5
Jisu Kaziap khang Kaw Reymei
1 Zaeng neih khat meic kangdai Ravguangc lat nking khang Jisu daeng khou huamc bam khwan e. Khoutei kamei Gennesaret zeiclat paengc khou ding bam khwan e. 2 Mi khou tei, chiakc khiu bammei achuanh nei tuang hic kanei dui tin khou lou bammei ta kamei how the. 3 Khoutei hih akhat khou, mi kiu Simon tuang hic khou, gut lana dui tin khou rui chau gut maih khang kakhou sa the. Kumna kamei hih khou tei dungc key lana meic kangdai khou tei nchamlou the.
4 Kamei sa tangv pwkhou, "Dui nthukmei thangc gut o, kumna nangniw chiak guay tei mpat key o," twna Jisu rui Simon khou sa the.
5 "Kaipouc, aniw zingbangc karamc thangc the, tiki khat na sini nym tow mak e. Tiki nang rui samei thei layna ai mpat key ni the," twna Simon rui daw the.
6 Kumna kaniw mpat key tikhou khav pang kangdai akhat gauc bin the, kumna kaniw tuang chiak kaek ni kumc the. 7 Khoutei hih baihmei khou bammei kaniw pam nunc ta tei guang nkhavlou khang baanh zaepna kaw the. Khoutei kaniw guangna hih kanei tei lou padikna, mi kanei tei limc ni kumc the.
8 Mi tei how lana, Simon Pitar tei Jisu phay daeng khou nkhum keyna, "Poubauhmei, akhou rui tat patlou kan o; ai thu paapcmei de!" twna sa the. 9 Simon khatni kapam nunc tei kaniw khav heizu nymmei khou tei ngak the. 10 Simon pam Zebedi nac Jakob lev John ni kazauh muai the.
Khoutei Jisu rui Simon khou sa the, "Ping rio; ntaw rui thauna nang maansei nymmei achuanc sw puni the." 11 Kumna kaniw tuang hic nei tei dui paengc khou zay patlouna, ramh guayna ganclouna kaniw Jisu thei lay tat the.
Mphaanhmei Gaanv Khat ta Tigayloumei
12 Jisu kaidai akhat khou, bam khou mphaanh tabut thuth thutmeipu gaanv khat Jisu ta how lana kahu khou pun nkhum laemv keyna, "Kaipouc, nang rui chwnmei e thei, nang thu ata sw-nthanlou a ngam de!" twna huaycha the.
13 Khoutei Jisu kabaanc haemv patna kata kahina, "Ai chwn the, nang nthan tho!" twna sa the. Mi dyng khou tei mphaanhmei ravpuatc tei kakhou rui tat kan the.
14 Meic gaanv khat na khou sini mi tei raclou mak khang Jisu rui kata kakimlou the. Kumna, "Nang amuh daeng thangc tat tho; nang nthan the twmei meicnunc thay khang Mousi tuang latdanv thei layna, pumh nthanmei puatkat kat tho," twna kakhou salou the.
15 Tiki Jisu lam khou tei dinc lik hay hay tat kan the, kum tina kalat nking khang khatni kaniw tuang sw nu tigaylou khang meic kangdai kadaeng khou guang the. 16 Tiki kamei meic pang khou tei rui tazikramv thangc tat patna huayney raph rap bam khwan e.
Jisu rui Kapaektheihmei Gaanv Khat ta Tigayloumei
17 Zaeng neih khat mi kumna pat khwan e. Jisu nchamlouna bam khou, Galili khatni Judia tuang namv guay khou rui khatni Jerusalem khou rui guangmei Pharisi nunc khatni Riakdanv tadin nunc mi khou tei dungc bam khwan e. Kumna nnaumei ta tigaylou khang Poubauhmei tuang pumtan kakhou nai khwan e. 18 Khoutei meicnunc rui kapaektheihmei gaanv khat ta kazy khou louna puanc guangna, kainung gutna Jisu hu khou lou khang karamc khwan e. 19 Tiki meic geic langv tina gut nuhmei thiak maek laana, kainam kuna mi pu ta tei kainam khou rui kazy mpamc meic laa khou Jisu hu khou mpat key the.
20 Kaniw ramlum tei how lana, "Nggaanvbungc, nang paap guay kuaklou the," twna Jisu rui sa the.
21 Khoutei, "Ravguangc ta sw chapavna sa bammei kamei hei thow cho? Ravguangc na hamhna thow rui paapc kuaklou ngamna cho?" twna Pharisi nunc khatni Riakdanv tadin nunc kaniw lungning khou kakhanh thau the.
22 Kaniw mi kumcna kakhanh bammei ta hei thay lana, Jisu rui kaniw khou sa the, "Nangniw tabui kakhanh bam tu cho? 23 'Nang paap guay kuaklou the,' twna samei chiw ni, 'Thauna tat tho,' twna samei chiw cho? 24 Tiki Meic Nac Mpouh hei paapc kuaklou khang kandih khou ngamv nai e twmei nangniw thay khang ... (Kamei rui kapaektheihmeipu khou tei sa the) Ai rui nang khou sa e: Thauna nang zy laa thauna nang kai thangc tat tho." 25 Mi dyng khou tei kamei kaniw hu khou ding thauna, kazy laa thauna Ravguangc hym thuancna kakai tat kan the. 26 Khoutei meic guayna ngak the, kumna Ravguangc hym thuanc the. Kaniw pingmei rui padikna, "Aseic aniu charynmei taanv how the," twna sa the.
Levi ta Kawmei
27 Mi tangv Jisu tat pat dat pwkhou, kazanc Levi twna kawmei dihkhav kakhameipu, dihkhav laamei kai khou dungc bammei ta how lana, "Athei lay o," twna Jisu rui kakhou sa the. 28 Khoutei kamei thauna ramh guayna ganclouna Jisu thei lay tat the.
29 Khoutei Levi rui kakai khou, Jisu ta napkawmei mung daihmei akhat raengclou the. Mi khou tei dihkhav kakhamei nunc meic mpeyna khatni meic baih baihmei mpeyna kamei lev dungc nchamc bam geic khwan e. 30 Khoutei Pharisi nunc khatni kaniw tuang Riakdanv tadin nunc rui nuancna, "Nangniw tabui swna dihkhav kakhamei nunc khatni paapcmei nunc lev tu nchamc zangv nchamc bam tu cho?" twna kaziap nunc khou sa the.
31 Khoutei Jisu rui mundawna sa the, "Pumh gaymei nunc khang maipah kage maek e; nnaumei nunc khang de. 32 Ai guangmei thu ravchaptatmei nunc ta kaw khang hamh e, tiki paapcmei nunc ta lunghlaih khang kaw khang de."
Munthianghmei Lam Jisu khou Thanvmei
33 Khoutei kaniw rui Jisu khou, "John ziap nunc thu katupna munthiangcna huayney bam e. Mi tei kumcna Pharisi nunc ziap nunc ni sw bam muai e, tiki nang ziap nunc thu twna zangvna bam e cho?" twna sa the.
34 Khoutei Jisu rui kaniw khou sa the, "Nowpouc kamei bam khou nowpouc pam nunc ta tei timunthiangc bam nuh dinah cho? 35 Tiki nowpouc ta tei kaniw khou rui laa tat kanmei ganv guang puni. Mi ganv khou kiu kaniw munthiangc puni."
36 Jisu rui kaniw khou mi latgiam hei sa the: "Meic gaanv khat na sini phey thanh khou rui kakiak siat patna, phey raan khou khuamlou mak e. Mi kumcna sw e thei, kamei rui phey thanh tei siat kaeklou puni, khatni phey thanh kiak tei ni karaan tei lev nchamc ni tu hamh e. 37 Gaanv khat na sini gihmuanc raan khou luairyn zouc thanh lou mak e. Lou ti thei, luairyn zouc thanh tei rui muanh tei swbak puni, kumna luairyn zouc ni muanh tei ni maan puni. 38 Luairyn zouc thanh thu gihmuanc thanh khou lou nina de. 39 Meic gaanv khat na sini luairyn zouc kaguangc zangvlou kan e thei, kathanc thu zangv dat nii mak khe, kalam thu 'Kaguangc rui zangv gay de' twna kamei sa puni the."