12
Gaylwn Swmei nunc khou rui Suriakthay o
1 Meic aching aching guang kaduaina khat khat ta sini ni luai ni tiat khang thay makna bam khou, reymei khou Jisu rui kaziap nunc khou sa the, "Pharisi nunc tuang khay, mi kiu kakheswmei khou tei rui suriak thay o. 2 Ndauh pat makna gum binlou bam nimei tuang khatni meic thay makna nkamhlou bam nimei tuang ramh khat sini maek e. 3 Nangniw rui zingc khou salou kanmei tei kalaanv gaanh khou chu puni, kaikhamv mbanghlouna nukuanc khou suaina saloumei tei kainam khou rui kauc pat dat puni.
Nang Thow ta Ping Nina Cho?
4 "Apam thiu, ai rui nangniw khou sa tuang e: Meic pumc ta swluai lana mi tangv ramh sw dat kadai ngam lakmei nunc ta tei ping rio. 5 Tiki thow ta ping nina cho twmei ai rui dinclou puni. Mi kiu nangniw pumc ta swluai lana maikwam khou phaiclou ngamv naimeipu ta ping o. 6 Nangniw tingkavna panguh tei paic kanei na khang zuanh mak nah cho? Tiki Ravguangc thu tingkavna akhat na ta sini amuclou mak e. 7 Nangniw sam lu nganv kasing phuclou bam tuang e. Ping rio. Nangniw thu tingkavna mpeyna suangc kunghmei de.
Jisu Mei e hamh e thei Jisu Mei Hamh e Twna Samei
8 "Thow pwni kamei athei laymei e twna meicnunc hu khou sa ndauhpui mei ta tei, Meic Nac Mpouh ai rui ni kata amei e twna Ravguangc baanchara guay hu khou sa ndauh puni. 9 Thow pwni, kamei athei laymei hamh e twna meicnunc hu khou sa ndauhpui mei ta tei, Ravguangc baanchara guay hu khou amei hamh e twna sa puni. 10 Meic Nac Mpouh ruc khou sina sapui mei ta tei thu kuaklou puni de, tiki Bumaengh Nthanmei ta ramh sak makna sapui mei ta tei thu kuaklou dat mak khe.
11 "Nangniw ta sinagog khou, dihsinpouc nunc khatni ngamv sinmei nunc hu khou zay guang pwkhou, akumhna daw nina cho khatni tabui lat sa nina cho twmei lungc katuakc rio. 12 Kalam thu tabui lat sa nina cho twmei mi dyng khou tei Bumaengh Nthanmei rui dinclou puni de."
Lungcgaymei Mpangmeipu Latgiam
13 Meic kangdai khou tei rui gaanv khat rui, "Dinhpouc, akai tuang lanv achana aney khang nzanh khang achana khou salou o," twna Jisu khou sa the.
14 Khoutei, "Meicpu le, thow rui ata latzanpouc khang hamh e thei nang ney khang tampy lanv nzanhlou khang kapahlou thena cho?," twna Jisu rui sa the. 15 Khoutei Jisu rui kaniw khou sa the, "Nangniw agaemv mak khang ramhthay o. Kalam thu maansei panty hei lungcgaymei khou rui ringh tu hamh e."
16 Kumna Jisu rui kaniw khou mi latgiam hei sa the: "Lungcgaymeipu gaanv khat lau nap gay khwan the. 17 Khoutei, 'Ai tabui sw kho cho? Nap hei lou chan ni tu hamh the,' twna kamei kakhanh the.
18 "Khoutei kamei rui sa the, 'Asaemc guay hei ra key dat lana, daih daihmei kasiamh dat ni the, kumna mi khou tei nap bi guay khatni khiu khingh guay lou ni the. 19 Kumna, "Nang khang, tingkwm mpeyna ringc biuh khang chamdaanvlou kan the. Lungh geic dat ri tho; tu tho, zangv tho, kumna neihla tho," twna ai rui akhou sa ni the.'
20 "Tiki Ravguangc rui kakhou sa the, 'Mpangmei! Aseic zingbangc hei nang panty laa puni the. Nang rui nang khang chamdaanvloumei guay tei thow khang cho?'
21 "Kakhang thu khuam padiklou laa ki, Ravguangc khang thu lungcsi bammei nunc tei mi hei kumc puni."
Lungh Katuakc Rio
22 Khoutei Jisu rui kaziap nunc khou sa the, "Nangniw ringh khang tabui tu nina cho, hamh e thei nangniw pumc khang tabui nsuay mbaanv nina cho twna lungc katuakc nangh e. 23 Nangniw pumc ringhmei hei taektw suangc nthuk e, khatni nangniw pumc hei pheybaan suangc nthuk e. 24 Agaekc guay ta tei kakhanh zauc o: Kaniw lau taanh mak e, kaniw saemh ni maek e, tiki Ravguangc rui kaniw ta makuatlou bam de. Nangniw thu nruayna guay khang suangc adih kungc kanmei nunc cho? 25 Nangniw thow tei lungc katuakcmei paan rui kapanty chowbuk akhat na sini tisaengc mbu a ngammei naina cho? 26 Mi kumhmei na hei sini nangniw sw ngam mak e thei, tabui swna baihmei guay khang tei thu lungc katuakc bam tu cho?
27 "Lili pwang guay ta hei kakhanh zauc o. Kaniw taanv taanh mak e, langh ni ruaih mak e. Tiki Solomon sini hymdaihmei karin khou nganv mi tei kumcna karuh tangc kan mak e. 28 Aseic na ringclou lana, nthuanh mai khou phaiclou kan nimei bang ta sini, Ravguangc rui mi kumcna karuhlou e thei, he lwmmei nthyammei thiu, nangniw ta thu tabui swna karuhlou mak nina cho? 29 Kumna nangniw tabui tu nina cho khatni tabui nina cho twna phu bam nangh e; mi khang lungc ryanra nangh e. 30 Zaatc guay rui mi khang hei phu e, tiki mi guay hei nangniw khang kage nai e twmei nangniw Pu rui thay bam tuang de. 31 Tiki Ravguangc guangcdic tei phu o, kumc e thei mi guay hei ni nangniw khang tiilou puni.
Tingkauh Thangc Lanv Rymei
32 "Ping riu, nangniw lauziu pang nthyammei thiu, kalam thu nangniw khang guanghdic tiiloumei hei nangniw Pu rui kahawmei e. 33 Nangniw tuang naimei guay tei zuancna lungcsimei nunc khang tii tio. Kumna sw nchamv dat makmei, kaihouhmei nai dat makmei khatni nthumc rui swkasic dat makmei tingkauh thangc, nangniw tuang syankhau rylou o. 34 Kalam thu nangniw tuang lanv naipui bamv khou tei nangniw lungc ni nai puni.
Chamdaanvna Nkhwan Bam o
35 "Nangniw sianlangv langvna, maibungc nchowlouna bam o. 36 Nowsuanh ngai khou tat kanmei kaniw kaipouc tei guang datna kaikhamv nchow pwkhou laanc rap khang nkhwan bammei nunc tei kumncna nkhwan bam o. 37 Kaniw nkhwan bam khou kakaipouc guang ariwmei bangc nunc tei sangaymei nunc e. Ai rui nangniw khou kaling salou tuang e: Kamei rui kaniw ta tu zangv khang tidungc keylouna, kamei rui siangiat giatna kaniw siamruai sw puni. 38 Kaipouc zipchwng pwni, khwanpaengc pwni guang pwkhou nkhwan bammei bangc nunc tei sangaymei e. 39 Kaihouhmei tei tabui ganv khou guang puni cho twmei kai kaipouc tei thay khwan e thei, kakai tei tihouc ni tu hamh e twmei nangniw thay e. 40 Mi tei kumcna, nangniw ni chamdaanv bam o, kalam thu nangniw ning makmei ganv khou Meic Nac Mpouh guang puni."
Lwmnuhmei khatni Lwmnuh Makmei Bangc
41 Khoutei Pitar rui, "Poubauhmei, mi latgiam hei aniw khang sa tu ni, meic guayna khang sa tu cho?" twna thanv the.
42 Khoutei Poubauhmei rui daw the, "Kaipouc gaanv khat rui katuang tamthiwmeipu khou kabangc guay khang kaganv chana tu zangv khang kaniw dam nzanhlou bam khang nsinlou pwkhou, thow tei lwmnuhmei khatni ningtyngmei bangc sw puni cho? 43 Kakaipouc tei guang dat pwkhou kamei rui kadyloumei kumcna taanc bammei bangc tei sangaymei bangc e. 44 Ai rui nangniw khou kaling salou tuang e: Kaipouc tei rui kabaanc khou katuang naimei guay nsinlou puni. 45 Tiki, 'Akaipouc guang dat riu ni tu hamh e,' twna mi bangcpu tei ningna kabangc guay ta tei—banghpui ta ni, banghpu ta ni baina, tw mba zangv mbana bam khou; 46 kamei ning makmei ganv khou mi bangc kaipouc tei guang nangc e thei, kata tei dan puatlou puni, b kumna lwm makmei nunc bamv khou lou puni.
47 "Kaipouc rui ningmei tei thay, tiki chamdaanv mak, hamh e thei kamei ningmei tei taanh mak twmei bangc ta tei thu bai ranvna bai puni. 48 Tiki thay makna bai biuc rappui taanv taancloupui mei ta tei thu bai rau maih puni. Kumna Tiilou geic kanmei nunc khou tei laa dat geic puni khatni nsinlou geic kanmei khou tei ney dat geic puni.
Maneic khang Hamh e, Sw Ntamv khang de
49 "Ai hei kandih khou mai phaiclou khang guang tuang e. Mi hei ntoulou bam khwan e thei gay ni tuang the twna ning e. 50 Ata lup nimei tuang akhat nai e, mi tei luai kan mak saanv alung ryanra e. 51 Ai guangmei hei kandih khou chuzaenghmei phungc guang khang e twna nangniw ningna cho? Tiki ai rui nangniw khou sa tuang e, kiu hamh e, kalangv tipat khang de. 52 Ntaw khou rui thauna gaanv panguh naimei kaikhunc khou tei meic guayna ntamv puni. Gaanv thumh lev gaanv nei ntamv puni khatni gaanv nei lev gaanv thumh ntamv puni. 53 Kapu lev kanac mpouh, kapui lev kanac aluh, kapui lev kamauc khatni kamauc lev kaneic ntamv puni."
Kaganv tei Chak Thay o
54 Jisu rui meic kangdai khou tei sa the, "Neihkey biak thangc muangh kumei ta how e thei, 'tingdai riu puni the,' twna nangniw sa e. Kumna riu changh e. 55 Dihba pwan nliu ngangh ti thei, 'neih tanc puni the,' twna nangniw sa e. Kumna tanc changh e. 56 Kakheswmei thiu! Nangniw tingpuk kandih zaw zauc pat thay e thei, akumhna ntaw pat bammei ta hei thu zauc pat thay makna cho?
Guatc Sw Dat Zaic o
57 "Tabui swna nangniw tabui tei nchumhmei cho twmei latzan sw mak tu cho? 58 Thowkumhmei rui nang ruc khou lat phungclou e thei, latzanpouc bamv tangh mak khou nang ney guatc sw dat o. Hamh e thei, kamei rui nang ta latzanpouc khou zaylou kan e thei, latzanpouc rui kangkai sinmeipu khou tiilou puni, kumna kamei rui nang ta kangkai khou bangclou puni. 59 Mi khou kiu thu paic akhat na sini tii ntangh tii mak saanv tipat dat ngam pw lak khe."