8
Jisu Thei Lay Tatmei Pui nunc
1-2 Mi tangv hei Jisu kaidai guay khatni namv guay khou tatlouna, Ravguangc Guangcdic tuang gaychamv dinc ndauhlou khwan e. Mi khou tei kaziap ruhna kanei khatni simei bumaengc gutmei khatni sw numei khou rui tigayloumei ntumei nunc kathei lay tat khwan e. Mi nunc kiu thu: Kakhou rui ravsic chanei nthau ganclou kanmei Magdalamei Meri twna kawmei pui; 3 Herod kai khou tamthiwmei Khuza now Joanna; Susanna; khatni baih baihmei mpeyna hei e. Mi pui nunc hei kaniw tuang syan lanv phungc patna Jisu khatni kaziap nunc siamruai sw bammei nunc e.
Napphwn Nroumei Latgiam
4 Kaidai kaidai khou rui meicnunc guangna kadaeng khou meic kangdai guang kachunc bam khou, latgiam swna Jisu rui sa the: 5 "Lautaanhmeipu gaanv khat kathw nrou khang pat the. Kamei rui nrou patmei tei asaekc chaengluang khou keylou the, kumna mi tei ni bin the khatni nruayna rui tu kan the. 6 Asaekc rui ntauh ruc khou keylou the, mi tei thau pat pwkhou theic key kan the; kalam thu kaniw khang dui maek khe. 7 Baihmei asaekc rui sauh ding khou keylou the, kumna sauh bang thau pat kariuna mi ta tei zyn luai kan the. 8 Baihmei asaekc rui kandih gaymei khou keylou the, kumna mi tei thau pat lana nroulou kanmei suangc phay khat mbuna nthai the."
Mi hei sana, "Chu khang nukuanc naimei guay chu laa tho!" twna kamei rui kauc the.
Mi Latgiam Kabac
9 Mi latgiam kabac hei tabui cho twna kaziap nunc rui kakhou thanv the. 10 Khoutei Jisu rui daw the, "Meic thay makmei Ravguangc Guangcdic tuang tei nangniw khou dinclou the, tiki meic baihmei khang thu, 'kaniw how bam sini how mak khang khatni chu bam sini kabah thay mak khang' latgiam swna sa tuang e.
11 "Mi latgiam kabac kiu thu mi hei e: Kathw kiu thu Ravguangc lat tei e. 12 Chaengluang khou keyloumei nunc kiu thu, lat tei chulou pwkhou, kaniw lwmna, guloumei laa kan mak khang, Ravsic guangna lat tei kaniw lungc khou rui laa ganc kanmei nunc tei e. 13 Ntauh ruc khou keyloumei nunc kiu thu, kaniw lat tei chu pwkhou neihlana laalou the, tiki kamaan maek tipui zaeng rui kaganv asaekc lwm the, tiki nchanvmei guang pwkhou bow kanmei nunc tei e. 14 Sauh bang ding khou keyloumei kiu thu, lat tei chu the tiki, kandih lungc amanv khang kapaemvmei, syan lanv khatni nungngai amanvmei rui zynna kathai nthai ngam makmei nunc tei e. 15 Kandih gaymei khou keyloumei kiu thu, kalip kalei maekmei khatni gaymei lungning khou lat tei chulou lana, mi tei sin ntipna khaengv thayna kathai nthaimei nunc tei e.
Thauhmai Latgiam
16 "Meic gaanv khat na sini thauhmai daanc lana ramh rui gum binlou mak e, laeng bangc khou ni lou mak e; tiki kainung khou tat gutmei guay rui how khang kahyang khou dungclou e. 17 Ntheihlou bammei guay tei ndauh pat puni the, khatni gum binlou bammei guay tei laanc pat puni the.
18 "Mi zaeng rui, nangniw nking chuy laa tho. Naipui mei khang tei tiilou hap puni; tiki maekpui mei khang tei thu, kakhou nai e twna kamei kakhanh bammei tei na sini kakhou rui laa tat dat kan puni."
Jisu Pui khatni Kachana nunc
19 Neih khat Jisu pui khatni kachana nunc kata ariw khang guang khwan e. Tiki meic geic langv tina kadaeng khou guang tangc ngam mak khwan e. 20 Khoutei, "Nang pui khatni nang chana nunc nang ta ariw niina kaizaeng khou ding bam e," twna kakhou salou the.
21 Khoutei Jisu rui sa the, "Apui khatni achana nunc kiu thu Ravguangc lat chu lana piu bammei nunc tei the."
Jisu rui Duipui Puanzingc Khaemloumei
22 Neih khat mi kumcna pat khwan e. Jisu kaziap nunc lev hih tuangcna, "Zeihlat paengc akhat thangc kaan pat kho," twna tat khwan e. 23 Kaniw mi kumcna tat bam khou, kamei zip ri kan the. Khoutei ting pwanzingh guang the. Kaniw tuang hic tei dui chungc padik thau the. Kumna nkhan ni kumc the.
24 Khoutei kaniw Jisu daeng khou guangna, "Kaipouc, kaipouc, aniu theic puni the!" twna sana nchyang thau the. Khoutei Jisu thauna pwanzingh khatni dui luat ta tei luh the. Kumna pwanzingh tei nchwng kan the, rimh rim the. 25 Khoutei, "Nangniw ramlum kiu tabui tei thah?" twna Jisu rui kaniw khou sa the.
Khoutei kaniw ping the khatni ngak the. Kumna, "Mpwan khatni dui rui nganv katuang latdanv piu pwmei pu hei tu kumhpui mei lana cho?" twna kaniw khat khat khou sa the.
Ravsic Gutmeipu ta Tigayloumei
26 Mi tangv kaniw hih tuangcna, Galili khou rui dui paengc akhat thangc naimei Gerasamei a ramv khou pat khwan e. 27 Jisu hih khou rui dui paengc tat pat rap khou, mi kaidaimei, ravsic gutmeipu gaanv khat kata ariw the. Mi pu tei kaganv tingsaengcna pheybaan piu makna khatni kai khou lungc makna, theihmei ta mbeihloumei khowlang khou kabamv swna bammeipu khwan e. 28 Kamei Jisu ta how pwkhou, kauc rah ndyna kahu khou pun nkhum laemv keyna, kauc ranvna, "Kauh Liangmei Racguangc Nac Mpouh Jisu, nang lev anei tabui sw khang naina cho? Nang khou zaenghuaypui tuang e: Ata riaplou rio," twna sa the. 29 Kalam thu Jisu rui simei bumaengc ta tei mi pu khou tei rui tat pat tho twna sa the. Tabui cho tiki, katup sihna mi tei rui kata sinsw the, kumna kata pareiriang khatni kang rui bangclouna gaek bam tisini, mi guay tei ding chaek mak khe. Kumna ravsic tei rui kata tazikramv thangc zay tat raph rap the.
30 Khoutei Jisu rui, "Nang zanc thow cho?" twna thanv tikhou, "Legion" twna kamei rui daw the. Kalam thu ravsic mpeyna kakhou gut bam khwan e. 31 Khoutei kaniw ta kangkhunc b khou ndiulou mak khang Jisu khou huaycha the.
32 Mi khou tei chyng naek khou guak kangdai akhat kataek mpac bam khwan e. Kumna kaniw ta guak nunc khou tei ndiulou khang ravsic nunc tei rui Jisu khou huaycha tina kamei rui mi tei nuhlou the. 33 Ravsic nunc tei mi pu khou tei rui patna, guak nunc khou tei gut the. Khoutei guak nunc tei khow khum khou tei saeng keyna zeih khou tei nlip luai ngam kan the.
34 Mi tei how laa khou, guak sianmei nunc tei pak tatna, kaidai khou tei khatni namv guay khou tei poulou the. 35 Kumna mi tei zauc khang meicnunc guang geic the. Kaniw Jisu daeng khou guang pwkhou, ravsic nunc tat pat kanmeipu tei pheybaan piuna meic paek pat nthan thiakna, Jisu daeng khou dungc bammei ta how pwkhou, kaniw ping the. 36 Ravsic pang gutmeipu ta tei tigaylou kanmei ta howmei guay rui mi tei akumhna tigaylou kan tu cho twmei meicnunc khou tei raclou the. 37 Khoutei Gerasamei ramv khou bammei guay tei ping langv lana, Jisu ta mi khou tei bam mak khang sa the. Kumna kamei hih tuangcna tat dat kan the.
38 Kakhou rui ravsic nunc tat pat kanmeipu tei rui kathei lay tat khang Jisu khou zaenghuay the, tiki Jisu rui kata kakai thangc ndiulou datna sa the, 39 "Nang kai thangc tat dat tho, kumna Ravguangc rui nang khang adih daicna taanclou cho twmei raclou ti tho?" Kumna mi pu tei tat lana, Jisu rui kakhang adih daicna taanclou cho twmei mi kaidai kapwm khou tei raclou the.
Jairas Nacpui khatni Ntumei Ravpuatc Phunghmeipui
40 Ntaw Jisu hanc guang dat pwkhou, kata nkhwan bammei meic kangdai rui kata riu the. 41 Khoutei kazanc Jairas twna kawmeipu, sinagog tuang kapy gaanv khat guangna Jisu hu khou pun nkhum laemv keyna, kakai khou guang khang huaycha the. 42 Kalam thu kanac aluh akhat namei, tingkwm ruhna kanei doumeipui nnauna theic ni kumcna bam khwan e.
Kumna Jisu tat patmei chaenglwan khou, meic kangdai kata hic luai ni kumcna tat bam khwan e. 43 Tingkwm ruhna kanei zeina, meic gaanv khat na rui sini tigaylou ngam makna c bammei pui kaniw pang khou bam khwan e. 44 Kamei meic pang khou rui Jisu thei khou guangna, kaphey tin kahi the, khoutei kadyng khou zei nthaekc kan the.
45 Khoutei, "Ata kahimei tei thow cho?" twna Jisu rui sa the.
"Ai the" twmei meic gaanv khat na sini maek tikhou, Pitar rui, "Kaipouc, meic kangdai rui nang ta hicna tat bam di the cho?" twna sa the.
46 Khoutei, "Meic gaanv khat ata kahi the; akhou rui pumtan pat kanmei ta ai thay the," twna Jisu rui sa the.
47 Khoutei kamei nkamh ngam ni tu hamh the twmei thay lana, kadunhna guangna, Jisu hu khou khuksun key the. Kumna tabui zaeng rui kata kahi tu cho khatni akumhna kadyng khou kata tigaylou tu cho twmei mathiuc hu khou kamei rui sa the.
48 Khoutei, "Alu le, nang lwmmei paan rui nang ta tigaylou the. Chuzaenghna tat tho," twna Jisu rui kakhou kadylou the.
49 Jisu rui sa bam khou, sinagog tuang kapypu Jairas kai thangc tei rui meic gaanv khat guangna, "Nang nac aluh tei theic the; dinhpouc ta sw ryanra bam dat nangh khe," twna Jairas khou sa the.
50 Mi tei chu lana, Jisu rui Jairas khou, "Ping rio; lwm o, kamei gay dat puni de." twna sa the.
51 Kumna Jairas kai tei guang tangc pwkhou, Pitar, John, Jakob khatni angana pui pu ta na hamhna meic baihmei ta kathei kainung tigut mak e. 52 Mi ganv khou tei, meic guayna tei kapna huayna bam khwan e. Khoutei, "Kap taan tho; kamei theih mak e, zip bam tu de," twna Jisu rui sa the.
53 Kamei theic the twmei thay lana, kaniw Jisu ta nuic the. 54 Tiki kamei rui kabaanc zayna, "Alu le, thau tho!" twna kaucna sa the. 55 Khoutei kabumaengc hanc guang dat the, kumna kamei kadyng khou ding thau the. Khoutei, "Ramh tu khang tii ti tho," twna Jisu rui sa the. 56 Mi khou tei kapui kapu tei ngak the. Mi tei meic gaanv khat na khou sini salou nuh mak e twna kaniw khou kadylou the.