4
Jisu ta Nthiammei
1 Mi tangv Ravsic rui nthiam khang, Bumaengh rui Jisu ta tazikramv khou nduangh kulou khwan e. 2 Kalaanv riakdei, zingbangc riakdei munthianghmei tangv, kamei ndaepc the. 3 Khoutei Nthiammeipu guangna kakhou sa the, "Nang Ravguangc nac mpouh e thei, mi tauc but nunc hei ntyan guanh khang sa tio."
4 Jisu rui mundawna sa the, " 'Ntyan na rui meic ringh mak e, tiki Ravguangc mwang khou rui patmei lat guay rui ringh khang de' twna hylouna nai e."
5 Mi tangv, Ravsic tei rui kata nthanmei kaidai khou nduangh gutna ravkai twan pinh khou tidinglou the. 6 Khoutei ravsic tei rui sa the, "Nang Ravguangc nac mpouh e thei, cham key o, 'Nang phay na sini ntauh khou kadyang kasic mak khang, kaniw rui nang ta kapuanglou khang, kamei rui katuang baanchara nunc khou sa puni,' twna hylouna nai e."
7 Jisu rui kakhou sa the, " 'Nang Racguangc Poubauhmei ta nchanv lak nina e,' twna ni hylouna nai e."
8 Ravsic tei Jisu ta kauh nganvmei chyngbut akhat khou nduangh kuna mbaanv guangcdic guay khatni mi tuang hymdaihmei guay lyanlou dat e. 9 Kumna, "Nang nkhum laemv keyna ata kalum e thei, mi guay hei nang khang tii puni," twna Ravsic tei rui sa the.
10 Khoutei Jisu rui kakhou sa the, "Tat kan o, Seitan! 'Nang Racguangc Poubauhmei ta kalum nina e, katuang siamruai na sw nina e,' twna hylouna nai e."
11 Khoutei Ravsic tei Jisu ta mpatlou the, kumna kauh baanchara nunc guangna kata nkhavlou the.
Jisu Chamv Dinc Kahouhmei
12 John ta nym kan the twmei chu lana, Jisu Galili thangc tat dat kan the. 13 Kumna kamei Nazareth mpatlouna, Zebulun khatni Naphtali ramv khou, zeihlat daeng khou naimei Kapernaum kaidai khou guang lungc kan the. 14 Mi tei muhzwng Isaia rui mi kumcna saloumei guang tangc khang e:
15 "Zebulun ramv khatni Naphtali ramv,
Galili duipui biak thangc,
Jordan paengc thangc naimei,
Jentailmei nunc bamv Galili!
16 Zinghmei khou bammei nunc,
gaanhriw daihmei how the.
Theihmei lim kandic khou bammei nunc khang ganclou the."
17 Jisu mi ganv khou tei rui thauna, "Nangniw lunghlaic tho, Tingkauh Guangcdic na the," twna dinc thau the.
Reymei Ziap nunc ta Kawmei
18 Jisu Galili zeiclat paengc khou tat guang khou, Pitar twna kawmei Simon lev kachana Andriu zeihlat khou tei chiakc phaic bammei ta how the. Kaney achuanh khwan e. 19 Khoutei, "Athei lay o, ai rui nang ney ta meic nymmei achuanc tiswlou puni," twna Jisu rui kaney khou sa the. 20 Mi dyng khou tei kaney tuang chiakc guay ganclouna Jisu thei lay the.
21 Mi khou tei rui tat pat dat pwkhou, baihmei chana gaanv nei—Zebedi nac mpouh Jakob lev kachana John, kapu Zebedi lev hih lungc khou kaniw chiak kasiamh bammei ta Jisu how the. Kumna Jisu rui kaney ta kaw the. 22 Mi dyng khou tei hih lev kaney pu ta ganclouna Jisu thei lay the.
Jisu rui Nnaumei ta Tigayloumei
23 Jisu sinagog guay khou nchamlouna, guanghdic tuang gaychamv dincna, khatni meicnunc tuang suan baengmei khatni sunu naunianmei guay tigaylouna Galili ramv kapwm khou ruanlou the. 24 Kachamv Suria kapwm khou chu lik the, kumna nnaumei guay, ravpuatc kaza baih baihmei khou rui sunu suan baengmei guay, ravsic gutmei, theilanhmei, khatni kapaek theihmei guay ta kadaeng khou phungc guang the, kumna mi guay tei kamei rui tigaylou the. 25 Galili, Dekapolis, Jerusalem, Judia khatni Jordan paengc khou rui meic kangdai Jisu thei lay the.