11
Jisu Guangh Swna Jerusalem khou Gutmei
1 Kaniw Jerusalem na guangna, Oliv Chyng phay khou naimei Bethphage lev Bethani khou guang khou Jisu rui kaziap gaanv nei ta ndiulouna, 2 kaney khou sa the, "Nang ney hu khou naimei namv khou hei tat o, kumna mi khou tei gut pwkhou meic gaanv khat na sini tuangclou makmei kuanniam launa bangclou bammei ta nang ney ariw puni. Mi tei ricna laa guang o. 3 'Tabui khang nang ney mi hei ric bam tu cho?' twna thowkumhmei rui thanv pw e thei, 'Kaipoucr khang mi hei kage naina e, kumna mi hei ndiu guanglou dat nuangc puni de,' twna sa tio."
4 Khoutei kaney tat the, kumna kuanniam launa akhat chaengmun daeng khou bangclouna chaeng khou bammei ta ariw the. Kumna mi tei kaney ric the. 5 Mi khou tei ding bammei gaanv saekc rui, "Mi kuanniam launa hei ricna nang ney tabui sw bam tu cho?" twna sa the. 6 Khoutei Jisu rui kadyloumei tei kumcna kaniw khou daw the. Kumna kaney ta mpatlou the.
7 Kaney rui kuanniam tei Jisu daeng khou nduangh guang the. Mi ruc khou tei kaniw rui kaniw tuang phey bamclou the, kumna Jisu mi khou tei dungc the. 8 Khoutei chaeng khou meic mpeyna rui kaniw tuang phey bamclou the khatni baihmei guay rui nuykuang downa bamclou the. 9 Khoutei kathei kahu khou tat bammei meic kangdai tei rui, "Hosanna! Poubauhmei zanc khou guangmeipu hei kahym daic diu! 10 Guang nimei aniu pu David tuang guangcdic hei kahym daic diu! Kauh Liangmei khou, Hosanna!" twna kauc the.
11 Jisu Jerusalem khou gutna Ravkai khou gut the. Kamei ramh guayna ta zauc kari karianglouna tingzyn nyan key tii thena kaziap ruhna kanei ta nduanghna Bethani thangc tat kan the.
Tadut Bang ta Siangloumei
12 Nthuanh thauna kaniw Bethani khou rui tat pat dat khou Jisu ndaepc the. 13 Khoutei kanuy phwam gaymei tadut bang akhat duh thangc how lana mi khou tei kathai nai pungh e twna kamei guang the. Tiki guang tangc pwkhou kathai maek khe, kanuy na bam khwan the. Kalam thu mi tei tadut thay nthaipui ganv hamh khwan e. 14 Khoutei, "Nang thay meic gaanv khat na rui sini tu dat zat mak kan di tho," twna Jisu rui mi khou tei salou kan the. Mi tei kaziap nunc chu the.
Ravkai Sw-nthanmei
15 Kumna kaniw Jerusalem khou guangna Ravkai lunghgutna, Ravkai khou puatc zuanc bammei nunc khatni liu bammei nunc ta nthau ganc thau the. Syan akhiakmei nunc tuang paeng guay khatni aphyna zuanhmei nunc tuang paeng guay thui kadat kadaengvlou the. 16 Kumna meic gaanv khat na ta sini puatc phungcna ravkai kaimav tei titat ruan mak khwan e. 17 Khoutei kamei rui kaniw khou nchamlouna sa the, " 'Akai ta hei zaatc guayna kalumpui kai twna kaw puni' twna hylou mak nah cho? Tiki nangniw rui mi ta hei kwamtumei nunc kai tiswlou the."
18 Amuh daihmei nunc khatni Riakdanv tadin nunc mi tei chu lana akumhna kata swluai kho cho twmei phu the. Kalam thu meic kangdai tei rui kamei rui nchamloumei khou tei lungc gut bam tina kaniw kata ping khwan e.
19 Kumna tingzyn key pwkhou, kaniw kaidai khou tei rui tat pat dat the.
Tadut Bang khou rui Nchamloumei
20 Kumna kaniw laukhwan khwanzingh tat ruan pat dat pwkhou, tadut bang tei kamaan theic tangc bammei ta kaniw how the. 21 Khoutei Pitar rui ningtow lana Jisu khou, "Rabbi, zauc lo, nang rui sianglou kanmei tadut bang tei theic bam the," twna sa the.
22 Khoutei mundawna Jisu rui kaniw khou sa the, "Ravguangc khou lwm o. 23 Ai rui nangniw khou kaling salou tuang e: Thow pwni mi chyng but ta hei, 'Nang thauna duipui khou gut o,' twna sana kalung khou lwmsi makna kamei samei tei kumcna pat puni de twmei lwm e thei, kamei rui samei tei kakhang taanclou puni.
24 "Mi zaeng rui ai rui nangniw khou sa tuang e: tabui pwni nangniw rui huayney khou neymei guay tei nangniw laatow the twna lwm o. Kum e thei mi tei nangniw khang tiilou puni. 25 Nangniw huayney khang ding bam khou thowkumhmei ruc khou nangniw lunghnuancloumei tuang nai e thei, mi tei kuaklou o, kumc e thei tingkauh thangc bammei nangniw Pu rui ni nangniw tuang khuay guay kuaklou puni. 26 (Nangniw kuaklou mak e thei, tingkauh thangc bammei nangniw Pu rui ni nangniw tuang twanlyammei guay kuaklou lak e.)a
Jisu tuang Ngamv Lam Thanvmei
27 Khoutei kaniw Jerusalem khou guang dat the. Kumna Jisu Ravkai khou tat bam khou amuh daihmei nunc, Riakdanv tadin nunc khatni gaanvdaih nunc kadaeng khou guangna, 28 "Tabui ngamv khou rui nang mi guay hei taanc bam tu cho, hamh e thei mi guay hei taanh khang nang khou thow rui ngamv tiilou pwna cho?" twna kakhou sa the.
29 Jisu rui kaniw khou sa the, "Ai nangniw khou lat akhat thanv puni, mi tei akhou dawlou e thei mi guay hei ai tabui ngamv khou rui taanc bam tu cho twmei nangniw khou salou puni. 30 Mi kiu thu: John rui duilupmei tei thow rui ngamv tiilou tina cho? Ravguangc rui ni, maansei rui cho? Nangniw akhou dawlou o."
31 Khoutei kaniw rana kaphianhna, " 'Ravguangc rui e' twna sa ti thei, 'Kum e thei tabui swna nangniw kakhou lwm mak tu cho?' twna kamei rui sa puni. 32 'Maansei khou rui de,' twna aniu sa ti thei ..." (Kaniw meicnunc ta ping khwan e; kalam thu John hei muhzwng changh e twna meic guayna rui laa e.) 33 Kumna, "Aniw thay mak e," twna kaniw rui Jisu khou sa the.
Khoutei Jisu rui kaniw khou sa the, "Mi guay hei tabui ngamv khou rui ai taanc bam tu cho twmei ai ni nangniw khou salou ni tu hamh e."