2
Jisu Puanhmei
1 Mi douc tei kaguangcdic kapwm zanh hy nina e twna Kaisar Augastas rui latdanv pat khwan e. 2 Mi reymei zanh hymei hei, Kurinias rui Suria khou guanghkhyn sw bammei douc khwan e. 3 Kumna zanh hy khang meic kapwmna karamc kaidai kaidai thangc tat khwan e.
4 Kumna Joseph ni Galili tuang Nazareth kaidai khou rui Judia tuang David kaidai, kazanc Bethlehem kawmei kaidai khou ngangh the. Kalam thu kamei David puinacmei lapui zaeng rui, 5 nahguam bammei kakhaemv Meri lev mi khou tei zanh hylou nina khwan e. 6 Kumna kaney mi khou tei bam khou, Meri ganthiangc nipui ganv tangc khwan the. 7 Kumna Meri nareimei mpouh khat puanc the, kumna nahdwam phey rui kaduapclouna guaih kuak khou nzilou the. Kalam thu kaney khang ginbangvkai khou bangv bamv maek khwan e.
Jisu Puanhmei Chamv Lauziu Gaenghmei nunc khou Dincloumei
8 Mi ramv gei khou tei lauziu gaenghmei nunc kaniw tuang lauziu nkhwanna zingbangc ramvpuk khou bam khwan e. 9 Khoutei Poubauhmei tuang baanchara kaniw daeng khou guangna Poubauhmei tuang hymdaihmei rui kaniw bamv guay tei ganclou the. Khoutei kaniw ping the. 10 Khoutei baanchara tei rui kaniw khou sa the, "Nangniw ping rio, zauc lo, neihla daihmei chamv ai rui nangniw khang phungc guang e; mi hei meic guayna khang e. 11 Mi kiu thu: aseic hei David kaidai khou nangniw khang Guloumeipu puanclou bam the. Kamei Khrista Poubauhmei e. 12 Mi nac ta kiu madanh khang mi hei e: Ngasatna akhat nahdwam phey rui kaduapclouna guaih kuak khou nzilou bammei ta nangniw ariw puni."
13 Khoutei thay mak liang khou tingkauh mei kangdai patna mi baanchara tei lev Ravguangc hym thuancna sa the:
14 "Tingkauh khou Ravguangc hymdaic diu,
khatni kandih khou Ravguangc rui lunghkwnmei nunc khou,
chuzaenghmei nai diu."
Lauziu Gaenghmei nunc Ngasatna Jisu ta Zauhmei
15 Kauh baanchara guay tei kaniw khou rui tingkauh thangc tat dat kan pwkhou, "Aniu Bethlehem thangc tatna Poubauhmei rui aniu khou dincloumei ta kiu zauc di kho," twna kaniw kaphianh the.
16 Kaniw katumcna tat lana Meri lev Joseph khatni guaih kuak khou nzilou bammei ngasatna ta ariw the. 17 Kaniw mi tei how lana, mi ngasatna lam khou tei kaniw khou saloumei tei kaniw rui rac lik sikh siklou the. 18 Kumna lauziu gaenghmei nunc tei rui samei pary tei chumei guay ngak the. 19 Meri mi guay hei kalung khou rylouna kakhanhna bam khwan e. 20 Lauziu gaenghmei nunc tei kaniw khou saloumei kumc rapna, kaniw rui chu kanmei khatni how kanmei khang tei Ravguangc hym thuancna hanc guang dat the.
Jisu Zanc Phuakmei
21 Zaeng tachat tangcna mi ngana ta tei gihruamc pwkhou, kapui bangc khou meic cha mak khou rui kauh baanchara rui phuakloumei zanc "Jisu" twmei zanc hei kazanc khang phuaklou the.
Jisu ta Ravguangc khou Kat Gutloumei
22 Mousi tuang Riakdanv thei layna, kaney pumh nthanpui thouc swpui ganv tangc pwkhou, Jisu ta Poubauhmei khou kat gut khang Jerusalem khou phungc guang the. 23 "Nareimei nggaanvmei nac guay tei Poubauhmei khang reic patlou nina e," twna Poubauhmei tuang Riakdanv khou hylouna nai tina e. 24 Poubauhmei tuang Riakdanv khou saloumei thei layna, akhouhna kanei hamh e thei aphyna kanei katlou khang e.
25 Khoutei kazanc Simeon twna kawmeipu gaanv khat Jerusalem khou nai khwan e. Kamei hei ravchaptatmei khatni ravning nthukmei khatni Israelmei ta guloumei ta nkhwanna bammeipu khwan e. Bumaengh Nthanmei kakhou bam khwan e. 26 Kamei theih mak khou Poubauhmei rui suangloumei Khrista ta kamei how puni twna Bumaengh Nthanmei rui kakhou dinclou khwan e. 27 Kumna Bumaengh rui zaylouna kamei Ravkai khou guang the. Khoutei kariak thei layna angana khou taanclou nimei thouc taanclou khang, Jisu ta kapui kapu rui phungc guang pwkhou, 28 kamei rui ngana ta tei puancna, Ravguangc ta thuancna sa the:
29 "He Kaipouc, ntaw thu nang bangc ai chuzaenghna tat kan ni the.
Nang rui nrianhloumei tei guang tangc the.
30 Kalam thu, nang rui tiiloumei Guloumeipu ta,
amik kahak rui how the.
31 Nang rui meic guayna mikdaan khou,
chamdaanvloumei ta hei how the.
32 Jentailmei nunc khang tigaancloumei riw,
khatni nang mei Israelmei khang hymdaihmei e."
33 Mi hei kumcna mi angana lam khou hei saloumei khou tei kapui lev kapu ngak the. 34 Khoutei Simeon rui kaniw khou suaihiamlouna, kapui Meri khou sa the:
"Zauc lo, mi nac khou hei,
Israelmei meic mpeyna ta,
bow khang khatni ding thau khang tiilou kan the,
khatni mi nac hei,
meicnunc rui nuh zihna sa bammei tuang tei,
madanhmei tuang sw puni the;
35 Kumna meic mpeyna lungning ndauh pat puni the,
khou tei baengsaeng rui nang lungthw biw puni."
36 Khoutei Asher kaikhwangmei, Phanuel nac aluh, kazanc Anna twna kawmei karacpeic sihmei muhzwng gaanv khat nai khwan e. Kamei micna kagaanv lev tingkwm chanei lungclouna, 37 ntaw katingkwm riaktachatna padeih nganvmei hei may swna lungc bammeipuia khwan e. Kamei ravkai khou rui tat pat makna, zingbangc kalaanv kalumna, munthiangcna huayney bammeipui khwan e. 38 Mi dyng khou tei kaniw daeng khou guangna kamei rui Ravguangc ta thuancna, Jerusalem ta thuakloumei ta nkhwan bammei nunc khou mi angana lam khou tei salou the.
Nazareth khou Guang Datmei
39 Poubauhmei tuang Riakdanv thei layna taanc nimei thouc guay taanclou luai lana, kaniw Galili khou, kaniw ramc kaidai Nazareth khou hanc guang dat the. 40 Kumna mi angana tei kapumc lwan daic thauna, kapumtan tanc thau the; kamei ningting padik the, khatni Ravguangc zauzian kakhou nai khwan e.
Alauc Jisu Ravkai khou Bammei
41 Kumna Jisu pui pu tei tingkwm pum, Kaanpatpui Ngai khou Jerusalem thangc tat tanh tan bam khwan e. 42 Kamei tingkwm ruhna kanei tangc pwkhou, kariak thei layna, Jisu kapui kapu lev mi ngai khang tei Jerusalem khou ngangh the. 43 Nngay luaina, kapui kapu tei kai hanc dat pwkhou, alauc Jisu tei Jerusalem khou bam duc the. Tiki mi tei kaney thay mak khe. 44 Kamei lay tat bam khuangh de twna ningna kaney zaeng neih khat chaengkaemv tat guang the. Kumna kakai riangluaicmei khatni zaw thay zaw howmei pang khou kata phu the. 45 Tiki phu tow lam mak khena, kata phu khang kaney Jerusalem thangc hanc ngangh dat the. 46 Khoutei kamei Ravkai khou dinhpouc nunc pang khou dungcna, kaniw lat nkingna khatni kaniw khou lat thanvna bammei ta zaeng neih thumh tangv kaney ariw the. 47 Kalat tei chuloumei guay rui katuang takh khatni karam daw khou tei ngak the. 48 Kaney rui kata how pwkhou ngak the, kumna kapui rui, "Abung le, nang aney ta mi kumcna sw bammei hei tabui cho? Nang pu aney thu lungc geicna nang ta phu tat bam tu the," twna kakhou sa the.
49 Khoutei Jisu rui kapui kaney khou sa the, "Tabui swna nang ney ata phu bam tu cho? Ai apu kai khou bam nimei thouc e twmei nang ney thay mak nah cho?" 50 Khoutei kamei rui sa bammei kabac tei kaney thay mak khwan e.