4
Jisu ta Nthiammei
1 Jisu, Bumaengh Nthanmei rui padikna Jordan thangc rui guang dat khou, Bumaengh rui kata tazikramv thangc zaeng riakdei nduanghlou khwan e. 2 Mi khou tei Ravsic rui kata nthiam khwan e. Mi ganv lungc khou tei kamei tu zangv mak khwan e, kumna nkhamh khou ndaepc khwan the.
3 Khoutei, "Nang Ravguangc Nac Mpouh e thei, mi tauc but ta hei 'ntyan mbaih o' twna sa tio," twna Ravsic rui kakhou sa the.
4 Khoutei Jisu rui daw the, " 'Ntyan na rui meic ringh mak e' twna hylouna nai e."
5 Khoutei Ravsic tei rui Jisu ta kauh khou nduangh kuna kadyng khou mbaanv kapwm tuang guangcdic guay lyanlou the. 6 Ravsic tei rui kakhou sa the, "Mi guangcdic guay tuang ngamv khatni hymdaihmei hei ai rui nang khang tii puni; kalam thu mi hei abaanc khou tiilou the, kumna mi hei ai rui tiilou nii niimei khou tiilou e. 7 Kumna nang ahu khou nkhum keyna ata kalum e thei, mi guay hei nang tuang sw puni."
8 Khoutei Jisu rui sa the, " 'Poubauhmei nang Racguangc ta nang kalum nina e khatni kasiamruai na sw nina e' twna hylouna nai e."
9 Khoutei Ravsic tei rui kata Jerusalem khou nduangh guangna Ravkai twan pinh khou tidinglouna sa the, "Nang Ravguangc Nac Mpouh e thei, mi khou hei rui chamv key o; 10-11 'Nang ta gaeklou o twna katuang baanchara nunc khou sa puni, kumna nang phay ntauh khou kadyang mak khang kaniw baanc rui nang ta kapuanglou puni' twna hylouna nai e."
12 Khoutei Jisu rui sa dawna sa the, " 'Nang Racguangc Poubauhmei ta nang nchanv lak nina e' twna sa e."
13 Ravsic tei Jisu ta nthiam nimei guay nthiam tang lana, kadouchamei ganv ariw dat mak saanv khang kakhou rui tat kan the.
Jisu ta Nazareth khou Laaloumei
14 Jisu Bumaengh pumtan phungcna Galili khou guang dat the, kumna mi ramv gaengv zaengv kapwm khou tei kazanc dinc lik the. 15 Kamei rui kaniw tuang sinagog guay khou nchamlou the, kumna meic guayna rui kata thuanc the.
Jisu ta Nazareth Mei rui Laalou Makmei
16 Mi tangv Jisu kamei daic thaumei kaidai Nazareth khou guang the. Khoutei kamei katuang chav sw bammei thei layna, Sabbath neic sinagog ku the. Kumna Nthanmei Latrik pac khang kamei ding thau the. 17 Khoutei muhzwng Isaia tuang latrik zy kakhou tiilou the. Kumna kamei mi tei ric pat pwkhou, mi kumcna hylou bammei ariw the:
18 "Poubauhmei Bumaengc akhou bam e;
kalam thu lungcsimei nunc khou gaychamv dinh khang,
kamei rui ata suanglou the.
Bangclou bammei nunc khou ricloumei chamv,
khatni mik tiatmei nunc khou,
mik tirakloumei chamv dinc ndauh khang,
sin zyn bammei nunc ta tiduaklou khang,
19 khatni Poubauhmei tuang zauzian ganv kauc ndauh khang,
kamei rui ata ndiulou the."
20 Kumna Jisu latrik zy tei kazihlou datna baanri khou tiilou lana dungc key kan the. Khoutei sinagog khou bammei guay tei kata miktunna zauc the.
21 Khoutei kamei rui kaniw khou, "Aseic nangniw nking bammei Nthanmei Latrik khou hyloumei hei ntaw guang tangc bam the," twna sa the.
22 Khoutei kiuc dyng the twna meic guayna rui laalou the khatni kamwang khou rui patmei zauzian lat guay khou tei kaniw ngak the. Kumna, "Mi hei Joseph nac tei hamhna cho?" twna kaniw rui sa the.
23 Khoutei Jisu rui kaniw khou sa the, " 'Maipah le, nang rana nang ta tigay o' twmei latchap hei nangniw akhou suai makna sa puni. 'Nang rui Kapernaum khou taanclou kan e twna aniw chumei guay tei mi nang ramc kaidai khou hei taanclou o' twna sa puni.
24 "Ai rui nangniw khou kaling salou tuang e: Muhzwng ta karamc khou thu laalou mak e. 25 Tiki ai rui nangniw khou nchumhmei samei kiu mi hei e: Elija ganv khou tingkwm kathumh bw charuk ting key makna mi kandic kapwm khou tei nap nkow dai nkow khou tei, Israel khou maypui mpeyna nai kan de, 26 tiki Elija ta kaniw daeng khou ndiulou makna, Sidon kandih khou Zarephathh khou bammei maypui khat khou ndiulou kan e. 27 Khatni muhzwng Elisha ganv khou Israel khou mphaanhmei mpeyna nai kan de, tiki kaniw ta sw-nthanlou kan mak e; Suriamei Naaman ta tigaylou kan e."
28 Mi hei chu laa khou, sinagog khou bammei guay tei lungc puamc the. 29 Khoutei kaniw thauna kata kaidai paengc thangc nthau patna, kaniw tuang kaidai paengc khow khou phaic key khang nthau pat the. 30 Tiki kamei meic pang chung khou tei tat patna tat kan the.
Jisu rui Ravsic Nthau Ganhmei
31 Khoutei kamei Galili tuang Kapernaum kaidai khou key the, kumna Sabbath neic kamei rui meicnunc khou nchamlou bam khwan e. 32 Kamei rui nchamloumei khou tei kaniw ngak the, kalam thu kalat tei ngamv naimei lat khwan e.
33 Mi sinagog khou tei ravsic, simei bumaengc gutmeipu gaanv khat bam khwan e. Kamei rui kauc ranvna kaucna sa the, 34 "He Nazareth mei Jisu, nang aniw lev tabui sw khang naina cho? Aniw ta swmaan khang guang tu cho? Nang thow cho twmei ai thay e—nang hei Ravguangc tuang Nthanmeipu e!"
35 Khoutei, "Reih rei bam o! Kakhou rui tat pat tho!" twna Jisu rui kata luh the. Khoutei ravsic tei rui kata tei meic pang laa khou tei siauc keylouna, kata sw kabiu kabaeng makna kakhou rui tat pat kan the.
36 Meic guay tei ngakna, "Mi lat hei tabui tina cho? Kalam thu ngamv khatni pumtan naina simei bumaengc guay ruc khou latdanv pat tina kaniw tat pat kan the!" twna kaniw khat khat khou sa the. 37 Kumna kachamv tei Kapernaum gaengv zaengv khou tei chu lik sik kan the.
Jisu rui Meic Mpeyna ta Tigayloumei
38 Jisu sinagog khou tei rui tat patna Simon kai khou gut the. Khoutei Simon now pui ravmanc ranv sihna bam khwan e. Kumna kata tigaylou khang kaniw rui Jisu khou sa the. 39 Jisu kadaeng khou guang dingna ravman ta tei luh the; khou tei mi ravman tei kakhou rui tat kan the. Kumna kadyng khou kamei thauna kaniw siamruai sw the.
40 Neih key kan pwkhou, meicnunc rui ravpuatc kaza baih baihmei nnaumei guay ta Jisu daeng khou phungc guang the. Khoutei kaniw kathuic khou kabaanc bouclouna kaniw ta tigaylou the. 41 "Nang hei Ravguangc Nac Mpouh e!" twna kaucna meic mpeyna khou rui ravsic nunc ni tat pat khwan e. Kum tina kaniw ta luh the khatni lat sa khang nuhlou mak e. Kalam thu kamei Khrista e twmei ravsic nunc tei thay e.
Jisu Sinagog Guay khou Chamv Dinhmei
42 Tinggaanc pat pwkhou, Jisu mi kaidai tei mpatlouna meic khwan meic riang chu makpui bamv thangc tat kan the. Khoutei meicnunc tei kata phu the, kumna kaniw kata ariw pwkhou, kamei kaniw khou rui tat pat dat mak khang kham the. 43 Tiki, "Ravguangc Guangcdic tuang gaychamv hei ai kaidai baih baihmei khou ni dinc tat mak nuh mak e, kalam thu Ravguangc rui ata ndiu guangmei hei mi khang hei rui e," twna sa the.
44 Kumna kamei Judia tuang sinagog guay khou mi gaychamv hei dinc tat the.