4
Napphwn Nroumei Latgiam
1 Jisu Galili zeiclat paengc khou nchamlou thau dat khwan e. Khoutei meic kangdai kadaeng khou huamc guang tina kamei hih khou gutna dungc key the. Kamei dui lungc khou, kumna meic kangdai tei dui paengc khou bamv the. 2 Khoutei kamei rui latgiam zayna kaniw khou lat mpeyna nchamlou khwan e. Kamei rui nchamloumei khou tei mi kumcna kaniw khou sa the:
3 "Nking o! Meic gaanv khatpu napphwn nrou khang tat pat the. 4 Kamei rui nrou pat khou asaekc chaengluang khou keylou the, kumna nruayna nunc guangna mi tei tu kan the. 5 Asaekc rui niang katitnamei taulaengc ruc khou keylou the. Niang katitna tina mi tei katumcna thau pat the, 6 tiki neih tanc pat pwkhou kamaan maek tina mi tei phauc luai kan the. 7 Asaekc rui sauh bang ding khou keylou the, kumna sauh bang nunc tei daic thauna mi ta tei zyn luai kan the. Kumna mi tei kathai nthai mak khe. 8 Asaekc rui kandih gaymei khou keylou the. Mi guay tei kak patna daic thau the, kumna kathai nthai the: asaekc rui kathw tamruc, asaekc rui riakcharuk, asaekc rui phay khat nthai the."
9 Khoutei Jisu rui sa the, "Chu khang nukuanc naimei guay chu laa tho!"
Latgiam Zayna Samei Lam
10 Jisu karana bam khou kadaeng khou bammei nunc khatni kaziap ruhna kanei tei rui mi latgiam lam khou tei thanv the. 11 Khoutei kamei rui kaniw khou sa the, "Ravguangc Guangcdic tuang meic thay makmei tei nangniw khou dinclou the, tiki mpaeng thangcmei nunc khang thu latgiam khou rana salou the. 12 Kalam thu, kaniw zaucna zaucna how mak khang khatni chuna chuna kabah thay mak khang e. Kum mak e thei kaniw lunghlaic guang datna kaniw ta kuaklou dat kan puni na e."
Napphwn Nroumei Latgiam Kabac Dinhmei
13 Khoutei Jisu rui kaniw khou sa the, "Nangniw mi latgiam kabac hei thay mak nah cho? Kum e thei akumhna nangniw latgiam guay kabac hei thay ngam nina cho? 14 Napphwn nroumeipu tei rui lat nrou the. 15 Lat tei nroupui bamv khou meic gaanv saekc thu chaengluang khou keyloumei thw kumhmei tuang e. Kaniw rui lat tei chupuilev kaluak kalat Seitan guangna kaniw khou nrouloumei lat tei laa ganc kan the. 16 Mi tei kumcna taulaengc ruc khou keyloumei nunc kiu mi hei e: Lat tei chu pwkhou kaniw kaluak kalat neihlana laalou the. 17 Kaniw khou kamaan maek e, tiki matak khat thu khaengvlou the. Kumna lat zaeng rui ryanramei hamh e thei rairiumei guang pwkhou kaniw bow nuangc kan the. 18 Baihmei sauh bang ding khou keyloumei nunc kiu mi hei e: Kaniw lat tei chu the, 19 tiki mbaanv tuang kadanmei, lanv kahawmei khatni baih baihmei ta kahawmei rui lat ta tei zyn luai the. Kumna mi tei kathai nthai mak khe. 20 Kandih gaymei khou nrouloumei kiu mi hei e: Kaniw lat tei chu lana laalou the, kumna kathw tamruc, riakcharuk khatni phay nthai the."
Thauhmai Latgiam
21 Khoutei Jisu rui kaniw khou sa the, "Nangniw thauhmai laa guangmei tei kahyang khou dungclou khang hamhna giupaekc bangc khou hamh e thei laeng bangc khou lou khang di nah cho? 22 Kalam thu nkamhlou bammei guay tei ndauh pat khang e, khatni gum binlou bammei guay tei laanc pat khang e. 23 Chu khang nukuanc naipui mei tei chu kan diu!"
24 Khoutei Jisu rui kaniw khou sa the, "Nangniw chumei tei zauc chuy laa tho. Nangniw rui ndatloumei dath tei nangniw khang ndatlou dat puni, kumna hap sini haplou puni. 25 Kalam thu naipui mei khang tei tiilou puni; khatni maekpui mei khou tei rui kakhou naimei na tei sini kakhou rui laa tat kan puni."
Nap Bwan Thaumei Latgiam
26 Khoutei Jisu rui sa the, "Ravguangc Guangcdic kiu mi hei kumh tuang e: Gaanv khatpu rui kalaupuk khou kathw nroulou the. 27 Zingbangc kalaanv kamei zip kan khou ni rak bam khou ni kabwan thau patna daic thau the. Mi tei akumhna daic thau cho twmei kamei thay mak e. 28 Kandih rui rey liang khou kanuy, mi tangv kaguy tipat the. Kumna kaguy khou tei nap thu minc pat the. 29 Nap tei minc pat rappuilev kamei baengkhuai sinna tay the. Kalam thu taypui ganv tangc the."
Gannaeng Thw Latgiam
30 Jisu rui sa the, "Ravguangc guangcdic hei tabui lev kida kho cho, hamh e thei mi khang hei tabui latgiam sinsw kho cho? 31 Mi hei gannaeng thw kumhmei tuang e: Lingc keypui ganv khou thu kandih nam ruc khou nthyam liangmei thw swna lingclou the. 32 Tiki mi tei lingc keylouna thaupui ganv khou thu, gan bang pang khou daic liangmei bang sw dat the. Kachy tadi tadi baanc patna mi phwam khou tei nruayna nunc kabou dwan the."
33 Mi kumhmei latgiam mpeyna rui Jisu rui kaniw khou, kaniw rui chulou diw saanv lat dinc the. 34 Latgiam kazauh makna kaniw khou sa mak e, tiki kaniw rana bam datpui ganv khou, kamei rui mi guay tuang kabac guay tei kaziap nunc khou dinclou dat khwan e.
Jisu rui Pwanzingh Khaemloumei
35 Mi tangv tingzyn key pwkhou Jisu rui kaziap nunc khou, "Aniu zeihlat kaan pat di kho," twna sa the. 36 Kumna meic kangdai ta tei ganclouna Jisu dungc bammei hic khou ziap nunc tei gutna kaniw rui kata nduangh tat the. Mi khou tei hih baih baihmei ni nai khwan e. 37 Khoutei pwanzingh tanhmei guangna dui luat rui hih khou tei guang kapyang the. Kumna hih tei dui rui padik ni kumc the. 38 Khoutei Jisu thu hih mai thangc pyban mbanna zip bam khwan e. Khoutei kaniw rui kata nchyang thauna, "Dinhpouc, aniu theic ngam nina bammei ta hei nang thu kadanmei tuang maek nah cho?" twna sa the.
39 Khoutei kamei thauna pwanzingh ta tei luhna, "Reih rei o! Rimh rim o!" twna zeihlat khou tei sa the. Khoutei pwanzingh tei nthaekc kan the khatni nchwng rimh rim kan the. 40 Khoutei kamei rui kaniw khou sa the, "Nangniw tabui swna hei di ping bam tu cho? Akumh tina nangniw khou lwmmei maekna cho?"
41 Khoutei kaniw ping dai ping the, kumna kaniw khat khat khou, "Mi pu hei akumhpui mei lana cho! Pwanzingh khatni duipui rui nganv kalat piu mei hei" twna sa the.