12
Meri rui Jisu khou Thauh Teyloumei
1 Kaanpatpui Ngai khang zaeng charuk nai khou, Jisu Bethani khou guangna kamei rui tiringcthauloumei Lazaras kai khou bam khwan e. 2 Kaniw rui kakhang zingbangc nap tu khang chamdaanvlou the. Martha rui siamruai sw bam khwan e, tiki Lazaras tei thu tu zangv khang Jisu lev dungc bammei pang khou lay kazauh bam khwan e. 3 Meri rui kamanv kunghmei nthanmei mwnduithauc liter paekri doumei haan laana Jisu phay khou teylouna kasam rui thutlou the. Mi namh gaymei thauc rym tei rui mi kainung kapwm tei padik the. 4 Jisu ziap gaanv khat, kata zuanctu nimeipu Judas Iskariot rui sa the, 5 "Mi hei denarix phay thumh khang zuanc lana lungcsimei nunc khang tii damc bu cho!" 6 Kamei mi hei samei hei lungcsimei nunc khang kadanna sa tu hamh e, tiki kamei thu kaihouhmei e. Kamei meic geihmei tuang syan khau phungc lana, mi khou tei rui kakhang num laa raph rap bam lana e.
7 Khoutei Jisu rui sa the, "Kata sw kaguakclou tii rio! Katuang naimei tei ata mbeihmei nungc khang lou kan diu. 8 Lungcsimei nunc thu nangniw lev bam nchamc tanh tan bam puni de, tiki ai thu nangniw daeng khou bam tanh tan ni tu hamh e."
Lazaras ta Swluai khang Swmei
9 Jisu Bethani khou bam e twmei meic kangdai tei chu lana, kaniw mi thangc tei tat the. Jisu zaeng rui na hamhna, Jisu rui tiringcthauloumei Lazaras ta zauc khang ni e. 10 Kum tina amuh daihmei nunc kaphianhna Lazaras ta ni swluai khang sw the. 11 Kalam thu kazaeng rui Jihudimei mpeyna kaniw lat laa makna, Jisu khou lwm the.
Jisu Jerusalem khou Guangh Swna Gutmei
12 Nthuanh thauna, nngay khang guang bammei meic kangdai tei Jisu Jerusalem khou guang pu the twmei chu the. 13 Kaniw tadanv kuang puancna, "Hosanna! Poubauhmei zanc khou guangmeipu, Israelmei guangc ta hei suaihiamlou o," twna kaucna kata ariw khang pat the. 14 Jisu kuanniam launa akhat ariwna mi khou tei tuangc the. Mi hei,
15 "Ping rio, Zion kaidai!
Nang guangc guang the,
kuanniam launa khou tuangcna guang the."
twna Nthanmei Latrik khou hylou bammei tei the.
16 Kaziap nunc mi ganv khou tei thu mi kabac tei thay mak khwan e; tiki Jisu ta hymdaihmei khou tiringcthaulou dat pwkhou, Nthanmei Latrik rui sa bammei hei Jisu lam khou the twmei khatni kaniw mi hei Jisu khang swlou tuang the twmei ningtow the.
17 Jisu rui Lazaras ta tarou khou rui kaw patna, tiringcthaulou datmei ganv khou bammei nunc rui mi lam khou tei meicnunc khou raclou the. 18 Jisu rui mi sw nchinmei taanv hei kakhou taanclou e twna chu lapui zaeng rui, meic kangdai tei Lazaras ta ariw khang guang tuang e. 19 Khoutei Pharisi nunc rui khat khat khou sa the, "Zauc tho nangniw rui sw bammei hei nsa di the! Kandih kapwm kathei lay kan the!"
Grikmei Gaanv Saekc rui Jisu ta Phumei
20 Mi ngai khou hei kalum khang guangmei pang khou Grikmei gaanv saekc kazauh khwan e. 21 Galili ramv tuang Bethsaida kaidaimei Philip daeng khou kaniw guangna, "Haicpouc, aniw Jisu ta ariw nii e," twna sa the.
22 Philip rui mi tei Andriu khou salou tina, kaney tatna Jisu khou salou the. 23 Jisu rui kaniw khou mundawna sa the, "Meic Nac Mpouh ta kahym tidaiclou nimei ganv guang the. 24 Ai rui nangniw khou kaling salou tuang e: Gehu thw akhat tei kandih khou keyna theiclou mak e thei, mi thu tei mbu pat mak e, tiki mi tei theiclou e thei kathai mpeyna nthai the. 25 Thow pwni karingcpaan ta nzavpui mei tei mi tei maan puni; thow pwni mi mbaanv khou karingcpaan ta nzav makpui mei tei ringcsuangmei ringcpaan laa puni. 26 Thow pwni asiamruai sw nii tw e thei kamei athei lay nina e, kumna ai bampui bamv khou tei asiamruai swpui mei tei ni bam puni. Asiamruai swpui mei ta tei aPu rui chakhwang swlou puni.
Jisu rui Kamei Theic Nimei Lam Saloumei
27 "Ntaw alung katuakc the—ai tabui lat sa kho cho? 'Apu mi ganv hei akhou tiguanglou rio!' twna sa kho cho? Hamh e; mi khang ai guang tu the. 28 Apu nang hym tidaiclou o!"
Khoutei, "Ai rui mi tei tidaiclou kan the, tidaiclou dat puni he," twna tingkauh thangc rui kauc key the.
29 Mi khou tei ding bammei meic kangdai tei mi tei chu the, kumna gaanv saekc rui, "Ganh key tina e," twna sa the, baihmei gaanv saekc rui, "Kauh baanchara rui kata kachuc tina de," twna sa the.
30 Khoutei Jisu rui kaniw khou sa the, "Mi khwan hei akhang hamh e, nangniw khang de. 31 Ntaw hei mi mbaanv ta latzan sw puni the; ntaw mi mbaanv tuang dihsinpouc ta alay pat puni the. 32 Ata kandih khou rui zay thau pwkhou, meic guayna ta ai rui akhou zay guang puni." 33 (Mi hei kamei akumhmei ramthei theic puni cho twmei sa tuang e.)
34 Meic kangdai tei rui sa the, "Aniw tuang Riakdanv khou rui chumei thu, Khrista thu tingsaengzaeng ringc bam puni twna sa e. Mi kumc e thei, akumhna, 'Meic Nac Mpouh ta zay thau puni,' twna nang sa tu cho? Mi Meic Nac Mpouh kiu thow tei cho?"
35 Jisu rui mundawna sa the, "Nangniw pang khou gaanhmei hei bamv kanak puni he. Gaanc bammei dak khou tat laa tho, hamh e thei zingc namv lamc e. Kalam thu zingc khou tatpui mei tei thu kamei tabui thangc tat bam tu cho twmei thay mak e. 36 Nangniw gaanhmei nac nunc sw khang, gaanhmei hei nai bam khou, nangniw mi khou hei lwm la tho."
Meic nunc rui Lwm Makmei
Jisu mi hei salou tangv lana tat pat kan the, kumna kaniw khou rui nkamh kan the. 37 Kamei rui mi sw nchinmei taanv guay hei kaniw hu khou taanclou tisini, kaniw kakhou lwm mak e. 38 Mi hei, "Poubauhmei, thow rui aniw tuang lat ta lwm thena cho? Thow khou Poubauhmei rui kapumtan lyanlou kan thena cho?" twna muhzwng Isaia rui hyloumei tei guang tangc khang e.
39 Mi kumna kaniw lwm ngam mak khe, kalam thu Isaia rui mi kumcna salou e:
40 "Kaniw mik how mak khang,
khatni kaniw lungning ning pat thay mak khang,
kumna ai rui kaniw ta tigaylou khang akhou guang mak khang,
Ravguangc rui kaniw mik sw tiatlou kan the,
khatni kaniw lungning ti-ndylou kan the."
41 Isaia rui mi hei kamei Jisu tuang hymdaihmei how lana, kalam khou sa tuang e.
42 Kum bam sini, Jihudimei kapy nunc ni meic mpeyna Jisu khou lwmlou de; tiki kaniw ta sinagog khou rui alay ganc pw khang Pharisi nunc ta ping lapui zaeng rui, kaniw lwm the twmei thu sa pat mak khe. 43 Kaniw Ravguangc rui thuancloumei ta suangc, maansei rui thuancloumei ta kahaw the.
Jisu Lat rui Latzan Swmei
44 Jisu rui kaucna sa the, "Akhou lwmmei mei tei akhou na lwm tu hamh e, ata ndiu guangmeipu khou ni lwm tuang e. 45 Ata howpui mei tei ata ndiu guangmeipu ta how the. 46 Akhou lwmmei guay zinghmei khou bam dat mak khe. Ai mbaanv khou gaanhmei swna guang e. 47 Alat hei chu laki piu makpui mei ta tei, ai latzan sw lak e. Ai mbaanv ta latzan sw khang guang tu hamh e; mbaanv ta gulou khang de. 48 Ata laalou makpui mei khatni alat ta laalou makpui mei ta tei, nkhamhpui nungc ai rui sa pat kanmei lat guay tei rui latzan sw puni. 49 Kalam thu, ai arana achwnphuakh khou rui sa tu hamh e; ata ndiu guangmei aPu latdanv thei layna sa tuang de. 50 Katuang latdanv rui ringcsuangmei phungc guang e twmei ai thay e. Mi zaeng rui, ai rui samei hei Pu rui sa o twna samei lat e."