16
Ntakmei Tamthiwmeipu
1 Jisu rui kaziap nunc khou mi hei ni sa the, "Lungcgaymeipu gaanv khat nai khwan e. Katuang tamthiwmeipu tei rui katuang lanv swmaan ngam the twna kakhou poulou khwan e. 2 Kum tina kamei rui mi pu ta kiu kaw guangna, 'Ai nang lam khou chu bammei hei tabui nai tina cho? Nang tamzanh bammei chakh guay akhou tii tho. Nang mi taanv hei taanc bam saengc nuh mak khe,' twna sa the.
3 "Tamthiwmeipu tei karana kakhou sa the, 'Ai tabui sw kho cho? Akaipouc rui ataanv hei laa ganclou puni the. Phucdan sinna chau khang ni ngam mak khe, ney tu khang ni zak e. 4 Ataanv hei tap pwkhou, ata meicnunc rui kaniw kai khou laalou nuh khang ai sw nimei hei thay the.'
5 "Kumna kamei rui kakaipouc tuang pow phunghmei guay ta tei khat khat swna kaw guang the. Reymeipu khou tei, 'Nang akaipouc khang azuh tuan tu cho?' twna thanv tikhou, 6 'Thauh tinc phay khat,' twna sa the. Khoutei, 'Sey, mi nang pow hyloumei chakh khou hei, dungc keyna riakngu hylou tho,' twna tamzanhmeipu tei rui sa the.
7 "Kamei rui baihmei gaanv khat khou tei ni, 'Nang azuh tuan tu cho?' twna thanv the. Khoutei, 'Gehu nggiuh phay khat,' twna sa the. Khoutei, 'Sey, nang pow hyloumei chakh hei laa tho, kumna riak tachat hylou tho,' twna kamei rui mi pu khou tei sa the.
8 "Kalung nthan makmei tamthiwmeipu ta tei ntakna sw e twna kakaipouc rui thuanckulou kan e. Kalam thu mi mbaanv nac nunc hei kaniw taanv khou gaanhmei nac nunc suangc ntak e.
9 "Kumna ai rui nangniw khou samei tuang e: Mi mbaanv tuang syan lanv guay hei maan ngam kan pwkhou, nang ta tingsaengzaeng lungc nipui bamv khou laalou khang, mi hei rui nangniw pam kasiamh o.
10 "Katitna khou lwmnuhmei mei tei geihmei khou ni lwmnuhmei mei e. Katitna khou lwm nuh makmei mei tei geihmei khou ni lwm nuh mak puni. 11 Kumna syan lanv sinswmei khou nangniw lwm nuh makmei sw e thei, kalingmei lanv khou thu thow rui nangniw ta lwm puni na cho? 12 Meickai tuang syan lanv khou tei nang lwm nuh mak e thei, thow rui nang tuang tei nang khang tiilou puni na cho?
13 "Bangh akhat na sini kaipouc kanei bangc sw nuh mak e. Kamei rui gaanv khat ta karaeng, gaanv khat ta nzian puni, khatni gaanv khat khou lunghlou, gaanv khat ta ntaemv puni. Nangniw Ravguangc lev syan bangc sw kariu nuh mak e.
Jisu Latdyn Baihmei Asaekc
14 Syan kahawmei Pharisi nunc mi guay hei chu lana, Jisu ta sinnui the. 15 Khoutei Jisu rui kaniw khou sa the, "Nangniw hei maansei mikzaw khou thu nangniw rana nangniw ta sw-nzihmei nunc e, tiki Ravguangc thu nangniw lung ta thay e. Maansei khang ning kauh sih bammei tei Ravguangc mikzaw khou thu karaengmei tuang de.
16 "John guang mak saanv Riakdanv khatni muhzwng nunc rui saloumei tei sin bam khwan e. John khou rui thauna, Ravguangc Guangcdic tuang gaychamv hei dinc the, kumna meic guayna mi khou hei ran gut the. 17 Riakdanv khou kakiak na rowloumei tei swmaanmei suangc tingpuk kandih maanmei rui chiw e.
18 "Thow pwni kanow ta mu gancna baihmei ta kaw datmei tei lungcmaanvmei e; khatni kagaanv rui muloumei ntumei ta kaw datpui mei tei lungcmaanvmei e.
Lungcgaymeipu khatni Lazaras
19 "Lungcgaymeipu gaanv khat kamanv kunghmei pheybaan rana piuna, tu gay zangv gay rana twna tingmik pum mathac malacna lungc bammeipu nai khwan e. 20 Kazanc Lazaras kawmei lungcsimeipu kakai kairaengv mun khou nliau bam khwan e. Kapumc kapaengc asuh rana khwan e. 21 Lungcgaymeipu tuang kuakpaeng khou rui tu kathow keyloumei na sini tu tow puni ny twna bam tuang e. Khoutei si nunc guangna katuang asu nliakc the.
22 "Lungcsimeipu tei theic the, kumna baanchara nunc rui kata Abraham daeng khou phungc guanglou the. Lungcgaymeipu tei ni theic the, kumna phuplou the. 23 Kata rai bammei taruaih a khou rui zauc ku pwkhou, duh thangc Abraham khatni kadaeng khou bammei Lazaras ta how the. 24 Khoutei kamei rui kaucna sa the, 'Apu Abraham, ata nzianlouna, kabaanc zung twan dui khou ntin lana abaley ti-nchulou khang Lazaras ta ndiulou o. Mi mai khou hei ai ryanra the.'
25 "Khoutei Abraham rui sa the, 'Anac le, nang thu nang panty khou nang khang gaymei rana laatowna lungc kan the, kumna Lazaras thu simei rana laatowna lungc kan the twmei ningtow o. Tiki ntaw thu kamei mi khou hei amanvna bam the, kumna nang rui ryanrana bam the. 26 Mi na hei hamhna, aniu kak khou kaan pat kaan gut nuh makmei kakak dai nai the.'
27 "Khoutei kamei rui sa the, 'Kum e thei, apu le, Lazaras ta apu kai thangc ndiulou na o. 28 A chana gaanv panguh nai kan e. Mi rairiumei bamv khou hei kaniw ni gut mak khang kamei rui kaniw khou dinclou kan diu.'
29 "Abraham rui sa the, 'Kaniw khang Mousi ni, muhzwng nunc ni nai the. Mi nunc lat tei kaniw piu kan di tho.'
30 " 'Kiuc hamh e, apu Abraham, theihmei rui guang ti thei kaniw lunghlaic puni de,' twna kamei rui sa the.
31 "Tiki Abraham rui sa the, 'Kaniw Mousi lev muhzwng nunc lat laa mak e thei, theihmei rui guang datna sa bam tisini laa bam ni tu hamh e.' "