6
Lungcsimei khang Tiimei
1 "Nangniw tuang ravchaptatmei taanv tei meicnunc rui how khang taanc lyan mak khang ramhthay o. Mi kumcna taanc e thei, tingkauh thangc bammei nangniw Pu khou rui nangniw swan laatow ni tu hamh e.
2 "Lungcsimei nunc khang nang rui tii patpui ganv khou, kakheswmei nunc rui meicnunc rui thuanclou pw khang sinagog khou khatni chaengdai khou sw lyanmei tei kumcna nang sw riu. Ai rui nangniw khou kaling salou tuang e: kaniw tuang swan kaniw laa tang the. 3 Nang rui lungcsimei khang tiipui ganv khou, nang tuang nzat baanc rui tiimei tei mbai baanc ta tithay rio; 4 nang rui tiimei tei meic baihmei khou tithay khang hamh e. Kum pwkhou, meic thay makna taanhmei tei thaymei nang Pu rui nang khang swan tii puni.
Huayneymei
5 "Nangniw huayneypui ganv khou, kakheswmei nunc tei kumh riu; kalam thu kaniw tei meicnunc rui how khang sinagog khou khatni meic geihmei chaengdai kwn kwn khou dingna huayney nii e. Ai rui nangniw khou kaling salou tuang e: Kaniw tei kaniw tuang swan laa tang the. 6 Tiki nang huayneypui ganv khou, nang kai lungc khou gutna kaikhamv mbanghlouna, mik rui how makmei nang Pu khou huayney o. Kum pwkhou, meic thay makna taanhmei ta howmei nang Pu rui tiilou puni.
7 "Kumna nangniw huayney khou, Jentailmei nunc rui kabah maekmei lat kaluaih kaluaihna suaic bammei tei kumcna sw riu; 8 kalam thu nangniw ney mak khou rui nangniw khang kage naimei tei nangniw Pu rui thay rey bam tuang de.
9 "Mi zaeng rui, mi hei kumcna huayney o:
'Tingkauh thangc bammei aniw Pu,
nang zanc nthanmei sw diu;
10 Nang guangcdic guang diu,
tingkauh thangc kumc kandih khou ni,
Nang ningmei sw diu.
11 Aniw khang neih khat khang biuhmei taektw aseica tiilou o.
12 Aniw rui aniw khou nkhuailoumei nunc khuay kuakloumei kumcna,
aniw khuay kuaklou o.
13 Aniw ta nthiammei khou zaylou rio,
tiki simeipu khou rui gulou o.' b
14 "Kalam thu meicnunc rui nangniw khou nkhuailoumei tei nangniw rui kuaklou e thei, tingkauh thangc bammei nangniw Pu rui ni nangniw khuay kuaklou puni. 15 Tiki nangniw rui meicnunc khuay kuaklou mak e thei, nangniw Pu rui ni nangniw khuay kuaklou lak e.
Munthianghmei
16 "Nangniw munthiangh khou, kakheswmei nunc kumcna nchung suipui lwn sw rio. Kalam thu kaniw munthiangc e twmei meicnunc thay kan khang kaniw sw e. Ai rui nangniw khou kaling salou tuang e: Kaniw thu kaniw tuang swan laa tang the. 17 Tiki nang munthiangh khou, nang py thauh tey o khatni nang zaw phi o. 18 Kum pwkhou, nang munthiangc e twmei meicnunc khou lyan makna, tiki mik rui how makmei tingkauh thangc bammei, meic thay makna taanhmei guay howmei nang Pu rui nang taanv thai tiilou puni.
Tingkauh thangc Lanv Rymei
19 "Nangniw nthumc rui, sauhmei rui, khatni kaihouhmei rui swmaanpui bamv mi kandic khou hei nangniw khang lanv ry rio. 20 Tiki nthumc rui, sauhmei rui, khatni kaihouhmei rui swmaan dat makpui bamv tingkauh thangc nangniw khang lanv ry o. 21 Kalam thu nang tuang lanv naipui bamv khou tei nang lung ni nai puni.
Meic Pumc tuang Thaucmai
22 "Mik hei meic pumc tuang thaucmai e. Nang mik gay ti thei nang pumc kapwm gaanc kah ka puni. 23 Tiki nang mik si ti thei nang pumc kapwm zingh zing puni. Mi tei kumcna nang khou naimei gaanhmei tei zingc e thei nang pumc tei adih zingc puni thah!
Ravguangc khatni Lanv Bangc
24 "Meic gaanv khat na sini kaipouc kanei bangc sw nuh mak e. Kamei rui gaanv khat ta nzian e thei, gaanv khat ta karaeng puni. Hamh e thei gaanv khat ta kungc e thei, gaanv khat ta ntaemv puni. Nangniw syan lev Ravguangc bangc sw kariu nuh mak e.
25 "Mi zaeng rui nangniw khou sapui tuang e: Nangniw ringh khang tu zangv khang khatni nangniw pumc khang nsuay mbaanv khang lungh katuakc bam rio. Ringhmei hei taektw khang suangc nthuk mak nah cho khatni meic pumc hei pheybaan khang suangc nthuk mak nah cho? 26 Kauh samhmei nruayna nunc ta tei zauc o. Kaniw nap lingh mak e, lau tay mak e, saemh naina ni lou mak e; tiki tingkauh thangc bammei nangniw Pu rui kaniw ta titu nggu bam e. Nangniw thu nruayna khang suangc kunghmei hamh nah cho? 27 Thow tei lungh katuakcmei rui kapanty chowbuk akhat na sini tisaengcc ngammei naina cho?
28 "Tabui swna nangniw pheybaan khang lungh katuakc bam tu cho? Ramvpuk khou thau bammei mwnpwang guay ta tei kakhanh zauc o. Kaniw phey langh taanh mak e. 29 Tiki ai rui nangniw khou samei tuang e: hymdaihmei Guangh Solomon sini mi pwang tei kumcna karuh tangc kan mak e. 30 Aseic na thaulouna nthuanh mai khou phaiclou kan nimei bang ta sini Ravguangc rui mi kumcna karuhlou e thei, he lwmmei nthyammei thiu, mi khang tei suangc nangniw ta thu mbuna karuhlou pw lak nah cho?
31 "Mi zaeng rui, 'Aniu tabui tu nina cho?', 'Tabui zangv nina cho?', hamh e thei 'Tabui nsuay mbaanv nina cho?' twna lungh katuakc bam rio. 32 Jentailmei nunc mi guay ta hei phu e. Mi guay hei nangniw khang kage nai e twmei tingkauh thangc bammei nangniw Pu rui thay e. 33 Tiki Ravguangc Guangcdic khatni katuang ravchaptatmei tei phu rey o, kumc e thei mi guay hei ni nangniw khang tii puni. 34 Mi zaeng rui nthuanh khang lungh kadan rio; kalam thu nthuanh rui nthuanh khang kadan puni. Tingmik akhat tuang kadanmei tei mi tingmik khang tei biuc the."