18
Thow tei Daic Liangmei Cho?
1 Mi ganv khou tei ziap nunc tei Jisu daeng khou guangna, "Thow tei Tingkauh Guangcdic khou daic liangmei cho?" twna thanv the.
2 Khoutei alauc khat ta kaw guangna kaniw hu khou tidinglouna 3 sa the, "Ai rui nangniw khou kaling salou tuang e: nangniw lunghlaicna alauc nunc kumh mak e thei, nangniw Tingkauh Guangcdic khou gut zat ni tu hamh e. 4 Mi zaeng rui thow pwni niamh keyna, mi nac launa hei kumhpui mei tei Tingkauh Guangcdic khou daic liangpui mei e. 5 Kumna thow pwni mi kumhmei alauc gaanv khat ta azanc khou laaloupui mei tei, ata laalou tu e."
Paapc Taanh khang Nthiammei
6 Thow pwni akhou lwmmei mi kumhmei alauc akhat ta tiphaysuypui mei ta thu kaguang khou napriaktauc daihmei ntalouna duipui syng thangc phaicloumei rui kakhang gay e. 7 Kandih khou phaysuy tauc padikmei khang sansi e dav! Phaysuymei thu nai bam puni the, tiki kakhou rui phaysuymei guangpui mei tei sansimei e.
8 "Nang phay rui hamh e thei nang baanc rui nang ta tiphaysuy e thei, mi tei dan tapna nang khou rui ganc o. Kalam thu nang phay nang baanc ntanghna tingsaengzaeng mai khou gutmei suangc, nang phay nang baanc ntangh mak sini ringhmei khou gutmei rui nang khang gay e. 9 Nang mik rui nang ta tiphaysuy e thei, mi tei lat patna ganc o. Kalam thu nang mik kanei naina maikwam mai khou gutmei suangc nang mik akhat na naina ringhmei khou gutmei rui nang khang gay e.
Maanmei Lauziu Latgiam
10 "Mi nthyammei nunc ta hei thouh sw makpui tuang sw mak khang nangniw ramhthay o. Ai rui nangniw khou sapui tuang e: tingkauh thangc kaniw tuang baanchara nunc tingkauh thangc bammei aPu daeng khou guang tanh tan bam e. 11 (Kalam thu Meic Nac Mpouh hei maanmei ta gulou khang guang tuang e.)
12 "Thowkumhmei lauziu phay khat naimei gaanv khatpu katuang lauziu akhat ruan maan tat kan ti thei kamei akumh puni cho? Riakchakiuna chakiu ta tei chyngbut khou ganclou ducna ruan maan kanmei akhat ta tei phu tat pw lak nah cho? 13 Ai rui nangniw khou kaling salou tuang e: kamei rui mi tei ariw dat pwkhou maan makmei riakchakiuna chakiu naimei khang tei suangc maan kanmei akhat ta phu tow datmei khou tei neihla diangc e. 14 Mi tei kumcna, mi nthyammei pang khou rui akhat na sini maan kanmei ta tingkauh thangc bammei nangniw pu laa nii mak e.
Nkhuaimei Chana
15 "Nang chana rui nang khou nkhuailou tuang nai e thei, tatna kamei rui nkhuailoumei tei nang ney rana rac o. Kamei rui nang lat tei chulou e thei, nang rui nang ney chana kiang riang tigaylou dat the. 16 Tiki kamei rui chulou mak e thei, gaanv nei gaanv thumh mwang khou rui kiuc dyng e twmei thay khang gaanv khat gaanv nei ta nduanghna tat o. 17 Kamei rui kaniw tuang lat tei ni chulou mak e thei, phwamling khou phungclou ti tho. Kamei rui phwamling tuang lat tei nganv chulou mak e thei, kata tei Jentailmei khatni dihkhav kakhamei nunc ta kumcna khaclou ti tho.
Bangcloumei khatni Ricloumei
18 "Ai rui nangniw khou kaling salou tuang e: nangniw rui kandih khou bangcloumei tei tingkauh thangc ni bangclou puni khatni nangniw rui kandih khou ricloumei tei tingkauh thangc ni riclou puni.
19 "Ai rui nangniw khou sa tuang e: Kandih khou bammei nangniw gaanv nei rui tabui lam khou pwni chwnchamhna ney e thei tingkauh thangc bammei aPu rui swlou puni. 20 Kalam thu gaanv nei gaanv thumh azanc khou guang kariuna bammei bamv khou tei ai bam e."
Kuaklou Makmei Bangc Gaanv Khat Latgiam
21 Khoutei Pitar guangna Jisu khou sa the, "Poubauhmei, akhou nkhuaimei swlou bammei chana gaanv khat ta ai kuaklou azuh nina cho? Luan chanei ny?"
22 Jisu rui kakhou sa the, "Chanei na hamh e, kuaklou luan chanei tei riakchanei nina de."
23 "Kalam thu, Tingkauh Guangcdic hei guangh akhat rui kabangc nunc tuang syan chak sw nthan khang swmei kumhmei tuang e. 24 Rey liangmei khou talent ching ruh pow phunghmei bangc akhat ta nduangh guang the. 25 Mi pu tei tii dat ngam tii mak khena, kanow kanac nunc khatni katuang naimei guay zuancna khangc khang ka kaipouc tei rui sa the. 26 Khoutei banghpu tei pun nkhum laemv keyna kalumna, 'Nang lungc puamclou ri tho, kaguayna ai khangclou ni de,' twna sa the. 27 Khoutei kakaipouc tei kabangcpu ta tei ningngam makna kapow guay kuaklouna mpatlou kan the.
28 "Mi bangcpu tei tat pat pwkhou guangh bangc makaemv katuang denari phay khat pow phunghmei kapam gaanv khat ta ariw the. Khoutei mi pu ta tei nymna kakhac gayna 'Apow tei tii tho' twna sa the. 29 Mi pu tei tat patna kakhou denari phay khat pow phunghmei kabangc makaemv akhat ta ariwna, pun nkhum laemv keyna, 'Nang lungc puamclou ri tho, ai khangclou ni de,' twna huaycha the. 30 Khoutei kamei tei nuh mak khe, kumna kapow tei khangclou mak saanv lou khang kangkai khou tiilou kan the. 31 Guangh bangc makaemv nunc tei mi tei how pwkhou kaniw mpeyna lungh kabiu the. Kumna kaniw kaipouc daeng khou guangna pat kanmei guayna tei poulou the. 32 Khoutei mi bangcpu ta tei kaw guangna kaipouc tei rui kakhou sa the, 'Meicsimei bangc, nang rui huaychamei thei layna nang pow guayna ai kuaklou kan the. 33 Ai rui nang ta nzianloumei kumcna nang ni abangc makaemv ta nzianlou nina hamh nah cho?' 34 Khoutei guangh tei kalung puamcna kapow guayna tei khangc ngam mak saanv rai khang kangkai kaipouc baanc khou tiilou kan the.
35 "Nangniw chana makaemv khat khat ta nangniw lung syng khou rui kuaklou mak e thei, tingkauh thangc bammei aPu rui ni nangniw khou mi tei kumcna swlou puni."