24
Ravkai Swmaan Nimei Lam Dincloumei
1 Jisu Ravkai mpatlouna tat pat pwkhou kaziap nunc kadaeng khou guangna Ravkai tuang kai guay tei kata tiphaengc khwan e. 2 Khoutei Jisu rui kaniw khou sa the, "Mi kai guay hei nangniw how bo? Ai rui nangniw khou kaling salou tuang e: mi khou hei ntauh akhat ruc khou ntauh akhat nsaplou bam dat ni tu hamh the; pangv key makmei nai dat ni tu hamh the."
Ryanramei khatni Rairiumei
3 Jisu Oliv Chyng khou dungc bam khou, kaziap nunc kadaeng khou kaniw rana guangna sa the, "Mi guay kiu tabui ganv khou pat puni cho? khatni nang guang puni the khatni zuk luai puni the twmei thay nuhmei tuang tabui pat puni cho? Aniw khou dinclou o."
4 Khoutei mundawna Jisu rui kaniw khou sa the, "Nangniw ta meic gaanv khat na rui sini zay mbiangh mak khang suriak thay o. 5 Kalam thu, 'Ai Khrista the' twna meic mpeyna azanc khou guang puni, kumna meic mpeyna ta zay mbiangh puni. 6 Nangniw rih khwan khatni rih chamv chu puni; tiki nangniw ping rio. Mi kumhmei guay hei pat puni, tiki mi tei luai nimei hamh e. 7 Kalam thu zaatc khat rui zaatc khat ta khatni guanghdic khat rui guanghdic khat ta rih sw puni, nap nkowmei guang puni khatni kabamv kathuic khou baengla zay puni. 8 Tiki mi guay hei narui kahouhmei di he.
9 "Mi ganv khou kiu nangniw ta nymna rai khang tii pat puni, kumna swluai puni. Azaeng khou rui nangniw ta zaatc guayna rui karaeng puni. 10 Mi khou kiu meic mpeyna athei lay taan puni, kaniw khat khat ta tinym kary puni, kumna khat khat ta karaeng puni. 11 Mi khou kiu guatmei muczwng mpeyna pat puni, kumna meic mpeyna ta zay mbiangh puni. 12 Mi kumna simei taanv mbu thau tina meic mpeyna nzianmei nchu key puni. 13 Tiki katwan nganv akhaengvpui mei ta tei gulou puni. 14 Zaatc guayna thay lik khang mi guanghdic tuang gaychamv hei kandih kapwm khou dinc lik puni. Mi tangv thu zuk luaimei kiu guang puni the.
Ravchabamv Sw-mphuammei tuang Meic Ping Karaengmei
15 "Muhzwng Daniel rui saloumei 'sw kamut kamaimei tuang mphuammei puat tei nthanmei bamv khou ding bammei ta nangniw how puni. (Pahpui mei tei rui kabah thay kan diu.) 15 16 Mi khou kiu Judia khou bammei rui chyng thangc pak tat tho. 17 Kainam khou bammei rui kainung khou naimei puat laa khang key dat ri tho. 24.17-18: Luk 17.31 18 Laupuk khou bammei rui phey laa khang hanc guang dat ri tho. 19 Mi ganv khou kiu nahguammei pui nunc khatni nac puanc nouc bammei pui nunc tei sansi e dav! 20 Tingsei khou hamh e thei Sabbath neic pak mak khang huayney o. 21 Mi khou kiu mbaanv nai thau rap khou rui pat zat kan makmei, pat ni pat dat lakmei ryanramei ariw puni. 22 Mi ganv dak tei ti-duilou mak khwan e thei, meic gaanv khat na sini ringc pat ni tu hamh e; tiki kapahloumei nunc khang mi ganv dak tei ti-duilou puni.
23 "Mi ganv khou kiu 'Zauclo, mi khou hei Khrista bam the,' hamh e thei 'mi thangc tei bam the,' twna thowkumhmei rui sa pw sini lwm rio. 24 Kalam thu guatmei Khrista nunc khatni guatmei muczwng nunc pat puni. Nuh e thei kapahloumei nunc ta nganv zay mbiangh khang sw nchinmei khatni charynmei taanv daih mpeyna taanc puni. 25 Chu la tho, mi hei ai rui nangniw khou sa kasuakcloumei tuang e.
26 " 'Kamei tazikramv khou bam the' twna meicnunc rui sa pw sini nangniw tat rio; 'Kamei kainung khou bam e' twna sa pw sini lwm rio. 27 Kalam thu, Meic Nac Mpouh guang nimei hei neihpat thangc tingpalik tina neihkey thangc gaanc tanghmei tei kumc puni de. 28 Charumc naimei bamv khou mouphou guang kaduai puni.
Meic Nac Mpouh Guangmei
29 "Mi ryanramei tingmik guay tei luaipuilev neihmik tizingc puni, bw gaanc dat lak khe, gaanchuangcna guay tingkauh thangc rui taek key puni, khatni tingpuk tuang pumtan guay ta kanuk puni. 30 Mi tangv Meic Nac Mpouh guang nimei tuang kiu tingpuk khou lyan pat puni. Mi khou kiu kandihmei zaatc guayna ngaengv kazwmna kap puni khatni Meic Nac Mpouh tei pumtan phungcna hymdaicna muangh khou tuangcna keymei ta kaniw how puni. 31 Kauh baanchara akhat rui tiangka daihmei muanna kamei rui katuang baanchara nunc ta kandih kwn padeih khou ndiulou puni. Kumna kamei rui kapahloumei nunc ta kaniw rui kandih kapwm khou rui khuam kariu puni.
Tadut Bang khou rui Thay khang
32 "Tadut bangc khou rui nangniw latgiam akhat thay o. Mi tei kazik kasatna kanuy thanh pat dat e thei lailwm na the twmei nangniw thay e. 33 Mi tei kumcna mi guay hei nangniw how pwkhou kamei kaimun daeng khou na bam thea twmei nangniw thay o. 34 Ai rui nangniw khou kaling salou tuang e: Mi guay hei pat mak saanv mi meickin hei maan ni tu hamh e. 35 Tingpuk kandih thu maan puni, tiki atuang lat thu maan dat ni tu hamh the.
Gaanv Khat Na Sini Kating Kaneic Thay Mak e
36 "Tiki mi tingmik khatni khuangh ganv tei thu gaanv khat na sini thay mak e, Pu na tei hamhna tingkauh baanchara guay ni, Ka Nac Mpouhb hei ni thay mak e. 37 Meic Nac Mpouh guang nimei hei Noa hak khou pat kanmei tei kumc puni e. 38 Mi ganv khou tei dui daih makmei hu khou, Noa hy lungc khou gut kan mak saanv, meicnunc tei twna zangvna, nowkawna, micna lungc bam khwan e. 39 Dui daic guangna kaniw ta nzuan ganh mak saanv, tabui pat puni cho twmei kaniw thay mak khwan e. Meic Nac Mpouh guang khou ni mi tei kumc puni. 40 Mi khou kiu laupuk khou gaanv nei bammei khou gaanv khat ta laa tat puni, gaanv khat ta ganclou duc puni; 41 gaanv nei napriakpaan riak bam khou gaanv khat ta laa tat kan puni, gaanv khat ta ganclou duc puni. 42 Mi zaeng rui nangniw nkhwan bam o, kalam thu nangniw tuang Kaipouc tabui nungc guang puni cho nangniw thay mak e. 43 Zingbangc akumhmei ganv khou kaihouhmei guang puni cho twmei kai kaipouc tei rui thay khwan e thei, kamei zip makna nkhwanna kakai tibiu lak ni tuang e twmei nangniw thay e. 44 Mi zaeng rui nangniw ni chamdaanv bam o. Kalam thu Meic Nac Mpouh tei nangniw ning makmei ganv khou guang puni.
Lwm Nuhmei khatni Lwm Nuh Makmei
45 "Kakai tuang bangc guay khang kaganv chana titu tizangv bam khang thouh nsinloumei bangc khou thow tei lwmnuhmei khatni ningtyngmei cho? 46 Kakaipouc tei guang datpui ganv khou kathouc taanc bammei bangc tei sangaymei e. 47 Ai rui nangniw khou kaling salou tuang e: Kaipouc tei rui katuang naimei kapwm kakhou nsinlou puni. 48 Tiki meicsimei bangc tei rui 'akaipouc guang riu ni tu hamh e' twna ningna, 49 kamei bangh mkaemv guay ta baina, zouh mbamei nunc lev zangvna bam khou, 50 kamei ning makmei nungc, kamei thay makmei ganv khou mi bangc kaipouc tei guang nangc e thei, 51 kata dan puatlou punic khatni kakheswmei nunc lev nchamcna dandi mphang puni. Mi khou tei kapna kahuc nkay ndyang kariakh riak bam puni."