8
Mphaanhmeipu ta Tigayloumei
1 Jisu luanghbut thangc tei rui key dat khou, meic kangdai kathei lay key khwan e. 2 Khoutei mphaanhmei gaanv khat guangna kahu khou khuksun keyna "Poubauhmei, nang rui nuh e thei, ata sw-nthanloua ngam e," twna sa the.
3 Jisu kabaanc haemv patna mi pu ta tei kahilouna, "Ai nang ta sw-nthanlou nii the, nthan tho," twna sa the. Mi dyng khou tei mi pu tei mphaanhmei gay dat kan the. 4 Khoutei Jisu rui kakhou sa the, "Nang meic gaanv khat na khou sini mi hei salou nuh mak e. Tiki amuh khou tei lyan tat tho, kumna nang gay dat the twmei meic guayna thay khang, Mousi tuang latdanv thei layna khaengmei taanv tei taanc tho."
Rihpy Gaanv Khatpu Bangc ta Tigayloumei
5 Jisu Kapernaum khou gut pwkhou, Rommei rihpy gaanv khat kadaeng khou guangna kakhou huaychana, 6 "Poubauhmei, abangc gaanv khat kapaek theicna ryanra sihna kai thangc zip bam e," twna sa the.
7 Khoutei, "Ai guangna tigaylou puni," twna Jisu rui sa the.
8 Mi pu tei rui mundawna sa the, "Poubauhmei, nang guanglou bam khang akai kumhmei hei thu biuh mak e. Nang tuang latkaeng na sa patlou o, kumc e thei abangc tei gay dat puni de. 9 Kalam thu, ai hei ngamv naimei bangc khou bammei akhat e, khatni abangc khou ni rihmei nunc nai e. Ai rui rihmei gaanv khat ta 'Tat o' tw ti thei kamei tat e, khatni rihmei gaanv khat ta 'Guang o' tw ti thei kamei guang e. Ai rui abangc ta 'Mi hei taanc o' tw ti thei kamei taanc e."
10 Jisu rui mi tei chu la khou, kakhang kadath dat the, kumna kathei lay bammei nunc khou tei sa the, "Ai nangniw khou kaling salou tuang e: Mi pu hei kumcna lwmmei Israelmei pang khou nganv ai gaanv khat na sini ariw mak e. 11 Ai rui nangniw khou samei hei e: Tingkauh Guangcdic tuang ngai khou neihpat neihkey thangc rui meic mpeyna guangna Abraham, Isaak, khatni Jakob lev dungc nchamc puni. 12 Mi ganv khou kiu guanghdic nac nunc ta tei kapaengc zinghmei khou phaiclou tina, mi khou tei kapna huh khaic ndyang kariakh riak bam puni."
13 Khoutei Jisu rui Rommei rihpypu khou tei sa the, "Tat tho, nang rui lwmmei thei layna tigaylou puni the." Mi dyng khou tei kabangc tei gay dat kan the.
Jisu rui Meic Mpeyna ta Tigayloumei
14 Jisu Pitar kai khou guang pwkhou, Pitar now pui ravmancna kalaeng khou zip bammei ta how the. 15 Jisu rui mi pui baanc tei kahilou tina ravmanhmei tei gay dat kan the, kumna kamei thauna Jisu siamruai sw the.
16 Mi nungc zingbangc tei, ravsic gutmei meic mpeyna ta kadaeng khou laa guang khwan e. Jisu rui ravsic nunc ta tat pat khang latdanv patna alay ganclou khwan e, khatni nnaumei guay ta tigaylou khwan e. 17 Mi hei "Kamei rui aniu tuang sunu guay laa ganclou the khatni aniu tuang ravpuatc guay phungc ganclou the" twna muhzwng Isaia rui saloumei tei guang tangc khang the.
Jisu Thei Laymei Thukh
18 Jisu rui meic kangdai kadaeng khou bammei ta how lana, zeihlat paengc akhat thangc pat khang kaziap nunc khou sa the. 19 Khoutei Riakdanv tadin gaanv khat kadaeng khou guangna, "Dinhpouc, nang tatpui bamv kathuic ai nang thei lay ni," twna sa the.
20 Jisu rui kakhou sa the, "Asacsi nunc khang kakai nai e, kauh samhmei nruayna nunc khang ni kabou nai e, tiki Meic Nac Mpouh khang thu kapy mbaeng keyna zaengswloupui bamv maek e."
21 Baihmei ziap gaanv khat rui Jisu khou, "Poubauhmei, ai akai tatna apu ta mbeihlou rey ni he," twna sa the.
22 Tiki Jisu rui, "Athei lay o, theihmei ta thu theihmei nunc rui mbeih khang ganclou ti tho" twna sa the.
Jisu rui Pwanzingh Khaemloumei
23 Khoutei kamei hih akhat khou gut the, kumna kaziap nunc kathei lay tat the. 24 Zeihlat khou tei pwanzingh tanhmei guang the, kumna hih tei dui luat rui liak bin guang the; tiki Jisu thu zip ri bam khwan e. 25 Ziap nunc tei kadaeng khou guangna kata nchyang thauna, "Poubauhmei, aniu ta gulou o! Aniu theic puni the!" twna sa the.
26 Kamei rui kaniw khou sa the, "Lwmmei nthyammei nunc, tabui swna nangniw heidi ping bam tu cho?" Khoutei kamei thauna pwanzingh khatni dui luat ta tei luh the. Khoutei rimh rim key kan the.
27 Khoutei kaniw tei ngak the. Kumna, "Pwanzingh khatni duipui rui nganv kalat piu bammeipu hei akumhpui mei lana cho?" twna kaniw rui sa the.
Ravsic Gutmei Nei ta Tigayloumei
28 Jisu zeihlat paengc akhat thangc, Gadaramei ramv khou guang pwkhou, ravsic gutmei gaanv nei taroulang khou rui patna kata ariw khwan e. Kaney tei heidikamv kheihsi e, twmei thu, mi chaeng tei meic tat ruan bauh mak bam khwan e. 29 Zauc lo, kaney rui kaucna sa the, "Ravguangc Nac Mpouh, nang aney ta tabui sw nina cho? Kaganv tangh mak khou aney ta riap ni the twna guang tu cho?"
30 Kaniw khou rui duc hak mak thangc guak kangdai akhat kataek mpac bam khwan e. 31 Ravsic nei tei rui Jisu khou huaychana, "Nang rui aney ta nthau pat e thei, guak nunc khou tei ndiulou o," twna sa the.
32 Khoutei, "Tat tho," twna Jisu rui kaney khou sa the. Kumna patna guak nunc khou tei gut kan the. Guak pang tei dui khuangc khou saeng keyna zeihlat khou saenglouna theic ngam kan the.