3
Duiluploumei John Taanv
1 Kaisar Tiberia guangh swmei ruhna panguhmei kwm—Pontias Pilat rui Judia khou guanghkhyn, Herod rui Galili ramvlangv tuang dihsinpouc, kachana Philip rui Ituraia lev Trakhonitis ramvlangv tuang dihsinpouc, khatni Lusanias rui Abilene ramvlangv tuang dihsinpouc sw bammei douc; 2 khatni Annas lev Kaiaphas rui Tingkuh sw bammei douc, Zekaria nac mpouh John tazikramv khou bam khou, Ravguangc lat kakhou sa guang khwan e. 3 Kamei Jordan daeng nkuaymei ramv kapwm khou tatna paapc guay kuaklou khang lunghlaicna duilup khang dinc ndauh the. 4 Mi hei muhzwng Isaia rui hyloumei khou,
"Tazikramv khou gaanv khat,
mi kumcna kauc bam e:
'Poubauhmei guang pw the,
Kakhang chaeng sw tho;
kakhang chaeng sw ntyng tho.
5 Kabaek guay sw padik puni,
chyng but luangh but guay sw kazaengc puni;
Kadip kadaengvmei chaeng nuk guay sw ntyng puni;
kathuk kaduk guay sw padik puni.
6 Kumna meic guayna Ravguangc rui guloumei how puni,' "
twna samei tei the.
7 Kumna kamei rui duiluplou khang guangmei meic kangdai khou tei John rui sa the, "Nangniw nrui nac nunc! Guang nimei latzan khou rui pak laa tho twna nangniw khou thow rui sa pwna cho? 8 Nangniw lunghlaihmei thay nthai o; 'aniw thu Abraham nac nunc de,' twna du daic bam laa ri tho. Ai rui nangniw khou sa e: Ravguangc thu mi tauc but nunc ta hei Abraham nac nunc tii mbaihlou ngam de. 9 Ntaw ni thing bang guay bangbi khou nrih lou bam the, kumna kathai gaymei nthai makmei bang guay ta gay bauna mai khou phaiclou puni."
10 Khoutei, "Mi kumc e thei aniw tabui sw nina cho?" twna meic kangdai tei rui thanv the.
11 Khoutei John rui sa the, "Thiula kanei naimei tei rui maekmei tei lev piu nzanh o, khatni tu khang naimei tei rui maekmei lev tu nzanh o."
12 Dihkhav kakhamei nunc ni duilup khang guangna, "Dinhpouc, aniw tabui sw nina cho?" twna thanv the.
13 "Nangniw ta laa o twna saloumei khou tei rui laa mbu riu," twna John rui kaniw khou sa the.
14 Khoutei, "Aniw ni tabui sw nina cho?" twna rihmei nunc rui ni thanv the.
"Meickai tuang syan asut laa riu khatni nkhuai makmei khou khuay nkhamlou riu. Nang tuang taanvphy tei nang khang pianmei sw o," twna kamei rui daw the.
15 Meic nunc tei lwmgayna phaengc bam khou khatni John hei Khrista kiu lana khuangh di the twna meic guay tei kaniw lungning khou kakhanhna bam khou, 16 John rui kaniw khou sa the, "Ai rui nangniw ta dui rui duiluplou the. Tiki akhang suangc ngamv daihmei gaanv khat guang puni. Ai thu katuang phaythuapc riang rih khang na sini biuhpui mei hamh e. Kamei rui nangniw ta Bumaengh Nthanmei rui khatni mai rui luplou puni. 17 Kabaanc khou nzamh sin e, kumna laudy bamv khou rui kagung guay sw nthan ganc puni. Katak guay kasaemc khou phungc guanglou puni. Tiki kagung guay tei amit dat makmei mai khou ntei puni.
18 Kumna baih baihmei lat mpeyna ni sana, John rui katiulou the khatni kaniw khou gaychamv dinclou the.
19 Tiki John rui dihsinpouc Herod ta kachana now Herodia kaney lungc nkhuaimei zaeng rui khatni kamei rui taanc kanmei simei taanv guay zaeng rui luh tina, 20 kamei rui John ta kangkai khou louna simei taanv taanc katynlou the.
Jisu Duilupmei
21 Meic guay ta tei duiluplou tangna Jisu ta ni luplou the. Khoutei kamei huayney bam khou, tingkauh laanc patna, 22 Bumaengh Nthanmei akhouhna kumcna kapumc swna kakhou keylou the. Khoutei, "Nang hei ai rui nzianmei, ai rui pianmei Anac Mpouh e," twna tingkauh thangc rui kauc key the.
Jisu Pupouc Riang
23 Jisu kamei kataanv kahouh khou katingkwm tamruc dou khwan e.
Meic nunc ramchak khou, kamei hei Joseph nac e, Joseph hei Heli nac mpouh e, 24 Heli hei Matthat nac mpouh e, Matthat hei Levi nac mpouh e, Levi hei Melkhi nac mpouh e, Melkhi hei Jannai nac mpouh e. Jannai hei Joseph nac mpouh e, 25 Joseph hei Mattathias nac mpouh e, Mattathias hei Amos nac mpouh e, Amos hei Nahum nac mpouh e, Nahum hei Esli nac mpouh e, Esli hei Naggai nac mpouh e, 26 Naggai hei Maat nac mpouh e, Maat hei Mattathias nac mpouh e, Mattathias hei Semein nac mpouh e, Semein hei Josek nac mpouh e, Josek hei Joda nac mpouh e, 27 Joda hei Joanan nac mpouh e, Jaanan hei Rhesa nac mpouh e, Rhesa hei Zerubbabel nac mpouh e, Jerubbabel hei Shealtiel nac mpouh e. Shealtiel hei Neri nac mpouh e, 28 Neri hei Melkhi nac mpouh e, Melkhi hei Addi nac mpouh e, Addi hei Kosam nac mpouh e, Kosam hei Elmadam nac mpouh e, Elmadam hei Er nac mpouh e, 29 Er hei Joshua nac mpouh e, Joshua hei Eliezar nac mpouh e, Eliezar hei Jorim nac mpouh e, Jorim hei Matthat nac mpouh e, Matthat hei Levi nac mpouh e, 30 Levi hei Simeon nac mpouh e, Simeon hei Juda nac mpouh e, Juda hei Joseph nac mpouh e, Joseph hei Jonam nac mpouh e, Jonam hei Eliakim nac mpouh e, 31 Eliakim hei Melea nac mpouh e, Melea hei Menna nac mpouh e, Menna hei Mattatha nac mpouh e, Mattatha hei Nathan nac mpouh e, Nathan hei David nac mpouh e, 32 David hei Jessi nac mpouh e, Jessi hei Obed nac mpouh e, Obed hei Boaz nac mpouh e, Boaz hei Salmon nac mpouh e, Salmon hei Nashon nac mpouh e, 33 Nashon hei Amminadab nac mpouh e, Amminadab hei Admin nac mpouh e, Admin hei Arni nac mpouh e, Arni hei Hezron nac mpouh e, Hezron hei Perez nac mpouh e, Perez hei Juda nac mpouh e, 34 Juda hei Jakob nac mpouh e, Jakob hei Isaak nac mpouh e, Isaak hei Abraham nac mpouh e, Abraham hei Tera nac mpouh e, Tera hei Nahor nac mpouh e, 35 Nahor hei Serug nac mpouh e, Serug hei Reu nac mpouh e, Reu hei Peleg nac mpouh e, Pereg hei Eber nac mpouh e, Eber hei Shela nac mpouh e, 36 Shela hei Kainan nac mpouh e, Kainan hei Arphazad nac mpouh e, Arphazad hei Shem nac mpouh e, Sham hei Noa nac mpouh e, Noa hei Lamek nac mpouh e, 37 Lamek hei Methusela nac mpouh e, Methusela hei Enok nac mpouh e, Enok hei Jared nac mpouh e, Jared hei Maleleel nac mpouh e, Maleleel hei Kainan nac mpouh e, 38 Kainan hei Enos nac mpouh e, Enos hei Seth nac mpouh e, Seth hei Adam nac mpouh e, Adam hei Ravguangc nac mpouh e.