10
Nowmumei Lam Jisu rui Dincloumei
1 Jisu mi bamv tei mpatlouna, Judia ramv thangc tat the. Kumna Jordan duiriang kaan pat the. Mi khou tei ni meic kangdai kadaeng khou huamc guang dat khwan the. Mi khou tei ni kamei rui kaniw khou nchamlou dat khwan e.
2 Khoutei Pharisi nunc Jisu daeng khou guangna kata nchanvna, "Meic gaanv khat rui now mumei hei Riakdanv thei layna nuh daih cho?" twna thanv the.
3 Khoutei mundawna Jisu rui kaniw khou, "Mousi rui nangniw khou tabui kumhna sa bu cho?" twna sa the.
4 Khoutei kaniw rui sa the, "Mousi rui thu nggaanvmei rui kanow ta mulou the twmei latrik hyna nsinlouna mu ganc khang nuhlou e."
5 Khoutei Jisu rui kaniw khou sa the, "Nangniw lung tanc tipui zaeng rui, kamei rui mi riak hei nangniw khang hylou tuang e. 6 Tiki puakthau puaksiak khou Ravguangc rui kaney ta ntumei khatni nggaanvmei swna damclou the. 7 Mi zaeng rui nggaanvmei rui kapui kapu ta ganclouna kanow lev kariu nina e, a 8 kumna gaanv nei tei akhat sw puni. Kumna kaney tei kaney hamh the, akhat di the. 9 Mi zaeng rui Ravguangc rui tikariulou kanmei ta tei maansei rui sw ntamv dat lak nina e."
10 Kaniw kai khou bam dat khou, Jisu khou kaziap nunc rui mi lam khou hei thanv khwan e. 11 Khoutei Jisu rui kaniw khou sa the, "Thow pwni kanow ta mu ganc lana baihmei ta kaw datpui mei tei kanow ma nymna lungcmaanvmei e; 12 khatni ntumei akhat rui kagaanv ta mu gancna baihmei now sw dat e thei kamei lungcmaanvmei e."
Alauc nunc ta Jisu rui Suaihiamloumei
13 Kumna Jisu rui kahilou khang meicnunc rui alauc nunc ta kadaeng khou nduangh guang geic khwan e. Khoutei kaziap nunc rui kaniw ta luh khwan e. 14 Jisu mi tei how lana kalung puamc the, kumna kaniw khou sa the, "Alauc nunc ta tei adaeng khou tiguang o, kaniw ta khaem rio. Ravguangc guangcdic kiu mi kumhmei nunc khang e. 15 Ai rui nangniw khou kaling salou tuang e: Thow pwni Ravguangc guangcdic tei alaucna kumcna laalou mak e thei, mi khou tei kamei gut zat ni tu hamh e." 16 Khoutei kamei rui alauc nunc ta puanc thauna kaniw kathuic khou kabaanc bouclouna suaihiamlou the.
Lungcgaymei Chabwan Gaanv Khat
17 Mi tangv Jisu chaeng kaemv akhat khang tat pat khou, meic gaanv khat pak guangna kahu khou khuksun keyna, "Meic gaymei dinhpouc, ringcsuangmei laa khang ai tabui sw nina cho?" twna thanv khwan e.
18 Khoutei Jisu rui kakhou sa the, "Tabui swna ata meic gaymei kaw tu cho? Meic gaymei khat sini maek e; Ravguangc na de gaymei. 19 Latdanv guay: 'Meic dow lak nina e, Nowsow lak nina e, Kaihouc lak nina e, Saraemhmei sakhi tii lak nina e, Meic guat lak nina e, Nang pui nang pu ta chakhwang sw nina e,' twmei guay hei nang thay the cho!"
20 Khoutei, "Dinhpouc, mi guay hei ai alauc khou rui ngaek bam di the," twna sa the.
21 Khoutei Jisu rui kata zauc pwkhou nzian the, kumna kakhou sa the, "Nang khou ntangh mak tuang akhat nai e: Nang tuang naimei guayna zuancna lungcsimei nunc khang tii tio, tingkauh thangc nang tuang lanv nai puni, kumna guangna athei lay o." 22 Mi lat tei chu pwkhou kazaw kamv meih mei key the, kumna kalung ryanrana tat pat kan the. Kalam thu katuang lanv mpeyna nai khwan e.
23 Khoutei zauc kari kariangna, "Lungcgaymei nunc Ravguangc guangcdic gut khang adih kungc puni cho!" twna Jisu rui kaziap nunc khou sa the.
24 Mi lat tei chu pwkhou, kaziap nunc tei ruph rup the. Khoutei Jisu rui kaniw khou sa dat e, "Alaucthiu, Ravguangc guangcdic gut khang chiwmei tuang hamh e! 25 Lungcgaymeipu rui Ravguangc guangcdic khou gutmei suangc thu guaikuan rui mpinh mai khou gutmei rui chiw e."
26 Khoutei kaniw tei ngakna, "Kum e thei thow rui guloumei laa ngam nina cho?" twna kakhou sa the.
27 Khoutei kaniw ta zaucna Jisu rui sa the, "Mi hei maansei khang ngam lakmei tuang bam sini Ravguangc khang thu ngam mak tuang maek e. Ravguangc thu ngam tu rana de."
28 Khoutei, "Zauc lo, ramh guayna ganclouna aniw nang thei lay the," twna Pitar rui Jisu khou sa the.
29 Mundawna Jisu rui sa the, "Ai rui nangniw khou kaling salou tuang e: Thow pwni akhang rui khatni gaychamv khang kakai kalau, kachana, ka tanpui, kapui kapu, khatni kanac ta gancloupui mei tei, 30 mi zuk khou ni rairiumei lev kazauhna kai lau, kachana khatni ka tanpui, kapui kapu, khatni kanac kadam phay khatni guang nimei panty khou ringcsuangmei laa puni. 31 Tiki ntaw reymei sw bammei nunc hei nkhamhmei sw puni, khatni ntaw nkhamhmei sw bammei nunc hei reymei sw puni."
Jisu rui Kamei Theic nimei Lam Dinc Kasuakcloumei Kathumhmei
32 Mi tangv, kaniw Jerusalem thangc tat nganghmei chaenglwan khou Jisu rui kaniw suangc tat huna tat kan khwan e. Khoutei kaniw tabui cho twna ning the khatni kathei lay tatmei nunc tei ping the. Khoutei ruhna kanei ta tei nduangh ranc patna kakhou pat punimei tei kaniw khou raclouna sa the, 33 "Zauc lo, aniu Jerusalem thangc ngangh puni the. Kumna Meic Nac Mpouh ta amuh daihmei nunc khatni Riakdanv tadin nunc khou tii pat puni, kumna kaniw rui kakhou theic biuhpui khuay nkhamlouna Jentailmei nunc khou tii pat puni. 34 Kaniw rui kata sinnui puni, kakhou nteih nsuklou puni, kata bai puni, kumna swluai puni; tiki zaeng neih thumh tangv kamei ringcthau dat puni."
Jakob lev John khang Kapui rui Bamv Neymei
35 Khoutei Zebedi nac mpouh nei - John lev Jakob Jisu daeng khou guangna sa the, "Dinhpouc, aney rui nang khou ney niimei hei taanclou pu tu kahaw e."
36 Khoutei Jisu rui kaney khou, "Ai rui nang ney khang tabui swlou pwmei ta kahaw na cho?" twna thanv the.
37 Khoutei kaney rui sa the, "Nang hymdaic pwkhou, aney gaanv khat rui nang tuang baanzat khou khatni gaanv khat rui nang tuang baandaw khou dungc nuh khang aney khou tiilou o."
38 Jisu rui kaney khou sa the, "Nang ney tabui ney bam tu cho twmei nang ney thay mak e. Ai zangv nimei buangc hei nang ney zangv diw nah cho khatni ata lup nimei khou hei nang ney lup diw nah cho?"
39 "Aney diw e," twna kaney rui daw the.
Khoutei Jisu rui kaney khou sa the, "Ai zangv nimei buangc tei nang ney ni zangv puni khatni ata lup nimei khou tei nang ney ta ni lup puni. 40 Tiki atuang baanzat baandaw khou dungh khang thu ai rui tii nina hamh e. Mi bamv hei thu chamdaanvlou tangpui mei khang tei di the."
41 Kaziap ruh tei mi tei chu pwkhou Jakob lev John ta kaniw lungc puamc the. 42 Khoutei kaniw ta kaw guangna Jisu rui kaniw khou sa the, "Jentailmei nunc tuang dihsinpouc nunc tei meicnunc ruc khou kaipouc sw e khatni kaniw tuang meicdaihmei nunc tei meicnunc ruc khou ngamv sin e twmei nangniw thay e. 43 Tiki nangniw lungc khou thu mi tei kumc nina hamh e. Nangniw pang khou thowkumhmei meic daihmei sw nii e thei kamei meic guayna siamruaimei sw nina e, 44 khatni thowkumhmei kapy sw nii e thei, meic guayna bangc sw nina e. 45 Kalam thu Meic Nac Mpouh nganv meicnunc rui kasiamruai swlou khang guang tu hamh e, tiki siamruai sw khang khatni meic mpeyna ta thuaklou khang kapanty tii pat khang guang tuang de."
Mik Tiatmei Bartimai ta Tigayloumei
46 Khoutei kaniw Jeriko khou guang the. Kumna kamei Jeriko khou rui kaziap nunc khatni meic kangdai lev tat pat khou, mik tiatna ney tu bammei Timai nac mpouh Bartimaeas chaeng daeng khou dungc bam khwan e. 47 Mi tei Nazareth mei Jisu e twmei kamei chu lana, "David Nac Mpouh Jisu, ata nzianlou o!" twna kauc thau the.
48 Khoutei, "Rey rei o," twna meic mpeyna rui kata luh the. Tiki, "David Nac Mpouh, ata nzianlou o!" twna kauc ranv hay hay thau the.
49 Khoutei Jisu ding the, kumna, "Kata kaw guang o," twna sa the.
Khoutei, "Thau tho! Neihla o! Kamei nang ta kaw bam the!" twna sana kaniw rui mik tiatmeipu ta tei kaw the.
50 Khoutei kaphey ganc keylouna ding palup thauna Jisu daeng khou guang the.
51 Khoutei Jisu rui kakhou, "Ai rui nang khang tabui swloumei ta kahaw na cho?" twna sa the.
"Rabbi, amik how dat nii e," twna mik tiatmeipu tei rui Jisu khou sa the.
52 Khoutei Jisu rui kakhou sa the, "Tat tho, nang ramlum rui nang ta tigaylou the."
Khoutei kadyng khou kamik how dat the, kumna Jisu thei lay tat the.