19
Nowtaanmei Lam Dincloumei
1 Jisu mi guay hei salou tang lana Galili mpatlouna Jordan paengc thangc Judia tuang ramvrei lungc khou gut the. 2 Khoutei meic kangdai kathei lay the, kumna mi khou tei kaniw ta tigaylou the.
3 Khoutei Pharisi nunc guangna kata nchanvna, "Nggaanvmei rui kanow ta ramh lam akhat zaeng rui taan khang Riakdanv rui nuh daih?" twna thanv the.
4 Jisu rui mundawna sa the, "Puakthau puaksiak khou rui Damhmeipu rui kaney ta nggaanvmei khatni ntumei swna damclou the twmei nangniw pah mak he nah cho? 5 Khoutei Ravguangc rui sa the, 'Mi zaeng rui nggaanvmei rui kapui kapu ta mpatlouna kanow lev guang kariu nina e, kumna kaney pumh akhat sw nina e.' 6 Mi zaeng rui kaney tei kanei hamh the, pumh akhat di the. Mi zaeng rui Ravguangc rui zaykariulou kanmei tei maansei rui sw ntamv dat nuh mak khe."
7 Kaniw rui Jisu khou sa the, "Mi kumc e thei tabui swna now taan latryan hyna tii e thei taan nuh e twna Mousi rui sa tu cho?"
8 Jisu rui kaniw khou mundawna sa the, "Nangniw nowtaan nuh khang Mousi rui nuhloumei tei thu nangniw lung tanc langv tipui zaeng rui e; puakthau puaksiak khou thu mi kumh mak e. 9 Ai rui nangniw khou samei thu: lungcmaanvpui zaeng rui hamhna kanow ta taan lana meic baihmei ta kaw datmei kamei tei lungcmaanvmei e."
10 Kaziap nunc tei rui kakhou sa the, "Nggaanvmei khang mi kumhmei nai e thei, now kaw makmei rui gay the cho!"
11 Khoutei Jisu rui kaniw khou sa the, "Ai ntaw samei hei meic katana kabah laa thay ni tu hamh e, kabah thay khang Ravguangc rui tiiloupui mei na tei rui laa thay khang de. 12 Now kaw makmei lam mpeyna nai e: gaanv saekc rui kapui bungpuak khou rui nggaanvmei paek pat makmei nai e, gaanv saekc rui kapumc siammei nai e, gaanv saekc rui Tingkauh Guangcdic khang nggaanvmei chwn ganhmei nai e. Mi kabac hei laa thay thaymei rui laa la tho."
Jisu rui Alauc nunc ta Suaihiamloumei
13 Mi tangv, kaniw py khou kabaanc bouclouna huayneylou khang alauc nunc ta meicnunc rui Jisu daeng khou laa guang khwan e. Khoutei ziap nunc tei rui meicnunc ta tei luh the. 14 Khoutei, "Alauc nunc tei adaeng khou guang kan diu, kaniw ta khaem riu. Kalam thu Tingkauh Guangcdic hei mi kumhmei nunc khang e," twna Jisu rui sa the.
15 Khoutei Jisu rui kaniw py khou kabaanc bouclouna tat kan the.
Lungcgaymei Chabwan Gaanv Khat
16 Khoutei meic gaanv khat Jisu daeng khou guangna, "Dinhpouc, ringcsuangmei laa khang ai tabui gaymei taanc nina cho?" twna thanv the.
17 Jisu rui kakhou sa the, "Tabui swna nang akhou gaymei lam khou thanv bam tu cho? Gaymei gaanv khat nai e; nang ringhmei khou gut nii e thei katuang latdanv guay piu o."
18 "Tabui latdanv tei cho?" twna kamei rui thanv the.
Khoutei Jisu rui sa the, "Nang meic dow lak nina e, Nang lungcmaanv lak nina e, Nang kaihouc lak nina e, Nang saraemhmei sakhi tii lak nina e, 19 Nang pui nang pu ta chakhwang sw nina e, Nang tuang kaining kaigeimei ta nang rana nang ta nzianmei kumcna nzian nina e twmei guay hei the."
20 "Mi guay hei thu ai piu the. Ai tabui nthuih mak tuang nai bu heh cho?" twna mi pu tei rui sa the.
21 Khoutei Jisu rui kakhou sa the, "Nang nthuih nii e thei, tat lana nang tuang naimei guay tei zuanc lana lungcsimei khang tii tio. Kum e thei tingkauh thangc nang tuang lanv nai puni. Kumna guangna athei lay o."
22 Mi chabwanpu tei mi tei chu la khou, neihla makna tat kan the. Kalam thu katuang lanv mpeyna nai khwan e.
23 Khoutei Jisu rui kaziap nunc khou sa the, "Ai rui nangniw khou kaling salou tuang e: Lungcgaymei thu Tingkauh Guangcdic gut khang kungc puni. 24 Ai rui nangniw khou sa dat e: Lungcgaymei rui Ravguangc Guangcdic gutmei suangc guaikuan mpinh mai khou gutmei rui chiw e."
25 Ziap nunc tei mi tei chu la khou kaniw ngakna, "Kum e thei ringcsuangmei kiu thow rui laa ngam nina cho?" twna sa the.
26 Khoutei Jisu rui kaniw ta zaucna sa the, "Mi hei maansei khang thu ngam mak khe, tiki Ravguangc khang thu ngam tu rana de."
27 Khoutei Pitar rui mundawna sa the, "Zauc lo, aniw ramh guayna ganclouna nang thei lay tat bam the. Kum e thei aniw khang tabui nai puni thah?"
28 Jisu rui kaniw khou sa the, "Ai rui nangniw khou kaling salou tuang e: Athei laymei nangniw hei thu kandih kathanc thangc Meic Nac Mpouh rui hymdaihmei katuang guangc bamvpaeng khou dungc pwkhou guanghbamvpaeng ruhna kanei khou dungc nchamcna Israelmei kaikhwang ruhna kanei ta sin bam puni. 29 Kumna thow pwni kakai, kalau, kachana, katanpui, kapui, kapu, khatni kanac ta azaeng khang gancloumei thai mi suangc geicna kamei laatow dat puni, kumna ringcsuangmei ni laa puni. 30 Kumna ntaw reymei sw bammei mpeyna hei nkhamhmei sw puni, khatni ntaw nkhamhmei sw bammei mpeyna hei reymei sw puni."