20
Jisu tuang Ngamv Lam Thanvmei
1 Zaeng neih khat Jisu Ravkai khou meicnunc khou nchamlouna khatni gaychamv dincna bam khou, amuh daihmei nunc, Riakdanv tadin nunc, gaanvdaih nunc kazauhna guangna, 2 Jisu khou sa the, "Tabui tuang ngamv khou rui nang mi guay hei sw bam tu cho khatni thow rui nang khang mi ngamv hei tii pwna cho? Aniw khou sa o."
3 Mundawna Jisu rui kaniw khou sa the, "Ai ni nangniw khou lat akhat thanv puni. Mi hei akhou salou o: 4 John rui duilupmei tei thow rui ngamv tiilou tina cho?"
5 Kaniw mi kumna kaphianh the, " 'Ravguangc rui de,' tw ti thei, 'Tabui swna nangniw kakhou lwm mak tu cho?' twna kamei rui sa puni. 6 'Maansei rui de,' twna sa ti thei ni meic guay rui aniu ta ntauh kwam puni. Kalam thu John hei muhzwng khat e twmei kaniw lwm the."
7 Kumna, "Aniw thay mak e," twna kaniw rui daw the.
8 Khoutei, "Tabui ngamv khou rui mi guay hei ai taanc bam tu cho twmei ai ni nangniw khou salou lak e," twna Jisu rui kaniw khou sa the.
Luairyn Lau Nngemei Latgiam
9 Jisu rui meicnunc khou mi latgiam hei salou khwan e: Meic gaanv khat pu rui luairyn lau akhat kasiamhlou lana lautaanhmei nunc khang nngelou duc the, kumna tingsaengc sihna kandih akhat thangc tat kan the. 10 Kathai laapui ganv tangc pwkhou, kathai laa khang kabangc gaanv khat ta lau nngemei nunc khou tei ndiu guang the. Tiki kaniw rui mi pu ta tei baina kabaanc raeng ndiu hanc dat kan the. 11 Kamei rui kabangc gaanv khat ta ni ndiu guang dat he. Kaniw rui mi pu ta tei ni baina sw zak lou the, kumna kabaanc raeng ndiu ganc dat kan the. 12 Luan thumhmei swna ndiulou dat he. Kata tei kaniw rui kazam kazei bai patlouna lau paengc thangc ganc patlou the.
13 "Khoutei luairyn laupouc tei rui sa the, 'Ai tabui sw kho cho? Ai rui nzianmei anac mpouh ta hei ndiulou ni the; kata thu chakhwang swlou pungh di the.'
14 "Tiki lau taanhmei nunc tei mi pu ta tei how lana, kaniw kaphianhna sa the: 'Mi pu hei kapu tampy luak nimeipu the. Kata sw luaina katuang hei aniu khang laa di kho! 15 Kumna kaniw rui kata luairyn lau paengc thangc ganc patna swluai the.
"Khoutei laupouc tei rui kaniw ta tabui sw puni thah? 16 Laupouc tei guangna lau nngemei nunc ta tei swluai puni, kumna luairyn lau tei meic baihmei khang tii puni."
Meic nunc tei mi tei chu pwkhou, "Mi kumhmei hei pat mak kan diu!" twna sa the.
17 Khoutei Jisu rui kaniw ta zaucna sa the, " 'Kai swmei nunc rui gancpatloumei tauc tei kaikwnpy tauc sw the,' twna hylou bammei hei tabui kabac cho? 18 Mi tauc ruc khou taek keyloumei guay tei puat puni, tiki mi tauc hei rui key simmei guay tei piak puni."
19 Riakdanv tadin nunc khatni amuh daihmei nunc tei mi dyng khou tei kata nym khang karamc the. Kalam thu mi latgiam tei kaniw ta sa bam tu di the twmei kaniw thay the. Tiki kaniw meicnunc ta ping khwan e.
Kaisar khang Dihkhav Tiimei Lam
20 Kumna kaniw khang kadouchamei zaucna, kalat khou rui kata nymna, dihsinpouc khatni guanghkhyn ngamv khou tii ku khang, kaniw rui kakheswmei gaanv saekc ta nkamhna ndiulou the. 21 Mi nunc tei rui Jisu khou mi kumcna thanv the, "Dinhpouc, nang thu nchumhmei sa e khatni dinc e, khatni zawkhu zawru zauh makna Ravguangc ningmei nchumhmei dinc e twmei aniw thay e. 22 Aniw Kaisar khang dihkhav tiimei hei kariak thei layna nuh ny nuh mak cho salou o."
23 Kaniw rouc tei thay lana, Jisu rui kaniw khou, "Denari a tei akhou lyan o. 24 Mi khou tei thow maengc nai bu cho khatni tabui hylou bu cho?" twna sa the.
Khoutei, "Kaisar tuang," twna kaniw rui sa the.
25 Khoutei, "Mi zaeng rui, Kaisar tuang tei Kaisar khang tii tio; Ravguangc tuang tei Ravguangc khang tii tio."
26 Jisu rui mi kumcna charuangc khou samei khou tei kaniw kata nym ngam mak khe. Katuang latdau khou tei kaniw khang swang maekna lat sa dat mak khe.
Ringcthau Datmei Lam Thanvmei
27 Ringcthau datmei maek e twna samei Sadduki pang khou rui gaanv saekc, Jisu daeng khou guangna thanv the, 28 "Dinhpouc, 'Thowkumhmei rui now kaw lana, kanac puanh makna theic kan e thei, kachana rui kanow ta tei kakhauh datna, kachana kikta ti-nailou nina e,' twna Mousi rui aniw khang hylou e. 29 Kaganv khat khou chana gaanv chanei nai khwan e. Gaanvdaihmeipu tei kanow kawlouna kanac maekna theic kan the. 30 Kumna kaneimeipu khatni 31 kathumhmeipu tei rui kata kakhauh the. Mi tei kumcna chaneimeipu tei ni kata kakhauh lana kanac maekna theic muai kan the. 32 Nkhamh khou mi pui tei ni theic kan the. 33 Ntaw thu, ringcthau dat pwkhou kamei thow now sw puni cho; kaniw gaanv chanei rui kata kaw the?"
34 Jisu rui kaniw khou sa the, "Mi mbaanv khou mei nunc rui now kaw e, mic e. 35 Tiki mi zuk khou kiu gut biuhmei nunc thu kaniw ringcthau datpui nungc kiu kaniw nowkawmei khatni mihmei nai dat lak khe. 36 Kaniw theic dat mak khe. Kalam thu kaniw tingkauh baanchara nunc kumc kan ni the. Kaniw Ravguangc nac nunc di the. Kaniw ringcthau datmei nunc di the. 37 Theihmei ringcthau datmei lam khou Mousi rui ni lyanlou e. Thing phwam tuang pary khou tei kamei rui Poubauhmei ta, 'Abraham Racguangc, Isaak Racguangc khatni Jakob Racguangc' twna sa e. 38 Kamei thu theihmei nunc Racguangc hamh e, ringhmei nunc tuang de. Kalam thu meic kaguayna kakhou ringc bam e."
39 Riakdanv tadin gaanv saekc rui, "Dinhpouc, nang samei tei nchumh the!" twna sa the. 40 Khoutei meic gaanv khat na sini lat thanv dat bauh mak khe.
Khrista hei Thow Nac Cho?
41 Khoutei Jisu rui kaniw khou sa the, "Khrista hei David nac mpouh e twna kaniw akumhna sa tu cho? 42 David rui kalumlu khou salou e:
'Poubauhmei rui apoubauhmei khou sa e:
43 Nang ta zauczihmei guay ta
nang phaypav bangc khou tini bin mak saanv,
nang abaanzat thangc dungc bam o.'
44 "David rui kata 'Poubauhmei' twna kaw e. Kum e thei, akumhna kamei David nac nina cho?"
Riakdanv Tadin nunc khou rui Suriakthay o
45 Meic guayna nking bam khou, Jisu rui kaziap nunc khou sa the, 46 "Pheychuanh saenghmei piuna ruan tat bam niimei, kaithyan bamv bamv khou kalumlou pw tu kahawmei, sinagog khou bamvdaih dungc niimei, khatni khumngai bamv khou chakhwang bamv dungc niimei, 47 maypui nunc tuang asut twmei, kum lana karavsuai saengcna kalum lyan bammei Riakdanv tadin nunc khou tei rui suriak thay lo. Kaniw khou keylou nimei latzan tei nrit diangc puni."