11
Duiluploumei John rui Ndiu Guangmei nunc
1 Mi kumna pat khwan e: Jisu kaziap ruhna kanei khou tei dinclou tang lana, kaniw tuang kaidai guay khou nchamlou khang khatni chamv dinh khang mi khou tei rui tat pat khwan e.
2 John Khrista tuang taanv guay tei kangkai khou rui chu lana kaziap nunc ta ndiu guangna, 3 "Guang nimeipu kiu nang the ni, hamh e thei mi kiu baihmei di he cho?" twna kakhou thanv the.
4 Jisu rui mundawna sa the, "Nangniw rui chu kanmei khatni how kanmei tei John khou guang salou ti tho: 5 Mik tiatmei nunc how dat bam the, phay baumei nunc tat dat bam the, mphaanhmei nunc ta sw-nthanloua dat bam the, nu ndymei nunc chu dat bam the, theihmei nunc ta tiringcthaulou dat bam the, khatni lungcsimei nunc khou gaychamv dinclou bam the. 6 Akhou phaysuy makpui mei tei sangaymei e."
7 John ziap nunc tei tat dat kan khou, Jisu rui John lam khou, meic kangdai khou tei sa the, "Nangniw tazikramv khou tei tabui ta zauh khang pat tu cho? Mpwan nliu kalung bammei ntou bang ta zauh khang cho? 8 Mi tei hamh e thei, tabui ta zauh khang nangniw pat tu cho? Pheynuaih piumei ta zauh khang cho? Zauc lo, pheynuaih piumei nunc thu guangh kai nunc khou bam tuang de. 9 Kum e thei, tabui ta zauh khang pat tu cho? Muhzwng ta zauh khang cho? Ngguay, ai rui nangniw khou sa tu e: muhzwng suangc daihmei ta zauh khang e.
10 'Zauclo, ai rui atuang latdiumei
nang hu khou ndiulou e,
kamei rui nang hu khou nang khang
chaeng kasiamhlou puni,'
twna hyloumei tei mi pu lam khou hei the.
11 "Ai rui nangniw khou kaling salou tuang e: ntumei rui puanhmei pang khou Duilupmei John suangc daihmei lungc guang mak he; tiki Tingkauh Guangcdic khou nthyam liangmei tei kakhang suangc daic e. 12 John rui duilupmei khou tei rui thauna ntaw nganv, Tingkauh Guangcdic hei baantan patna adow gut bam e,b kumna pumtan naimei nunc rui mi hei asutna laa the. 13 Kalam thu John guang mak saanv muhzwng nunc khatni Riakdanv rui dinc kasuakclou the. 14 Nangniw laalou nii e thei, guang punimei Elija kiu kamei hei the. 15 Nukuanc naimei kathuic chu kan diu.
16 "Mi meickin ta hei tabui lev kida nina cho? Kaniw hei alauc nunc kaithyan bamv bamv khou dungcna, 17 'Aniw nangniw khang nlim muanlou e, tiki nangniw alaemh mak e; aniw rui theih lu suanlou e, tiki nangniw latlu mak e,' twna khat khat khou kauc bammei tei di the. 18 Kalam thu John tei guangna tu mak zangv makna lungc tiki, 'kakhou ravsic gut tina e,' twna kaniw rui sa e. 19 Meic Nac Mpouh guangna tu zangvna lungc tiki, 'Zauclo, tu nii zangv niipui mei, zouh mbamei, dihkhav kakhamei khatni paapcmei nunc pam' twna kaniw rui sa e. Tiki Ravguangc ningting ta thu nchumh e twmei kataanv rui lyan e."
Lunghlaih Makmei Kaidai nunc Sansi e dav!
20 Khoutei Jisu rui katuang ngamv daihmei taanv geihmei taanclou kanmei kaidai nunc ta luh thau the. Kalam thu kaniw lunghlaih mak khwan e. 21 "He Khorazin, nang hei sansi e dav! He Bethsaida, nang hei sansi e dav! Nang ney khou taanclou kanmei ngamv daihmei taanv guay tei Tur lev Sidon kaidai khou taanclou bam khwan e thei, kaney thu khaemseiphey piuna, mbut lowna theihdouc rui lunghlaic kan ni tuang di the. 22 Ai rui nang ney khou sa e: latzan nungc kiu nang ney tuang latzan hei Tur lev Sidon tuang latzan suangc nrit puni. 23 He Kapernaum, nang ta tingkauh puanc ku tangcloumei ta nang kahaw bu cho? Nang ta taruaih khou zay keylou puni. Nang khou taanclou kanmei ngamv daihmei taanv guay tei Sodom khou taanclou bam khwan e thei, mi kaidai tei ntaw nganv nai bam kan ni tuang e. 24 Ai rui nangniw khou sa tuang e: Latzan nungc kiu nangniw tuang latzan hei Sodom tuang latzan suangc nrit puni."
Akhou Guangna Zaeng Nthaekc o
25 Mi ganv khou tei Jisu rui sa the, "He apu, tingkauh khatni kandih kaipouc, nang rui mi guay hei ningtyngmei nunc khou nkamhlouna angana nunc khou ndauhloumei khang nang ta thuancku e. 26 Ngguay apu, mi hei nang rui ningmei e.
27 "Kaguayna apu rui akhou tiilou the. Pu tei hamhna gaanv khat na sini Ka Nac Mpouh ta thay mak e khatni Ka Nac Mpouh tei rui kata ndauhlou khang kapahloumei nunc tei hamhna gaanv khat na sini Pu ta tei thay mak e.
28 "Taanv ranvna taancna khatni puatc nritmei phungcna lakmei thiu, nangniw akhou guang o, ai rui nangniw ta timalalou puni. 29 Atuang puat hei nangniw laa thauna phungc o, kumna akhou rui ncham o. Kalam thu ai hei lungh nzaenghmei e khatni lungh niamhmei e, kumna nangniw zaeng nthaekcmei laatow puni. 30 Kalam thu, ai rui nangniw ta tiphungc nimei puat hei chiw e khatni nthaan e."