21
Jisu Jerusalem khou Guangh Swna Gutmei
1 Jisu lev kaziap nunc Jerusalem na guangna, Oliv Chyng khou naimei Bethphage khou guang pwkhou, Jisu rui kaziap gaanv nei ta ndiulouna 2 sa the, "Nang ney hu khou naimei namv khou hei gut tho. Mi khou hei nang ney gut rappuilev kuanniam kui akhat bangclou bammei ta ariw puni. Kanac ni kadaeng khou bam puni. Mi tei ricna adaeng khou laa guang o. 3 Thow rui pwni nang ney ta sa pw e thei, 'Kaipouca khang mi nei hei kage naina de,' twna sa tio. Kum ti thei kaneih makna kamei mpatlou puni de."
4-5 "Zion nac aluhpui khou sa tio,
Zauc lo, nang guangc kuanniam tuangcna,
kuanniam nay launa khou tuangcna,
nzaenghna nang khou guang e,"
twna muhzwng rui saloumei tei guang tangc khang mi hei pat tuang e.
6 Ziap nei tei tatna Jisu rui saloumei kumcna taanc the: 7 Kaney rui kuanniam kui akhat lev kanac akhat laa guangna mi kaney nam khou tei kaniw phey bamclouna Jisu dungc the. 8 Meic kangdai rui kaniw phey chaeng khou bamclou the. Baihmei gaanv saekc rui thingnuy laana chaeng khou bamclou the. 9 Khoutei kathei kahu lwan tatmei meic kangdai tei rui, "David Nac Mpouh khang Hosanna! Poubauhmei zanc khou guangmeipu hei sangaymei sw diu! " twna kauc the.
10 Jisu Jerusalem khou gut pwkhou, kaidai kapwm tei kachin karo the, kumna, "Mi pu hei thow lana cho?" twna meicnunc rui thanv the.
11 "Mi pu hei Galili tuang Nazareth mei muhzwng Jisu e," twna meic kangdai tei rui sa the.
Jisu Ravkai khou Gutmei
12 Jisu Ravkai khou gutna Ravkai khou puatc zuanc bammei khatni liu bammei guay ta nthau pat the, syan akhiak bammei nunc tuang paeng guay khatni aphyna zuanc bammei nunc tuang bamv guay thui nkhanlou the. 13 Kumna kaniw khou sa the, " 'Akai ta huayneypui kai kaw pu ni,' twna hylou e, tiki nangniw rui mi ta hei kwamtumei nunc duppui bamv tiswlou the."
14 Mik tiatmei nunc khatni phay baumei nunc Ravkai khou tei kadaeng khou guang the. Khoutei kamei rui kaniw ta tigaylou the. 15 Kamei rui taancloumei charynmei taanv guay khatni "David Nac Mpouh khang Hosanna," twna alauc nunc rui Ravkai khou kauc bammei tei amuh daihmei nunc khatni Riakdanv tadin nunc tei how lana kaniw lungh puamc the. 16 Khoutei kaniw rui kakhou, "Mi alauc nunc hei rui sa bammei hei nang chu daih?" twna sa the. Mi khou tei Jisu rui kaniw khou, "Ai chu e, 'Ngasatna nunc khatni puanc nouc bammei nunc mwang khou rui nang rui nthuihna tithuanc pat the,' twna hyloumei tei nangniw pah mak he nah cho?" twna Jisu rui daw the.
17 Kumna kaniw ta ganclouna, Jisu kaidai paengc thangc patna Bethani khou pat ziplou the.
Jisu rui Tadut Bang ta Siangloumei
18 Jisu kaidai thangc tei ngangh thuan dat khou kamei ndaepc the. 19 Chaeng daeng khou tadut bang akhat how lana mi tei guang zauc pwkhou kanuy nsyn bam khwan the. Khoutei, "Nang thai nthai dat zat mak kan di tho," twna Jisu rui salou the. Mi dyng khou tei mi tadut bang tei ngguaih key kan the.
20 Mi tei how lana ziap nunc tei ngakna, "Mi tadut bang hei akumhna kadyng khou ngguaih bam tu cho," twna sa the.
21 "Ai rui nangniw khou kaling salou tuang e: nangniw lwm e thei khatni lwmsi zat mak e thei, ai rui tadut bangc khou swlou kanmei hei nangniw ni taanc ngam puni de. Mi na hei hamh e, nangniw rui mi chyngbut ta hei, 'nang thauna duipui thangc gut kan o,' twna sa ti thei gut kan ni de. 22 Nangniw lwm ti thei nangniw huayney khou tabui pwni neymei tei nangniw laatow puni."
Jisu Ngamv Lam Thanvmei
23 Jisu Ravkai khou guang datna nchamlouna bam khou, amuh daihmei nunc khatni kaniw tuang gaanvdaih nunc kadaeng khou guangna, "Tabui ngamv khou rui nang mi guay hei taanc bam tu cho khatni thow rui nang khou mi ngamv hei tiilou pwna cho?" twna thanv the.
24 Mundawna Jisu rui kaniw khou sa the, "Ai ni nangniw khou lat akhat thanv puni. Mi tei nangniw daw e thei, tabui ngamv khou rui mi guay hei ai taanc bam tu cho twmei ai ni nangniw khou sa puni: 25 John khou duilupmei ngamv tei thow rui tiilou tu cho? Ravguangc rui ny maansei rui cho?"
Kaniw rana kaphianhna sa the, "Ravguangc rui e twna sa ti thei, 'kum e thei nangniw tabui swna kata lwm mak tu cho?' twna kamei rui sa puni. 26 'Maansei rui de,' twna sa khang ni meicnunc ta ping e; kalam thu meic guay rui thu John ta muhzwng e twna laa bam di the." 27 Kumna, "Aniw thay mak e," twna kaniw daw the.
"Mi guay hei tabui ngamv khou rui ai taanc bam tu cho twmei ai ni nangniw khou salou lak e," twna Jisu rui kaniw khou mundaw the.
Alauc Gaanv Nei Latgiam
28 "Nangniw akumhna ning bo? Gaanv khat pu nac alauc gaanv nei nai khwan e. Gaanvdaihmeipu daeng khou guangna, 'Abung, nang aseic luairyn lau tat o,' twna sa the. 29 'Apu, ai tat zih e,' twna kamei daw the, tiki kamei katangv thangc lunghlaic datna tat dat kan the. 30 Alaucmeipu daeng khou tei ni guangna mi tei kumcna sa muai the. Khoutei, 'Ai tat puni' twna kamei daw the, tiki tat mak khe. 31 Mi nei khou tei thow rui kapu rui ningmei taanc kan tu cho?"
"Reymeipu tei e," twna kaniw rui daw the.
Jisu rui kaniw khou sa the, "Ai rui nangniw khou kaling salou tuang e: dihkhav kakhamei nunc khatni mangcsangmeiluc nunc rui Ravguangc Guangcdic khou nangniw khang suangc gut hu bam the. 32 Kalam thu Duiluploumei John nangniw khou guangna nchumhmei chaeng dinclou tisini nangniw kata lwm kan mak e; tiki dihkhav kakhamei nunc khatni mangcsangmeiluc nunc thu kata lwm kan the. Nangniw mi tei how khou nganv lunghlaicna kata lwm kan mak e.
Luairyn Lau Saanvmei Latgiam
33 "Latgiam baihmei akhat nking dat o. Laupouc gaanv khat rui luairyn lau akhat taanclou lana mi tei karaengv raenglou the, luairyn dui sunhmei bamv kasiamhlou the, lauphaan kai kasiamhlou the, kumna mi tei lau nngemei nunc khang saanvlou ducna tat kan the. 34 Luairyn thai reipui ganv guang pwkhou, kathai laa khang kabangc nunc ta lau nngemei nunc khou tei ndiu guang the. 35 Khoutei lau nngemei nunc tei rui kabangc nunc ta tei nymna gaanv khat ta bai the, gaanv khat ta swluai the, gaanv khat ta ntauh kwam the. 36 Kamei rui reymei kang khang tei suangc geihmei kabangc kang akhat ndiu guang dat di he. Khoutei lau nngemei nunc tei rui kaniw ta ni mi tei kumcna swlou dat muai the. 37 'Kaniw anac ta thu chakhwang swlou puni muai di the,' twna ningna nkhamh khou kanac mpouh ta ndiu guang the. 38 Tiki kaniw rui kanac mpouh ta tei how pwkhou kaniw rana sa the, 'mi hei tampy laa nimeipu the, guang tho, kata sw luaina aniu katuang dam tei laa di kho.' 39 Kumna kaniw rui kata nymna luairyn lau paengc thangc siauc gancna swluai the.
40 "Kumna luairyn lau kaipouc tei guang pwkhou tabui sw puni thah?"
41 Kaniw rui kakhou sa the, "Kamei rui meicsimei nunc ta swluai puni, kumna luairyn lau kathai reipui ganv kathuic kathai laa guang bam punimei baihmei nunc khou tiilou dat kan puni."
42 Jisu rui kaniw khou sa e, " 'Kai swmei nunc rui gancpatloumei tauc tei,
kaikwnpy tauc sw kan puni.
Mi hei Poubauhmei rui swloumei tuang e,
Mi hei aniw mikzaw khou charyn tuang e,'
twna hyloumei tei nangniw pah mak he nah cho?
43 "Mi zaeng rui ai rui nangniw khou samei tuang e: Ravguangc Guangcdic hei nangniw khou rui laa dat lana kathai nthai nimei zaat akhat khang tii kan puni.
44 "(Mi tauc ruc khou bow keypui mei tei puat puni, khatni mi tauc hei rui karuc khou key simpui mei tei mbut mbaih puni.)"b