10
Jisu Ziap Ruhna Kanei Zanc
1 Kamei rui kaziap ruhna kanei ta kaw patna simei bumaengc guay ta nthau ganh khang khatni ravpuatc guay khatni sunu guay tigaylou khang kaniw khou ngamv tiilou the. 2 Latdiutatmei ruhna kanei zanc kiu mi hei e: reymei khou, Pitar twna kawmei Simon khatni kachana Andriu; Zebedi nac mpouh Jakob khatni John; 3 Philip khatni Bartholomiu; Thomas khatni dihkhav kakhamei Matthiu; Alphais nac mpouh Jakob khatni Thaddia; 4 Kananai kawmei Simon khatni Jisu ta zuanctumei Judas Iskariot.
Ziap nunc ta Ndiu Patmei
5 Mi ruhna kanei ta hei Jisu rui ndiulouna, kaniw khou mi kumcna kadylou the: "Nangniw Jentailmei pang khou tat riu, Samariamei tuang kaidai guay khou ni tat riu; 6 tiki maan kanmei lauziu—Israelmei khou tat o. 7 Nangniw tatna, 'Tingkauh Guangcdic na the,' twna dinc tat o. 8 Nnaumei ta tigaylou o, theihmei ta tiringc thau o, mphaanhmei ta sw-nthanlou o, ravsic guay ta nthau ganc o. Nangniw kamanv tii makna laa the, kamanv laa makna tii o. 9 Nangniw bungkam khou syan—kachaekc tuang ni, daandi tuang ni, kuanri tuang ni phungh riu. 10 Nggin khau ni phungh riu; thiula saplai lev phaythuapc ni phungh riu; builwang ni sin riu. Taanv taanhpui mei khang thu kabung khang tiilou puni.
11 "Kaidai khou pwni, namv khou pwni, nangniw gut pwkhou, nangniw bangvloumei kai khang phu o, kumna nangniw tat dat mak saanv mi kai khou tei bam o. 12 Mi kai khou tei nangniw gut pwkhou chuzaenghmei suaihiam suaiclou o. 13 Mi kai tei nangniw ta riulou e thei, nangniw tuang chuzaenghmei tei mi kai khou tei nai bam kan diu; tiki nangniw ta riulou mak e thei nangniw tuang chuzaenghmei tei nangniw khou hanc guang dat kan diu. 14 Nangniw ta laalou mak e thei khatni nangniw lat nkinglou mak e thei, nangniw mi kai khou tei rui hamh e thei mi kaidai khou tei rui tat pat dat ni khou, nangniw phay niang tei kadiw keylou ducna tat o. 15 Ai rui nangniw khou kaling salou tuang e: latzan nungc kiu mi kaidai tuang latzan Sodom lev Gomorra tuang latzan suangc nrit puni.
Rairiumei Guang Nimei
16 "Zauc lo, nangniw ta, lauziu ta angiw pang khou ndiulou kumc ndiulou tuang e. Mi zaeng rui nangniw nrui kumc ntak nrak o khatni akhouhna kumc nriakc o. 17 Nangniw suriak thay o; meicnunc rui nangniw ta peikai khou tiilou puni khatni kaniw tuang sinagog khou bai puni. 18 Alam khou rui nangniw ta guanghkhyn nunc khatni guangh nunc hu khou zay guang puni. Mi tei rui kaniw khou khatni Jentailmei nunc khou nangniw alam khou dinclou khang e. 19 Kaniw rui nangniw ta latzan bamv khou zay guang pwkhou, tabui lat sa nina cho khatni tabui kumhna sa nina cho twna lungh katuakc riu. Nangniw sa nimei lat kadyng khou tiilou puni. 20 Kalam thu, nangniw rui sa nina hamh e; nangniw Pu Bumaengc tei rui nangniw ta tisa nina de.
21 "Chana rui kachana ta, khatni pu rui kanac ta swluai khang tii pat puni. Nah nunc rui kapui kapu ta akhangv adangvna swluai puni. 22 Nangniw ta meic guay rui, azaeng rui karaeng puni, tiki katwan nganv khaengv ngampui mei ta tei gulou puni. 23 Nangniw ta kaidai akhat khou rai pw e thei, baihmei kaidai akhat thangc pak tat o. Ai rui nangniw khou kaling salou tuang e: Meic Nac Mpouh guang makmei hu khou nangniw Israel tuang kaidai guay khou taanc liklou ngam ni tu hamh e.
24 "Ziap akhat tei kata nchamloumeipu suangc mbu mak e; bangh tei ni ka kaipouc suangc mbu mak e. 25 Ziap akhat tei kata nchamloumeipu khatni bangh tei ka kaipouc kumc e thei biuc the. Tampypouc ta Beelzebula twna kaw e thei, kakai kaikhunhmei nunc ta thu mi suangc adih sina kaw puni thah!
Thow ta Ping Nina Cho?
26 "Mi zaeng rui, kaniw ta ping riu. Ntaw gum binlou bammei hei laanc pat pu ni, khatni nkamhlou bammei hei ndauh pat puni. 27 Ai rui nangniw khou zingh khou saloumei hei, nangniw kalaanv gaanh khou sa nina e; nangniw nukuanc khou suaina saloumei hei, kainam khou rui kauc nina e. 28 Meic pumc ta swluai ngam sini bumaengh ta thu swluai ngam makmei nunc ta tei ping riu; tiki pumh ta ni bumaengh ta ni maikwam khou swmaan ngammeipu ta ping o. 29 Tingkavna kanei manv paic akhat na hamhna cho? Kum sini, nangniw Pu rui nuhloumei maekna tingkavna akhat na sini kandih khou taek key ni tu hamh e. 30 Nangniw ta thu nangniw tuang sam lu guay nganv kasing chaklou bam tuang de. 31 Mi zaeng rui, ping riu; nangniw thu tingkavna mpeyna khang suangc sini kamanv kunghmei de.
Khrista ta Sa Ndauhmei
32 "Thowkumhmei, kamei amei e twna meicnunc hu khou sa ndauhpui mei ta tei, ai rui ni tingkauh thangc bammei aPu hu khou kata amei e twna sa puni. 33 Tiki meicnunc hu khou kamei amei hamh e twna sapui mei ta tei, ai rui ni tingkauh thangc bammei aPu hu khou kamei amei hamh e twna sa puni.
Chuzaenghmei Hamhna Suc Rih de
34 "Ai guangmei hei kandih khou chuzaenghmei phungc guang tuang e twna ning rio. Ai guangmei hei chuzaenghmei phungc guang khang hamh e; suc rih phungc guang khang de. 35 Kalam thu ai guangmei hei kanac lev kapu kak khou, kanac aluh lev kapui kak khou, kamauc lev kaneic kak khou tizauczihlou khang de. 36 Kaikhunh akhat na khou khat khat ta zauczih puni the.
37 "Ata suangc kapui kapu ta nzian mbupui mei tei amei sw khang biuh mak e; ata suangc kanac mpouh aluh ta nzian mbupui mei tei amei sw khang biuh mak e; 38 khatni katuang theihchouc phungcna athei lay makpui mei tei amei sw khang biuh mak e. 39 Thow pwni karingcpaan daekloupui mei tei, mi tei maan puni; tiki thow pwni akhang rui karingcpaan maanloupui mei tei ringhpaan laatow puni.
Swan
40 "Nangniw ta laaloupui mei tei ata laalou tu e, khatni ata laaloupui mei tei ata ndiu guangmeipu ta laalou tu e. 41 Muhzwng akhat ta muhzwng e twna laaloupui mei tei muhzwng tuang swan lay laa puni, khatni ravchaptatmeipu ta kamei ravchaptatmei e twna laaloupui mei tei ravchaptatmeipu tuang swan lay laa puni. 42 Mi nthyammei nunc ta hei sini kamei aziap e twna duichu buangc sini tiiloupui mei tei, ai rui kaling salou tuang e: Katuang swan khat sini maan lak e."