7
Meickai ta Latzan Sw Riu
1 "Nangniw ta ni latzan sw mak khang, nangniw meickai ta latzan sw riu. 2 Kalam thu nangniw rui meickai ta swmei latzan tei rui nangniw ta ni sw dat puni, khatni nangniw rui ndatmei dath tei rui nangniw ta ni ndat dat puni. 3 Tabui swna nangniw mik khou naimei thing dangv ta tei kakhanh makna nangniw chana mik khou naimei nrouc ta tei how bam tu cho? 4 Nang mik khou thing dangv nai lana, nang chana khou 'Nang mik khou nrouc naimei tei laa ganclou pumc e' twna nang akumhna sa ngamna cho? 5 Kakheswmei nang, nang mik khou naimei thing dangv tei laa ganc rey o, kumc e thei nang chana mik khou naimei nrouc tei laa ganh khang nang mik how nthan puni.
6 "Nthanmei puat tei si nunc khang tii riu; karih patna nangniw ta nkay puni, khatni nangniw tuang kaphut tei guak kui nunc hu khou phaiclou riu; kaniw rui mi tei ni binna nangniw ta sow puni.
Ney o, Phu o, Nchow o
7 "Ney o, tii puni; phu o, mphang puni; kaikhamv nchow o, laanclou puni. 8 Kalam thu, neymei kathuic laatow e, phumei kathuic phu tow e, kaikhamv nchowmei kathuic khang laanclou puni. 9 Kanac rui ntyan ney tina ntauh tii nimei thow naina cho? 10 khatni khav ney tina nrui tii nimei thow naina cho? 11 Kumna meicsimei nangniw sini nangniw nac nunc khang gaymei puat tii thay e thei, tingkauh thangc bammei nangniw Pu rui thu, mi khang suangc mbuna, kakhou neymei kathuic khang gaymei puat tii pu lak nah cho?
12 "Mi zaeng rui, nangniw khou swlou pw tu laa niimei tei nangniw rui meicnunc khou swlou tio. Riakdanv khatni muhzwng nunc tuang latdyn kiu mi hei the.
Nrummei Chaengmun
13 "Nangniw nrummei chaengmun khou gut o. Kalam thu maanmei khou zaylou nimei chaengmun tei thu ha e, kachaeng ni daic e. Kumna mi khou tei gutmei meic geic e. 14 Tiki ringhmei khou zayloumei chaengmun tei nrum e, kachaeng ni nthyam e, kumna mi tei laatowmei meic rau e.
Kabang khatni Kathai
15 "Guatmei muczwng nunc khou rui ramhthay o; kaniw tei lauziu gic runna nangniw khou guang e, tiki kalungc khou thu nrammei angiw nunc e. 16 Kaniw thai khou rui nangniw rui kaniw ta thay puni. Sauh luai khou rui luairyn thai nthai mak e; raengtaw sauc bangc khou rui tadut thai nthai mak e. 17 Mi tei kumcna, karav gaymei bang rui kathai gaymei nthai e; karav simei bang rui kathai simei nthai e. 18 Karav gaymei thing bang rui kathai simei nthai mak e; karav simei thing bang rui ni kathai gaymei nthai ngam mak e. 19 Kathai gaymei nthai makmei thing bang guay ta tei gay bauna mai khou phaiclou e. 20 Mi kumna, kaniw ta tei kaniw thai khou rui nangniw thay puni.
Ai Nang ta Thai Mak e Tw Nimei
21 "Ata, 'Poubauhmei, Poubauhmei' twna kawmei kathuic tei Tingkauh Guangcdic khou gut rap ni tu hamh e; tiki tingkauh thangc bammei apu rui ningmei khou tatmei kamei na tei rui gut khang de. 22 Mi nungc kiu meic mpeyna rui 'Poubauhmei, Poubauhmei, aniw nang zanc khou ravmundinc kan tu hamhna cho, nang zanc khou ravsic nunc ta nthau ganc kan tu hamhna cho, khatni nang zanc khou charynmei taanv mpeyna taanc kan tu hamhna cho?' twna sa puni. 23 Mi khou kiu, 'Ai nangniw ta thay mak e, nangniw latliammei nunc, akhou rui tat kan o' twna ai rui kaniw khou sa puni.
Ningtyngmei khatni Mpangmei
24 "Mi zaeng rui, alat guay hei chuna piupui mei tei ntauh ruc khou kakai swmei ningtyngpui mei tei kumhmei tuang e. 25 Ting bun keyna dui daic key the, pwanzingh guangna kai ta tei guang thui the; tiki kai tei bow mak e, kalam thu mi tei ntauh ruc khou lingclouna swlou the.
26 "Tiki alat guay hei chu lana piu makpui mei tei thu sypung ruc khou kakai swmei mpangpui mei tei kumhmei tuang e. 27 Ting bun keyna dui daic the, pwanzingh guangna mi kai ta tei thui the. Mi kai tei pun kasicna pun kan the."
Jisu Ngamv