5
Sangaymei nunc
1 Jisu rui meic kangdai ta tei how lana, luanghbut khou ku the, kumna kamei dungc key kan pwkhou, kaziap nunc kadaeng khou guang the. 2 Khoutei kamei rui kaniw khou nchamlouna sa the:
3 "Bumaengh khou lungcsimei nunc tei sangaymei nunc e;
Tingkauh Guangcdic hei kaniw khang e.
4 Zaengsi bammei nunc tei sangaymei nunc e;
kaniw ta swmlou puni.
5 Lungh niamhmei nunc tei sangaymei nunc e;
kandih hei kaniw laa puni.
6 Ravchaptat khang ndaepc tari bammei nunc tei sangaymei nunc e;
kaniw ta tipianlou puni.
7 Zauzianthaymei nunc tei sangaymei nunc e;
kaniw ta nzianlou puni.
8 Lungh nthanmei nunc tei sangaymei nunc e;
kaniw Ravguangc ta how puni.
9 Chaguatpouc nunc tei sangaymei nunc e,
kaniw Ravguangc nac sw puni.
10 Ravchaptatmei khang raimei khaengv bammei nunc tei,
sangaymei nunc e;
Tingkauh Guangcdic hei kaniw khang e.
11 "Azaeng rui luh kasicloumei, rai riumei khatni simei nkham ndamloumei ariwmei nunc tei sangaymei nunc e. 12 Neihla o khatni zaenggay o, kalam thu tingkauh thangc nangniw swan daic e. Nangniw hu khou lungclou kanmei muhzwng nunc ta ni mi tei kumcna sw kanmei tuang e.
Ntey khatni Gaanhmei
13 "Nangniw hei kandihmei khang ntey e. Tiki ntey tei nsamv kan e thei, akumhna mi ta tei tibumc dat nina cho? Mi tei ganclouna phay rui ni bin khang hamhna ramh baihmei khat na khang sini gaeng dat mak khe.
14 "Nangniw mbaanv khang gaanhmei e. Chyngbut ruc khou naimei kaidai tei nkamh ngam mak e. 15 Meic nunc rui maibungc daanclouna kainung kapwm tigaanclou e. 16 Mi tei kumcna, nangniw riw meicnunc hu khou tigaanc o. Kum pwkhou nangniw tuang gaymei taanv tei kaniw how lana tingkauh thangc bammei nangniw Pu ra hymthuanh khang e.
Riakdanv Ti-nthuihloumei
17 "Ai hei Riakdanv khatni muhzwng nunc rui saloumei tei swmaan khang guang tuang e twna ning rio; mi tei swmaan khang ai guang tu hamh e, ti-nthuihlou khang de. 18 Ai rui nangniw khou kaling salou tuang e: Riakdanv khou hyloumei kapwmna tei tiguang tangc nthuih mak saanv, a mi khou tei hyloumei kahiak launa sini, tingpuk kandih maan mak saanv, maan ni tu hamh e. 19 Latdanv guay tuang nthyam liangmei latdanv akhat tei sini ngaek makpui mei khatni piu mak khang nchamloupui mei ta tei Tingkauh Guangcdic khou nthyam liangpui mei kaw puni, tiki mi latdanv guay tei piuna khatni nchamlouna bampui mei ta tei Tingkauh Guangcdic khou meic daihmei kaw puni. 20 Mi zaeng rui, ai rui nangniw khou sa tuang e: nangniw tuang ravchaptatmei tei Pharisi nunc khatni Riakdanv tadin nunc tuang suangc mbu mak e thei, nangniw Tingkauh Guangcdic khat sini gut ni tu hamh e.
Meicdowmei
21 " 'Meicdow lak nina e, meicdowmei ruc khou latzan nai e,' twna reydouc pupouh nunc khou salou kanmei tei nangniw thay the. 22 Tiki ai rui nangniw khou sa tuang e, kachana ruc khou lunghpuamhpui mei b ruc khou latzan nai e. Kachana ta 'Raka' twna kawpui mei ta tei pei khou zay guang puni, khatni 'Nang mpangmei' twna sapui mei tei maikwam key puni. 23 Mi zaeng rui, nang tuang puatkat katlou khang nang ravchabamv khou guang bam khou, nang chana rui nang ruc khou lungh nuancloupui tuang naimei tei ningtow e thei, 24 nang tuang puatkat tei ravchabamv mav khou tei lou ducna nang chana daeng thangc tatna kamei lev guatcsw rey o; mi tangv rui nang tuang puatkat tei guang kat dat o.
25 "Thowkumhmei rui nang ruc khou latzankai khou lat phungclou e thei, latzankai ku tangh mak khou katumcna kamei lev guatc sw dat o. Hamh e thei, nang ta latzanpouc khou tiilouna, latzanpouc rui rigaanv khou tiilouna nang ta kangkai khou gut lou puni. 26 Ai rui nang khou kaling salou tuang e: Nkhamhmei syankangh paek tei nganv tii ti mak saanv nang mi khou tei rui pat dat ni tu hamh the.
Lungcmaanvmei
27 " 'Lungcmaanv lak nina e' twna samei tei nangniw thay the. 28 Tiki ai rui nangniw khou sa e: Ntumei akhat ta nthahmei mikzaw rui zauhpui mei tei kalung khou mi pui tei lev lungcmaanv tang the. 29 Mi zaeng rui, nang tuang nzat mik rui nang ta paapc tisw e thei, mi tei lat ganc o. Nang pumc kapwm tei maikwam khou phaicloumei suangc nang pumc nanw akhat maan kanmei tei rui nang khang gay e. 30 Nang tuang nzat baanc rui nang ta paapc tisw e thei, mi tei dan ganc o. Nang pumc kapwm maikwam tatmei suangc nang pumc nanw maanmei tei rui nang khang gay e.
Nowtaanmei
31 " 'Thow pwni nowtaan e thei, nowtaanmei latrik hyna kanow khang tii nina e,' twna ni sa e. 32 Tiki ai rui nangniw khou sa e: Lungcmaanvpui zaeng rui hamhna, nowtaanpui mei tei kanow ta lungcmaanv khang tiswlou e, kumna taanloumeipui ta tei kaw datmeipu tei ni lungcmaanvmei e.
Latryan Swmei
33 " 'Nang saraemcna latryan sw lak nina e, nang rui Poubauhmei khou swlou kanmei latryan tei ngaek nina e,' twna reydouc pupouh nunc khou salou kanmei tei nangniw thay the. 34 Tiki ai rui nangniw khou sa e: Nangniw syangdyng ding lak nina e. Tingkauh ta zay saancna ni ding riu, mi hei Ravguangc tuang guanghbamvpaeng e; 35 kandih ta ni zay saancna ding riu, mi hei kaphayba bamv e; Jerusalem ta ni zay saancna ding lak nina e, mi hei Guangh Daihmei tuang kaidai e. 36 Nang py ta zay saancna ni syangdyng ding lak nina e, nang rui nang sam lu akhat na ta sini sw mphwan ni sw mphwan ngam mak, sw miw ni sw miw ngam mak e. 37 'Kum ni' tw e thei 'kum ni' twna taan o; 'kum lak e' tw e thei 'kum lak e' twna taan o. Mi khou rui twanmei guay tei simeipu khou rui e.
Khwm Khanghmei
38 " 'Mik akhat khang mik akhat, huh akhat khang huh akhat' twna samei tei nangniw thay the. 39 Tiki ai rui nangniw khou sa e: Meicsimei ta akhangv riu. Nang biangc nzat biak kaphi pw e thei, mbai biak ni nzuhlou tio. 40 Nang ta latzankai khou phungc kuna nang tuang thiula asut khang sw pw e thei, kakhang nang tuang phey ni tii tio. 41 Nang ta mail akhat tat khang nym zay pw e thei, kamei lev mail kanei tatlou tio. 42 Nang khou ney pw e thei tii tio, pou khang ney pw e thei tipoulou tio.
Nzianmei
(Luk 6.27-28, 32-36)
43 " 'Nang tuang kaining kaigeimei ta nzian nina e, nang ta zauczihmei ta karaeng nina e,' twna samei tei nangniw thay the. 44 Tiki ai rui nangniw khou sa e: Nang ta zauczihmei ta nzian nina e khatni nang ta swkasicpui mei khang tei huayneylou nina e. 45 Mi hei kumcna nangniw tingkauh thangc bammei nangniw Pu nac nunc sw khang e. Kalam thu kamei thu meic simei khou ni gaymei khou ni katuang neicmik tisouclou e, ravchaptatmei khou ni, ravchap tat makmei khou ni ting tiriulou e. 46 Nangniw ta nzianmei ta na nangniw nzian e thei, nangniw khang tabui swan naina cho? dihkhav kakhamei nunc sini kaniw ta nzianmei ta thu nzian muai de. 47 Nangniw chana ta na nangniw zaw gaanc riu e thei, meic baihmei suangc nangniw tabui mbu tuang naina cho? Jentailmei nunc ni mi tei thu sw muai de. 48 Tingkauh thangc bammei nangniw Pu nthuihmei kumcna nangniw ni nthuih nina e."