6
Jisu Sabbath Kaipouc e
1 Sabbath akhat khou, Jisu laupuk khou tat ruan pat khwan e. Khoutei kaziap nunc rui gehu guy chuncna kaniw baanc khou kanuaihna tu thau khwan e. 2 Khoutei Pharisi gaanv saekc rui, "Kariak thei layna Sabbath neic taanc nuh makmei tabui swna nangniw taanh tu cho?" twna sa the.
3 Khoutei Jisu rui kaniw khou sa the, "David rui kamei khatni kamei nunc ndaepcpui ganv khou tabui sw kan tu cho twmei nangniw pac zat mak he nah cho? 4 Kamei Ravguangc kai khou gutna amuh nunc na hamhna tu nuh makmei Ravguangc khou katloumei ntyan kamei tw kan e, kumna kamei nunc khang ni tii kan e."
5 Kumna Jisu rui kaniw khou sa the, " Meic Nac Mpouh hei Sabbath kaipouc e."
Kabaanc Akhat Theihmeipu ta Tigayloumei
6 Sabbath baihmei akhat khou, Jisu sinagog khou guangna nchamlou bam khou, baanzat baanc theihmeipu gaanv khat mi khou tei bam khwan e. 7 Khoutei Riakdanv tadin nunc khatni Pharisi nunc, kamei Sabbath neic tigaylou puni ny twna kakhuay phu khang kata zauc bam khwan e. 8 Jisu kaniw lungning tei thay lana, "Nang thauna hu khou guang ding o," twna kabaanc theihmeipu khou tei sa the. Khoutei kamei thauna mi khou tei guang ding the.
9 Khoutei Jisu rui kaniw khou sa the, "Ai rui nangniw khou thanv e: Kariak thei layna Sabbath neic swgayloumei nuh ny swluai nuh cho, khatni tiringclou nuh ni swluailou nuh cho?"
10 Kamei kaniw guay ta zauc kari kariangna zauc lana, mi pu khou tei, "Nang baanc ntyng pat o," twna sa a the. Khoutei ntyng pat the, kumna gay dat the. 11 Khoutei kaniw reic thau the, kumna kaniw Jisu ta tabui sw nuh puni cho twmei kaniw kaphianh thau the.
Jisu Ziap Ruhna Kanei Kapahmei
12 Mi ganv khou tei zaeng neih khat Jisu huayney khang chyng but thangc tat the, kumna mi khou tei Ravguangc khou huayney thangc the. 13 Tinggaanc pwkhou, kaziap guay ta kadaeng khou kaw guangna, kamei rui latdiutatmei nunc twmei zancphuakh tiiloumei ruhna kanei ta kapah the. Mi nunc kiu thu: 14 Kamei rui Pitar twna ni phuakloumei Simon khatni kachana Andriu, Jakob, John, Philip, Bartholomiu, 15 Matthiu, Thomas, Alphais nac mpouh Jakob, Zealot kawmei Simon, 16 Jakob nac mpouh Juda, khatni Jisu ta zuanctumei Judas Iskariot, mi guay hei e.
Jisu rui Nzaengc khou Nchamloumei
17 Jisu kaniw lev keyna kazaengcmei bamv akhat khou ding the. Khoutei kaziap meic kangdai khatni Judia kapwm khou rui, Jerusalem khou rui, khatni duipui paengc ramv Tur lev Sidon khou rui guangmei meic kangdai bam khwan e. 18 Kaniw hei kalat nking khang khatni kaniw tuang sw nu tigaylou khang guangmei nunc e. Simei bumaengc nunc rui sw ryanra bammei guay ta tigaylou khwan e. 19 Kumna meic guayna tei kata kahi khang karamc khwan e, kalam thu kakhou rui pumtan patna kaniw guay ta tigaylou khwan e.
Neihlamei khatni Ryanramei
20 Khoutei Jisu kaziap nunc ta zaucna sa the:
Lungcsimei nunc nangniw hei sangaymei nunc e;
Ravguangc Guangcdic hei nangniw khang e.
21 Ntaw ndaepcna bammei nunc nangniw sangaymei nunc e;
nangniw ta ti-nggulou puni.
Ntaw kap bammei nunc nangniw sangaymei nunc e;
kalam thu nangniw nuic puni.
22 "Meic Nac Mpouh zaeng rui meicnunc rui nangniw ta karaeng pwkhou, nangniw khou latsic latrou salou pwkhou, khatni nangniw zanc satowmei na sini simei tuang e twna, kaniw pang khou rui alay ganclou pwkhou, nangniw sangaymei nunc e.
23 "Mi ganv khou tei nangniw neihla o, neihlana kachuamh o; kalam thu zauc lo, tingkauh thangc nangniw tuang swan daic e. Kalam thu kaniw pupouc nunc rui mi hei kumcna muhzwng nunc ta sw kanmei tuang e.
24 "Lungcgaymei nunc nangniw sansi e dav!
Nangniw amanvmei laatow tangv the!
25 Ntaw nggu bammei nunc nangniw sansi e dav!
Nangniw ndaepc puni.
Ntaw nuic bammei nunc nangniw sansi e dav!
Nangniw puihuayna kap puni.
26 Meic guayna rui nangniw ta sa chuy bammei,
nangniw hei sansi e dav!
Kaniw pupouc nunc rui guatmei muczwng nunc ta mi hei kumcna sw kan the.
Zauczihmei ta Nzianmei
27 "Tiki alat nking bammei nangniw khou ai rui sa tuang e: Nangniw ta zauczihmei nunc ta nzian o, nangniw ta karaengmei nunc khang gaymei swlou tio, 28 nangniw ta siangloumei nunc khou suaihiamlou tio, khatni nangniw khou latsic latrouc saloumei nunc khang huayneylou tio. 29 Nang biangc kaphi pw e thei kabiak akhat tei ni nzuhlou tio. Nang phey asut kanmeipu tei rui nang tuang thiula ni laa ni tw e thei tii tio. 30 Neymei guay khang tii tio, kumna thowkumhmei rui nang tuang laa kan e thei, mi tei ney dat ri tho. 31 Meickai rui nang khou swlou pw tu laa niimei tei nang rui meickai khang swlou tio.
32 "Nangniw ta nzianmei nunc na ta nangniw nzian e thei, nangniw ta thuanckulou khang tabui naina cho? Paapcmei nunc tei sini kaniw ta nzianmei nunc ta thu nzian muai de. 33 Nangniw khang gaymei swloumei nunc khang na tei nangniw gaymei swlou e thei, akumhna nangniw suaihiam laatow nina cho? Paapcmei nunc ni mi tei kumcna sw de! 34 khatni nangniw khang khangclou dat khang lwmgaymei nunc na khang nangniw tipoulou e thei, nangniw ta thuanckulou khang tabui naina cho? Paapcmei nunc sini tiiloumei zu tei khangclou dat khang paapcmei nunc khang tipoulou muai de. 35 Tiki nangniw ta zauczihmei nunc ta nzian o, kaniw khou gayna swlouna, ramh khat na sini tii dat pungh e twmei ning makna tii pat o. Kum e thei nangniw tuang swan daic puni, khatni nangniw Kauh Liangmeipu nac nunc sw puni. Kalam thu kamei thu meic huath thay makmei khatni meicsimei nunc ta sini nzianloumeipu de. 36 Nangniw Pu zauzian thaymei kumcna, nangniw ni zauzian thay o.
Meickai ta Latzan Swmei
37 "Latzan sw rio, kum ti thei, nangniw ta ni latzan sw mak puni; khuay phu rio, kum ti thei, nangniw khuay ni phu mak puni. Kuaklou o, kum ti thei, nangniw ta ni kuaklou puni. 38 Tii o, kum ti thei, nangniw khang tiilou puni; baanh daicna, nym keyna, kanuk padikna, nsuang lyamna nangniw pamv khou guang bunlou puni. Kalam thu, nangniw rui ndatmei dath tei rui nangniw khang ni ndatlou dat puni."
39 Jisu rui kaniw khou mi latgiam hei ni salou khwan e: "Mik tiatmei rui mik tiatmei ta chaeng zay nuh di nah cho? Kaney gaanv nei khunh khou keylou pu lak nah cho? 40 Ziap akhat tei katuang dinhpouc suangc mbu mak e, tiki kamei thay nimei guay thay nthuih e thei, katuang dinhpouc lev nchamc puni.
41 "Nangniw mik khou thing paek naimei tei thu thay makna, tabui swna nang chana mik khou nrouc naimei ta tei how bam tu cho? 42 Nang mik khou thing paek naimei ta tei thu how makna, 'Chana le, nang mik khou nrouc naimei tei ai laa ganclou pumc e,' twna nang chana khou nang akumhna sa ngam nina cho? Kakheswmei nang, nang mik khou naimei thing paek tei laa ganc rey o, kumc e thei nang chana mik khou naimei nrouc tei laa ganh khang nang how nthan puni.
Thingbang khatni Kathai
43 "Karav gaymei thing bang rui kathai simei nthai mak e, karav simei thing bang rui ni kathai gaymei nthai mak e. 44 Thingbang ta tei kathai rui dinc e. Sauh bang khou tadut thay nthai mak e, sauhmuanhna bangc khou ni luairyn thai nthai mak e. 45 Meic gaymei rui gaymei lanvkai kalung khou rui gaymei laa pat e, khatni meicsimei rui simei ryloupui bamv kalung khou rui simei laa pat e. Kalam thu kalung khou padikna naimei khou rui kamwang khou rui sa tuang e.
Ningtyngmei khatni Mpangmei tuang Kai
46 "Nangniw ata 'Poubauhmei, Poubauhmei' twna kaw lana, ai rui samei thu tabui swna taanh mak tu cho? 47 Akhou guangna ai rui samei guay chu lana taanhpui mei tei, tabui kumhpui mei lev nchamc cho twmei ai nangniw khou dinclou puni. 48 Kamei tei ntiangh khunc chau nthuk keyna ntauh ruc khou ntiangh lingclouna kai swmeipu tei kumh tuang e. Dui daic guangna mi kai ta tei duithuat rui guang nunc sini mi tei kalung mak e, kalam thu mi tei sw ntipna swlou the. 49 Tiki alat chu lana taanh makpui mei tei thu ntiangh khunc ruangc key makna, syniang ruc khou kai swmeipu tei kumhmei tuang e. Duithuat rui kai ta tei guang nunc pwkhou bow kasicna bow kan the."