18
Latzanpouc khatni Maypui Latgiam
1 Liat lakpui tuang maekna, huayney tanh tan bam o twmei nchamlou khang Jisu rui kaziap nunc khou mi latgiam hei salou khwan e. 2 Mi hei sa the, "Kaidai akhat khou Ravguangc ta ni ping mak, maansei ta ni chakhwang sw mak twmei latzanpouc gaanv khat nai khwan e. 3 Mi kaidai khou tei maypui gaanv khat ni nai khwan e. Kumna mi pui tei kadaeng khou guangna, 'Ata zauczihmeipu ta latzan swlou o,' twna sa bam khwan e. 4 Matak khat thu kamei nuhlou mak e. Tiki nkhamh khou karana kakhou sa the, 'Ai hei Ravguangc ta ni ping mak, maansei ta ni chakhwang sw mak tw bam khwan sini, 5 mi pui hei rui mi kumcna ata sw katuakc bam e thei, ai liat pw lak khe; kum thena ai kakhang latzan swlou ni the.' "
6 Poubauhmei rui sa the, "Nchumh makmei latzanpouc tei rui samei tei nking o. 7 Kumna zingbangc kalaanv kakhou kauc bammei kamei rui kapahloumei nunc khang hei, Ravguangc rui latzan swlou pw lak nah cho? Kaniw kauc kanak bam kan di ho tw puni nah cho? 8 Ai rui nangniw khou sa tuang e, kamei katumcna kaniw khang latzan swlou puni. Kum e tiki, Meic Nac Mpouh guang pwkhou, lwmmei ta kamei kandih khou ariw puni daih cho?"
Pharisi khatni Dihkhav Kakhameipu Latgiam
9 Ravchaptatmei e twna kaniw rana kaniw ta lwmna meickai ta malamei nunc khou Jisu rui mi latgiam hei sa the: 10 Meic gaanv nei—Pharisi lev dihkhav kakhameipu huayney khang ravkai khou guang khwan e.
11 "Pharisi tei karana ding langcna a huayneyna sa the: 'He Ravguangc, ai nang ta thuancku e, kalam thu ai thu meic baihmei--meicguatmei, meicsimei, lungcmaanvmei, khatni mi dihkhav kakhamei kumhmei hamh e. 12 Ai neidak akhat lungc khou munthiangc kanei e khatni ai mphangmei guay tuang kadam ruh tuang akhat tii e.'
13 "Tiki dihkhav kakhameipu tei duh thangc dingna, tingkauh thangc zauc sini zauc thau ngam makna, kangaengv hiwna, 'He Ravguangc, paapcmei ata nzianlou o,' twna sa the.
14 "Ai rui nangniw khou samei tuang e, Pharisi tei hamhna dihkhav kakhameipu tei kakhuay guay kuaklou tina kakai tat kan the. Kalam thu karana kata tikauhpui mei guay ta tei tii na keylou puni khatni niamhpui mei ta tei tidaiclou puni."
Alauc nunc ta Suaihiamloumei
15 Kamei rui kahilou khang meicnunc rui alauc nunc ta ni Jisu daeng khou nduangh guang khwan e; tiki mi tei how lana ziap nunc tei rui kaniw ta luh the. 16 Tiki Jisu rui alauc nunc ta tei kawna sa the, "Alauc nunc ta tei adaeng khou tiguang o, kaniw ta khaem rio, kalam thu Ravguangc Guangcdic hei mi kumhmei nunc khang e. 17 Ai rui nangniw khou kaling salou tuang e, thow pwni Ravguangc Guangcdic tei alauc kumcna laalou mak e thei, kamei mi khou tei tabui nungc na sini gut ngam lak e."
Lungcgaymei Kapypu
18 Jihudimei tuang kapy gaanv khat rui, "Meic gaymei dinhpouc, ringcsuangmei laa khang ai tabui sw nina cho?" twna Jisu khou thanv khwan e.
19 Khoutei Jisu rui kakhou sa the, "Tabui swna nang ata meic gaymei kaw tu cho? Ravguangc na hamhna meic gaymei maek e. 20 'Lungcmaanv lak nina e, meic dow lak nina e, kaihouc lak nina e, saraemhmei sakhi sw lak nina e, nang pui nang pu ta chakhwang sw nina e,' twmei latdanv guay hei nang thay the cho."
21 "Mi guay hei thu ai alauc douc rui piu guang tuang di the," twna kamei rui sa the.
22 Mi tei chu lana, Jisu rui kakhou sa the, "Nang khou ntangh makmei akhat nai he. Nang tuang naimei guay zuancna lungcsimei nunc khang tii tio; kumc e thei nang khang tingkauh thangc lanv nai puni. Kum lana guangna athei lay o."
23 Mi tei chu pwkhou, kalung mpeyna ryanra the; kalam thu kamei mpeyna lungcgaymeipu e. 24 Mi tei how lana Jisu rui sa the, "Lungcgaymei rui Ravguangc Guangcdic gut khang adih kungc kan tu cho! 25 Lungcgaymei rui Ravguangc Guangcdic gutmei suangc guaikuan rui mpinh mai khou gutmei rui chiw e."
26 "Kum e thei, thow rui guloumei laa ngam nina cho?" twna mi tei chumei guay rui sa the.
27 Khoutei, "Maansei khang ngam makmei tei Ravguangc khang thu ngam mak tuang maek e," twna Jisu rui daw the.
28 "Aniw ramh guayna ganclouna nang thei lay the," twna Pitar rui Jisu khou sa the.
29 Khoutei Jisu rui kaniw khou sa the, "Ai rui nangniw khou kaling salou tuang e: Ravguangc Guangcdic khang kakai, kanow kanac guay, kachana guay, khatni kapui kapu ta gancloupui mei tei, 30 mi zuk khou mi khang tei suangc geicna laa dat puni khatni thei thangc ringcsuangmei laa puni."
Jisu rui Kamei Theic Nimei Lam Dinc Kasuakclou Datmei
31 Jisu rui ziap ruhna kanei ta tei nduangh ranc patna, kaniw khou sa the, "Aniu Jerusalem thangc ngangh puni the, kumna muhzwng nunc rui Meic Nac Mpouh lam khou hyloumei guayna tei tiguang tangc puni the. 32 Kata Jentailmei nunc khou tii patlou puni the. Kaniw rui kata sinnui puni, tizak puni, kakhou nteih nsuklou puni, bai puni, kumna swluai puni; 33 tiki zaeng neih thumhpui nungc ringcthau dat puni."
34 Ziap nunc tei mi guay hei akhat na sini kabah thay mak e. Mi kabac tei kaniw khou rui nkamhlou kan tina, sa bammei kabac tei kaniw thay mak khe.
Mik Tiatmei Neytumeipu Gaanv Khat ta Tigayloumei
35 Kumna Jisu Jeriko na guang pwkhou, mik tiatmeipu gaanv khat chaeng daeng khou dungcna, neytu bam khwan e. 36 Meic kangdai tat patmei khwan chu lana, mi tei tabui lana cho twna kamei rui thanv the. 37 "Nazareth mei Jisu guang tina e," twna kaniw rui kakhou sa the.
38 Khoutei, "He David Nac Mpouh Jisu, ata nzianlou o!" twna kamei rui kauc the.
39 Khoutei, chaeng humei nunc tei rui kata luhna, "Rei rei bam o," twna sa the. Tiki kamei kauc ranv hay hayna, "David Nac Mpouh, ata nzianlou o!" twna kauc the.
40 Khoutei Jisu ding the, kumna mi pu ta tei kadaeng khou nduangh guang khang sa the. Kadaeng khou guang pwkhou, Jisu rui kakhou, 41 "Ai rui nang khang tabui swloumei ta laa niina cho?" twna thanv the.
"Poubauhmei, amik how dat nii e," twna Kamei rui sa the.