17
Paapc Lam Dincloumei
1 Jisu rui kaziap nunc khou sa the, "Phaysuymei thu guang mak nuh makna guang puni the; tiki kakhou rui phaysuymei guangmei nunc tei sansi e da! 2 Mi meic nthyammei nunc khou rui gaanv khat ta tiphaysuypui mei swmei suangc mu kaguang khou napriak tauc nleilouna duipui khou phaicloumei rui kakhang gay tap e. Mi zaeng rui, 3 nangniw ramhthay o.
"Nang chana paapc khou keylou e thei, kata luh tio, kumna kamei lunghlaic dat e thei, kuaklou tio. 4 Kamei rui zaeng neih khat khou nang ruc khou nkhuailou liang chanei pw e thei, kumna guangna luan chaneina, 'Ai lunghlaic the,' twna sa pw e thei kata kuaklou nina e."
Lwmmei Lam Dincloumei
5 Khoutei, "Aniw khou lwmmei ti-mbulou o," twna Latdiutatmei nunc rui sa the.
6 Khoutei Poubauhmei rui sa the, "Nangniw khou gannaeng thw di na sini lwmmei nai e thei, mi bang ta hei, 'Nang, nang maan phuk patna duipui khou thau o,' twna sa ti thei mi tei nang lat piu puni de.
Bangh Akhat Thouc
7 "Nangniw bangc khat rui lau suak tat lana hamh e thei lauziu gaengc tat lana guang dat pwkhou, 'Guang tho, tu zangv khang dungc key tho,' twna sa nimei thow naina cho? 8 Mi phaan tei, 'Nap gan kasiamh tho, siangiat giatna ai tu tangv zangv tangv mak saanv siamruai sw o, mi tangv rui nang tu o,' twna sa pw lak nah cho? 9 Kata taanc o twna samei guay tei taanhmei khang kakaipouc tei rui kabangc ta tei thuanckulou nina cho? 10 Mi tei kumcna, nangniw ni nangniw ta taanc o twna samei guay tei taanc tang pwkhou, 'Aniw hei luih makmei bangc nunc dyng e, aniw thouc tei na aniw taanh tuang dyng e,' twna sa o."
Mphaanhmei Gaanv Ruh ta Tigayloumei
11 Jisu Jerusalem thangc keymei chaenglwan khou Galili lev Samaria ramvrei ramv khou tat pat the. 12 Kamei namv akhat khou gut pwkhou, mphaanhmei gaanv ruh kata ariw the. Kaniw duh thangc dingna, 13 Kauc ranvna, "Kaipouc, aniw ta nzianlou o!" twna Jisu khou sa the.
14 Kaniw ta how pwkhou, "Tat tho, nangniw ta amuh nunc khou lyan tat tho," twna Jisu rui kaniw khou sa the. Kaniw tei tat bammei chaenglwan khou rui nthan a dat the.
15 Kaniw pang khou gaanv khat, kamei gay dat the twmei how pwkhou, hanc guang datna, kauc ranvna Ravguangc ta thuanc the. 16 Kamei Jisu phaypav khou nkhum keyna kata thuanckulou the. Mi pu tei Samariamei e.
17 Khoutei Jisu rui sa the, "Gaanv ruh ta sw-nthanlou kan tu hamh nah cho? Baihmei chakiu thu tabui thangc tat kan thah? 18 Mi dihpaengcgin na hei hamhna gaanv khat na sini guangna Ravguangc ta thuanc dat mak khah?" 19 Khoutei Jisu rui kakhou sa the, "Thauna tat tho, nang ramlum rui nang ta tigaylou the."
Ravguangc Guangcdic Guangmei
20 Ravguangc Guangcdic tabui ganv khou guang puni cho twna Pharisi nunc rui thanv tikhou, Jisu rui kumna daw the, "Ravguangc guangcdic thu how pauna guang ni tu hamh e, 21 khatni 'Mi khou hei nai the,' hamh e thei, 'Mi thangc tei nai the,' twna sa ni tu hamh e. Kalam thu, zauc lo, Ravguangc Guangcdic thu nangniw lungc khou b nai the."
22 Khoutei Jisu rui kaziap nunc khou tei sa the, "Meic Nac Mpouh tuang tingmik ta tei nangniw how niimei ganv guang puni; tiki mi tei nangniw how ngam lak e. 23 'Kamei mi thangc tei bam the!' hamh e thei 'Kamei mi khou hei bamv the!' twna meicnunc rui nangniw khou sa puni. Nangniw kaniw thei lay tat riu. 24 Kalam thu Meic Nac Mpouh hei Katingmik nungc kiu thu, tingpalik pwkhou, tingpuk tin akhat khou rui katin akhat thangc gaanc tanghmei tei kumc puni de. 25 Tiki kamei ryanramei mpeyna khatni mi meickin rui kata gancpatloumei ariw rey puni.
26 "Meic Nac Mpouh guang nimei ganv khou kiu thu, Noa ganv khou kumc puni. 27 Noa hih khou gut nimei tingmik tangh mak saanv, meicnunc tei twna, zangvna, nowkawna, khatni micna bam khwan e. Khoutei duidai tei guangna kaniw guay ta tei swmaan ngam kan the.
28 "Lot ganv khou ni mi tei kumc muai khwan e. Meic nunc tei twna, zangvna, liuna, zuancna, lingcna khatni kai swna lungc bam khwan e. 29 Tiki Lot Sodom khou rui tat pat kanpui nungc tei, mai khatni maipu tingpuk thangc rui riu keyna kaniw guayna ta swmaan kan the.
30 "Meic Nac Mpouh ta ndauh pat nimei nungc kiu ni mi tei kumc puni. 31 Mi nungc kiu kainam khou bammei nunc tei, kainung khou naimei puat laa khang key dat laa ri tho. Mi tei kumcna, laupuk khou bammei nunc ni guang dat laa ri tho. 32 Lot now ta tey ningtow o! 33 Thow pwni karingcpaan kan khang swpui mei tei, mi tei swmaan puni; thow pwni karingcpaan maanloupui mei tei ringhpaan maan mak puni. 34 Ai rui nangniw khou sa tuang e, mi nungc zingbangc kiu, meic gaanv nei laeng khou zip bammei khou, gaanv khat ta laa tat puni, gaanv khat ta lou duc puni. 35 Meicpui gaanv nei nap riak bammei khou, gaanv khat ta laa tat puni, gaanv khat ta lou duc puni." 36 Meic gaanv nei lau khou taanv taanc bam puni; khou tei gaanv khat ta laa tat puni, gaanv khat ta lou duc puni. c
37 "Poubauhmei, tabui thangc cho?" twna kaniw rui thanv the.
Khoutei, "Theihmei pumc naimei bamv khou tei mouphou guang kaduai puni de," twna Jisu rui daw the.