15
Maan Kanmei Lauziu Latgiam
1 Dihkhav kakhamei nunc khatni paapcmei nunc kalat nking khang Jisu daeng khou guang bam khwan e. 2 Khoutei Pharisi nunc khatni Riakdanv tadin nunc tanglumna, "Mi pu hei paapcmei nunc ta laalou e khatni kaniw lev tu nchamc bam e," twna sa the.
3 Khoutei Jisu rui mi latgiam hei sa the: 4 "Nangniw gaanv khat tuang lauziu phay khat naimei khou rui akhat maan kan e thei, riakchakiuna chakiu ta tei tazikramv khou ganclouna, maan kanmei lauziu ta tei phu tow mak saanv phu pw lak nah cho? 5 Kamei mi tei phu tow pwkhou, kamei neihlana kabou khou puancna, 6 kai guang the. Kumna kapam nunc khatni kaigei kainingmei nunc ta, 'Aniu neihla nchamc kho; maan kanmei alauziu phu tow dat the,' twna kaw the. 7 Ai rui nangniw khou samei tuang e: Mi tei kumcna lunghlaih khang kage maekmei ravchaptatmei riakchakiuna chakiu naimei khang tei suangc paapcmei gaanv khat rui lunghlaic guang khou tingkauh thangc neihlamei mbu e.
Maan Kanmei Syan Latgiam
8 "Hamh e thei, meic pui gaanv khat katuang syankangh paek ruh naimei khou rui akhat maan kan e thei, kamei thauhmai daancna, kai geyna phu tow mak saanv phu pw lak nah cho? 9 Kamei mi tei phu tow pwkhou, 'Aniu neihla nchamc kho; atuang maan kanmei syan phu tow dat the,' twna kapam khatni kaining kaigeimei ta kaw the. 10 Mi tei kumcna, ai rui nangniw khou samei tuang e: Paapcmei gaanv khat lunghlaic pwkhou, Ravguangc baanchara nunc neihla e."
Maan Kanmei Nac Mpouh Latgiam
11 Kumna Jisu rui sa the, "Meic gaanv khat pu nac mpouh gaanv nei nai khwan e. 12 Kumna alaucmeipu tei rui, 'Apu, atuang dam tii tho,' twna kapu khou sa the. Khoutei kapu rui katuang lanv kanei khang nzanhlou the. 13 Mi tangv asaanh makna, alaucmeipu tei katuang naimei guay zuanc lana, duhmei kandic akhat thangc tat kan the. Mi khou tei kamei kapham lungcna katuang syan guay piu ngam the. 14 Katuang naimei guay piu ngam pwkhou, mi kandic kapwm khou tei nap nkow dai nkowmei guang the. Kumna kamei tu khang maek khe. 15 Kumna mi kandic tuang dilungmeipu gaanv khat daeng khou phic tu khang guang the. Khoutei guak gy khang laupuk thangc ndiulou the. 16 Khoutei kamei ndaepc langvna guak taek tei sini tu niina ning pat the. Kum e tiki meic gaanv khat na rui sini kakhang tiilou mak khe.
17 "Kamei kabah thay guang dat pwkhou, kamei rui sa the, 'Apu bangc nunc tei thu tu ngam zangv ngam makna lungc bam e, tiki mi khou hei ai thu ndaepcna theic nina bam e.! 18 Ai thauna apu daeng thangc tat datna, sa ni the, "Apu le, ai Ravguangc khou ni, nang khou ni nkhuai the. 19 Ai hei nang nac mpouh twna laalou khang biuh makmei mei di the. Nang bangc akhat ta kumcna swlou pw di tho." 20 Kumna kamei thauna kapu daeng thangc tat the.
"Kata duc sih thangc kapu phaengc how lana, kata ningngam mak khe. Kamei kanac ta pak riu patna, pamcna kaput the.
21 "Khoutei kanac tei rui, 'Apu le, ai Ravguangc khou ni, nang khou ni nkhuai the. Ai hei nang nac mpouh twna kaw khang biuh makmei mei di the,' twna sa the.
22 "Khoutei kapu rui kabangc nunc khou sa the, 'Pheychuanh kathanc tei katumcna laa patna kakhou piulou tho. Kabaanc khou baanrwn runlou tho, kumna phaythuapc ni tuangclou tho. 23 Kameigaymei guai chic tei laa guangna dow tho. Nngay di kho! 24 Kalam thu mi anac mpouh hei theihmei khou rui ringc dat the; maan kanmei khou rui phu tow dat the! Kumna kaniw nngay thau the.
25 "Mi ganv khou tei gaanvdaihmei tei thu laupuk thangc bam khwan e. Kamei kakai daeng guang pwkhou, syan syan khuangh khuangh alaemh bammei khwan chu the. 26 Kumna kamei kabangc gaanv khat ta kawna, tabui sw bam lana cho twna thanv the. 27 'Nang chana guang dat tina, kamei gayna guang dat the twna malanloumei guaichic nang pu rui dow lana the,' twna daw the.
28 "Khoutei kamei lunghpuamc the. Kumna kainung gut nii mak khe. Khoutei kapu patna kata huaycha the. 29 'Zauclo, tingkwm hei saanmei ai bangh kumcna nang siamruai sw guangmei tuang e, neih khat na sini nang latdanv liam kan mak e. Tiki nang pam guay lev nngay nchamc tho twna ziuh launa sini tiilou zat mak e. 30 Tiki nang nac pu hei rui nang tuang lanv guay mangcsangmeiluc nunc lev swmaan ngamna guang dat tiki, kameigaymei guai chic tei kakhang dowlou bu e ni!'