Latdiutatmei
NUNC TAANV
KALAM DINHMEI
Latdiutatmei nunc Taanv hei Luk rui hymei Gaychamv tat nsuk keymei e. Mi hei Jisu ziap sw reymei nunc rui Bumaengh Nthanmei rui zaylouna, Gaychamv tei Jerusalem khou, Judia khatni Samaria kapwm khou, khatni kandih kapwm khou akumhna dinc liklou kan tu cho twmei lyan khang hypui tuang e. Mi hei Khristian Phwamling hei Jihudimei nunc khou rui thauna kandih kapwm khou lingc thau kanmei pary e. Luk rui mi buk hei pahmei nunc khou, Khristian guay ta hei Rommei kaipouc nunc rui kadungna swmaan ngam mak e khatni Khristian rui lwmmei hei Jihudimei ravchap tei ti-nthuihloumei e twmei thay nthan kan khang hypui tuang e.
Latdiutatmei nunc Taanv hei kalangv kathumh khang damc pat nuh e: (1) Jisu tingkauh ku kanmei tangv Jerusalem khou bammei Khristian nunc taanv; (2) Palestin kabamv baih baih khou Khristian nai thaumei; (3) Neihkey biak thangc phwamling zin lik patna Rom nganv zin tanghmei.
Latdiutatmei nunc Taanv tuang nthukmei lam akhat thu, Pentikost nungc Jerusalem khou bammei lwmmei guay khou Bumaengh Nthanmei keylouna Phwamling khatni kapy guay khou pumtan tiilouna, khatni chaeng zaylouna bammei Bumaengh tuang taanv hei e. Mi khou hei Khristian sw reymei nunc rui racloumei pary guay tei samna hyloumei, khatni mi khou hyloumei taanv guay tei rui mi nchamloumei tei rui lwmmei nunc panty kasiamhloumei khatni phwamling tuang kariumei tei lyanlou e.
Kalam Khaklangcloumei
Sakhi sw khang chamdaanvmei 1.1-26
a. Jisu tuang nkhamhmei latdanv khatni latryan 1.1-14
b. Juda phaan lynmei 1.15-26
Jerusalem khou sakhi swmei 2.1—8.3
Judia lev Samaria khou sakhi swmei 8.4—12.25
Paul tuang taanv 13.1—28.31
a. Reymei chaengkaemv 13.1—14.28
b. Jerusalem khou latdai kaphianhmei 15.1-35
c. Kaneimei chaengkaemv 15.36—18.22
d. Kathumhmei chaengkaemv 18.23—21.16
e. Paul Jerusalem, Kaisarea khatni Rom khou kang bammei 21.17—28.31