7
Rommei tuang Rihpy Gaanv Khat Ramlum
1 Jisu kamei rui meicnunc khou salou niimei lat guay salou tangv lana, Kapernaum khou gut the. 2 Mi khou tei Rommei ricpy gaanv khat bam khwan e, kumna mi pu tei kamei rui nzianmei bangc gaanv khat theic ni kumcna nnau bam khwan e. 3 Kamei Jisu lam khou chu lana, kamei guangna kabangcpu ta kiu tigaylou khang kaw khang, Jihudimei gaanvdaih nunc ta ndiulou khwan e. 4 Kumna kaniw Jisu daeng khou guangna huaycha ranv sihna sa the, "Mi pu khang hei, mi hei swlou biuc rapmei tuang de. 5 Kamei hei aniu zaat ta nzianmeipu e, kumna aniu khang sinagog kai swloumeipu e." 6 Khoutei Jisu kaniw lev tat the.
Jisu kai daeng na guang pwkhou, rihpypu tei rui kapam nunc ta ndiulouna sa the, "Kaipouc, nang akhang ryanra bam nangh khe, kalam thu ai kumhmei thu nang ta akai bangc khou kaw guang bam khang biuh mak e. 7 Kumna ai ni nang daeng khou guang khang biuh mak e. Tiki nang tuang latkaeng sa patlouna abangc ta hei tigaylou di tho. 8 Ai hei ni ngamv naimei bangc khou bammei mei e, kumna abangc khou ni rihmei nunc nai muai e. Ai rui mi pu ta hei 'tat o' tw ti thei kamei tat the, baihmei gaanv khat ta ni 'guang o' tw ti thei ni kamei guang the. Ai rui abangc ta, 'Mi hei taanc o,' tw ti thei kamei taanc the." 9 Mi tei chu pwkhou Jisu kata ngak the, kumna karih patna kathei laymei nunc khou sa the, "Ai nangniw khou sa tuang e: Mi kumcna lwmmei hei Israelmei pang khou nganv ai ariw mak he," 10 Khoutei ndiuloumei nunc tei kai khou guang dat pwkhou, mi bangcpu tei gay dat bammei ta ariw the.
Maypui Nac ta Tigayloumei
11 Mi tangv asaanh makna a mi kumcna pat khwan e. Jisu kaziap nunc khatni meic kangdai kathei huamc buih buina Nain kawmei kaidai thangc tat khwan e. 12 Kamei mi kaidai raengcmun na guang khou, theihmei gaanv khat ta puanc pat khwan e. Mi pu kiu maypui nac, kapui napuan khou karav namei mpouh khwan e. Meic kangdai mi kaidai khou tei rui kapui tei lev lay pat khwan e. 13 Poubauhmei mi pui ta tei how pwkhou ningngam mak khe. Kumna, "Kap rio," twna sa the.
14 Khoutei Jisu guangna, theihpuanhpaeng tei kahi the, kumna theic puanhmei nunc tei ding the. Khoutei, "Nggaanvbungc le, ai rui nang khou sa e: Thau tho," twna Jisu rui sa the. 15 Khoutei theihmeipu tei thau dungcna lat sa thau the. Kumna Jisu rui kata kapui khou nsinlou kan the. 16 Khoutei meic guayna ping the, kumna, "Aniu pang khou muhzwng daihmei guang the! Ravguangc kamei nunc ta nkhavlou khang guang the!" twna sana Ravguangc ta thuanc the. 17 Mi Jisu chamv hei Judia kapwm khou zin lik kan the.
Jisu khatni Duiluploumei John
18-19 Kumna mi guay hei John khou kaziap nunc rui poulou the. Khoutei John rui kaziap gaanv nei ta kaw lana, "Guang nimeipu kiu nang the ni, hamh e thei, mi kiu baihmei di he cho?" twmei Poubauhmei khou thanv o twna ndiulou the.
20 Kaney Jisu daeng khou guangna, " 'Guang nimeipu kiu nang the ni, hamh e thei, mi kiu baihmei di he cho?' twmei nang khou thanv o twna Duilupmei John rui aney ta ndiulou pwna guang tuang e," twna sa the.
21 Mi ganv kahak khou tei Jisu rui ravpuatc naimei, suc numei khatni simei bumaengc gutmei mpeyna ta tigaylou bam khwan e, khatni mik tiatmei mpeyna ta tihowlou bam khwan e.
22 Khoutei Jisu rui kaney khou mundawna sa the, "Nang ney tatna, nang ney rui how kanmei khatni chu kanmei guay tei, twmei thu: mik tiatmei nunc ta tihow dat bammei, kaphay baumei nunc ta titat dat bammei, mphaanhmei nunc ta sw-nthanlou b dat bammei, nu ndymei nunc chu dat bammei, theihmei nunc ta tiringcthaulou dat bammei khatni lungcsimei nunc khou gaychamv dinclou bammei; mi guay hei John khou raclou ti tho. 23 Ata lwmsi makmei nunc tei sangaymei nunc e."
24 John rui ndiu guangmeipu nei tei tat dat kan pwkhou, Jisu rui meic kangdai khou tei John lam khou sa the, "Nangniw tabui ta zauc khang tazikramv khou tei pat tu cho? Mpwan khou kahai bammei ntou bang nunc ta tei cho? 25 Kiuc hamh e thei, nangniw tabui ta zauh khang pat tu cho? Karuhpwan piumei nunc ta cho? Mi kumhmei kakhe kare swna kamanv kunghmei karuhpwan piumei nunc tei thu guanghkai khou bam tuang de. 26 Kum e thei, nangniw tabui ta zauc khang pat tu cho? Muhzwng ta cho? Ngguay, kiuc e, ai rui nangniw khou sa tuang e: Kamei muhzwng suangc daihmei e. 27 'Nang khang chaeng sw khang ai rui atuang latdiumei ta nang hu khou ndiulou puni,' twna saloumei kiu mi pu ta hei the. 28 Ai rui nangniw khou sa tuang e: Ntumei rui puanhmei pang khou John suangc daihmei maek khe; tiki Ravguangc Guangcdic khou nthyam liangpui mei tei kakhang suangc daic e."
29 (Kalat tei chumei guay, dihkhav kakhamei nunc nganv John khou rui duilupna, Ravguangc nchumh e twmei laalou the. 30 Tiki Pharisi nunc khatni Riakdanv tadin nunc thu kamei rui duilupmei khou tei kazauh makna, Ravguangc rui kaniw ta sw pw tu kahawmei tei kaniw sw mak khe.)
31 "Ntaw kin khou lungc bammei nunc ta hei tabui lev kida kho cho? Kaniw hei tabui kumc bu cho? 32 Kaniw hei alauc nunc khanghbamv khou dungcna, 'Aniw nangniw khang nlim muanlou tii ni, nangniw alaemh mak e; aniw theihlu suanlou tii ni, nangniw kap mak e,' twna khat khat khou kauc bammei tei lev nchamc the. 33 Kalam thu Duilupmei John rui ntyan tu mak, luairyn zouc ni zangv makna guang tina, 'Kamei ravsic gut lana the,' twna nangniw sa e. 34 Meic Nac Mpouh hei tu ni tu zangv ni zangv twna guang tina, 'Zauclo, kamwang agaemvmei, zouh mbamei, dihkhav kakhamei nunc khatni paapcmei nunc ta kapam swpui mei,' twna nangniw sa e. 35 Tiki Ravguangc Ningting hei nchumh e twmei thu mi tei piumei nunc tei rui thay e."
Kapaap Geihmeipui rui Jisu khou Thauh Teyloumei
36 Pharisi gaanv khatpu rui kakai khou nap tu khang kaw tina Jisu mi pu kai khou kiu guang dungc bam khwan e. 37 Kumna mi kaidai khou tei ntumei paapcmei gaanv khat nai khwan e. Pharisi kai khou tei Jisu nap tu khang guang bam e twmei mi pui tei chu lana, mwndui thauc alabastar haan akhat sinna guang khwan e. 38 Khoutei kamei Jisu thei khou kaphaypav daeng khou dingna kapna, kaphay tei kamikdui rui zow timclou the. Khoutei kamei Jisu phay khou keyloumei kamikdui tei kasam rui thut phuina, kaphay tei kaputna, kaphay khou tei mwndui thauc tei bun patna teylou the.
39 Khoutei kata nap kawmei Pharisi tei, mi tei how pwkhou, "Mi pu hei muhzwng e thei, kata kahi bammei pui hei thow cho khatni tu kumhmei pui cho—twmei thu kamei paapcmei e twmei kamei thay ni tuang e," twna kalung khou kakhanh bam khwan e.
40 Khoutei mundawna, "Simon, ai nang khou ramh khat salou khang nai e," twna Jisu rui sa the.
Khoutei, "Dinhpouc, salou o," twna kamei rui daw the.
41 "Meic gaanv nei syan alimei gaanv khat pu tuang syan pow phungc khwan e. Gaanv khat rui denari c phay panguh, baihmei gaanv khat rui riakngu pow phungc khwan e. 42 Kaney tei khangc dat ngam mak tii thena, kaney pow tei kuaklou the. Mi nei khou tei thow tei rui kata nzian mbu puni cho?"
43 "Kapow kuaklou geihmeipu tei khuangh the twna ning e," twna Simon rui daw tikhou, "Nang tuang latzan nchumh the," twna Jisu rui kakhou sa the.
44 Khoutei Jisu mi pui biak tei karih patna, Simon khou sa the, "Nang mi pui ta hei how bu cho? Ai nang kai khou guang e, aphay khiu khang nang dui tii mak e; tiki kamei thu, kamikdui rui aphay khiulou the, kasam rui thut phuilou the. 45 Nang thu ata kaputlou mak e, tiki mi pui hei thu, ai mi khou hei gut rap khou rui aphay kaputmei taek mak e. 46 Nang thu apy khou thauh teylou mak e, tiki kamei thu aphay khou mwndui thauc teylou the. 47 Mi zaeng rui, ai rui nang khou sa tuang e: Kapaap guay kuaklou kan the. Kum tina kamei nzian diangc bam tuang e. Tiki katitna kuakloupui mei tei rui katitna nzian e."
48 Khoutei Jisu rui mi pui khou tei sa the, "Nang paap guay kuaklou the."
49 Khoutei, "Paapc nganv kuakloumeipu kamei hei thow cho?" twna mi khou tei dungc nchamc bammei nunc tei kaniw pang khou sa thau the.
50 "Nang ramlum rui nang ta gulou the; chuzaenghna tat tho," twna Jisu rui mi pui khou tei kadylou kan the.