniw khou sa tuang e: Mi guay tuang hei mi meickin ruc khou keylou puni the.
52 "Riakdanv tadin nunc, nangniw sansi e dav! Kalam thu thay nimei tuang khamvtaan tei nangniw laa kan the. Nangniw ni gut mak e, gut nimei nunc ta ni nangniw rui sw khamv e."