13
Jerusalem Ravkai Swmaan Nimei
1 Jisu Ravkai khou rui tat pat dat khou, kaziap gaanv khat rui kakhou sa the, "Dinhpouc, zauc lo, mi kumhmei tauc guay ramgai khatni mi kumhmei kai guay ramdai hei!"
2 Khoutei Jisu rui kaniw khou sa the, "Mi kai daihmei guay ta hei nangniw how boh? Mi khou hei ntauh akhat ruc khou ntauh akhat nsaplou bam dat ni tu hamh the. Pangv key makna gancloumei nai dat lak khe."
Ryanramei khatni Rairiumei
3 Jisu Oliv Chyng khou Ravkai ta dungc achowna karana bam khou, Pitar, Jakob, John khatni Andriu rui mi kumna thanv the, 4 "Mi kiu tabui ganv khou puni cho? Mi guay kiu guang tangc puni the twmei thay nuhmei madanhmei tuang tabui nai cho? Aniw khou dinclou o."
5 Khoutei Jisu rui kaniw khou sa the, "Meic gaanv khat na rui sini nangniw ta zay mbiangh mak khang suriak thay o. 6 Meic mpeyna azanc khou guangna, 'Ai hei Khrista the,' twna sana meic mpeyna ta zay mbiangh puni. 7 Rih adowpui khwan khatni rih adow bampui chamv mpeyna chu thau pwkhou nangniw kaluang rio. Mi tei pat mak nuh makna pat puni the. Tiki mi tei kandih luai nimei thu hamh e. 8 Kalam thu zaatc akhat rui zaatc akhat ta khatni guanghdic akhat rui guanghdic akhat ta zauczih thau puni. Kabamv mpeyna khou baengla zay puni, nap nkow puni. Mi hei narui thaumei e.
9 "Nangniw rana nangniw khang suriak thay o: Nangniw ta latzan kai khou zaylou puni khatni sinagog khou bai puni. Azaeng rui nangniw dihsinpouc nunc khatni guangh nunc hu khou kaniw khou sakhi tii khang ding puni. 10 Kumna gaychamv hei zaatc guayna khou dinc liklou rey puni. 11 Kumna kaniw rui nangniw ta nymna latzan kai khou zay guang pwkhou tabui lat sa nina cho twna lungc ryanra rey bam nangh e. Kadyng kadyng khou tiiloumei tei nangniw sa o. Kalam thu sa nimei hei nangniw hamh e, Bumaengh Nthanmei rui sa puni de. 12 Chana rui chana ta khatni pu rui nah ta swluai khang tii pat puni, khatni nah nunc rui kapui kapu ta nuhmu thauna tiswluai puni. 13 Kumna nangniw ta azanc zaeng rui meic guayna rui karaeng puni. Tiki khaengv suakpui mei ta tei gulou puni.
Meic Ping Chanymei
14 "Tiki kamut kamaimei tuang mphuammei puat tei nai bam lak nipui bamv khou ding bammei ta how pwkhou, (pahpui mei tei rui kabah thay kan di tho), Judia khou bammei nunc chyng ram thangc pak tat kan diu, 15 kainam khou bam nanghpui mei tei ni kakai kainung khou naimei puat laa khang key dat mak kan diu, 16 laupuk khou bam nanghpui mei tei ni pheybaan laa dat khang guang dat mak kan diu. 17 Mi ganv khou tei nahguam bam nanghmei khatni angana puanc nouc bam nanghmei pui nunc tei kasan simei e da! 18 Mi hei tingsei khou patlou mak khang nangniw huayney o. 19 Kalam thu mi ganv lungc khou kiu, Ravguangc rui mbaanv damclou rap khou rui pat zat kan makmei khatni pat dat lak nimei ramrianra ryanra puni. 20 Kumna Poubauhmei rui mi ganv dak tei ti-duilou mak khwan e thei, meic gaanv khat na sini duak ngam lak e. Tiki kamei rui kapahloumei nunc khang kamei rui mi ganv dak tei ti-duilou the.
21 "Mi ganv khou kiu, thowkumhmei rui, 'Zauclo, mi khou hei Khrista bam the', hamh e thei 'mi thangc tei bam the' twna sa pw sini nangniw lwm rio. 22 Nuh e thei, kapahloumei nunc ta zay mbiangh khang guatmei Khrista khatni guatmei muczwng nunc guangna sw nchinmei khatni charynmei taanv mpeyna taanc puni. 23 Tiki nangniw suriak thay laa tho! Ramh guayna nangniw khou sa kasuakclou kan the.
Meic Nac Mpouh Guang Nimei
24 "Tiki ryanra ryanriumei tangv tei, neihmik zingc puni, bw ni kariw gaanh mak puni, 25 tingpuk thangc rui gaanchuangcna guay taek key puni, kumna tingpuk khou nai bammei pumtan guay ta hei kanuk puni. 26 Mi khou kiu, Meic Nac Mpouh pumtan khatni hymdaicna keymei ta kaniw how puni. 27 Mi khou kiu kamei rui baanchara guay ta kandih tin tou padeih khou ndiu patna tingpuk kandih tin tou thangc rui kamei rui kapahloumei guay ta khuam guang puni.
Tadut Bang khou rui Kabah Thay o
28 "Tadut bangc khou rui mi hei thay o: Twmei thu tadut chy guay tei kazik kasatna kanwang pat e thei lailwm na the twmei nangniw thay the. 29 Mi tei kumcna, mi guay hei pat pw e thei, kamei chaengmun daeng khou bam the a twmei thay tho. 30 Ai rui nangniw khou kaling salou tuang e: Mi guay hei pat mak saanv thu, mi zuk hei luai ni tu hamh e. 31 Tingpuk kandih thu maan kan ni de, tiki alat thu maan dat lak khe.
Tingmik khatni Kaganv Thay Mak e
32 "Mi tingmik khatni kaganv tei thu meic gaanv khat na sini thay mak e; Pu na hamhna tingkauh thangc bammei kauh baanchara guay ni, Ka Nac Mpouh ni thay mak e. 33 Suriak thay o, ntak nrak bam o. Mi ganv tei tabui nungc guang puni cho twmei nangniw thay mak e. 34 Mi hei gaanv khat pu rui kakai kabangc nunc khou nsinlouna, kaniw kathuic khang taanv nsinlouna, kaimun nkhwanmei ta chamdaanvna nkhwan bam khang kadylouna nggin tat kanmei kumh tuang e. 35 Mi zaeng rui, nangniw chamdaanv bam o; kalam thu kai kaipouc guang nimei tei zingbangc ny, zipchwng ny, nruay khuangh khou ny, hamh e thei khwanzingh ny nangniw thay mak e. 36 Mi kumh mak e thei, nangniw zip bam khou thay mak liangna guang nangc timc e. 37 Ai rui nangniw khou samei hei meic guayna khou sa tuang e: Nangniw nkhwanna bam o."