Latdiutatmei
NUNC TAANV
1
Latdiutatmei nunc Taanv
1-2 He Theophilas, Jisu kamei kataanv taanc thau rap khou rui thauna kata laa thau dat makmei dak khou, kamei rui taanclou kanmei khatni dinclou kanmei guay tei, atuang reymei latrik khou tei hylou kan the. Kata laa thau makmei hu khou katuang Latdiutatmei nunc khang kapahloumei nunc khou kamei rui, Bumaengh Nthanmei paan rui latdanv tiilou khwan e. 3 Kamei theihmei tangv zaeng riakdei lungc khou kata kaniw khou lyanlouna, kamei ringc bam de twmei nthanna tithaylou khwan e, kumna kaniw khou Ravguangc Guangcdic lam salou khwan e. 4 Kaniw guang kaduai bam khou,a Jisu rui kaniw khou mi kumcna kadylou khwan e: "Nangniw Jerusalem khou rui tat pat rio; ai rui nangniw khou salou kanmei, aPu kamei rui tii puni twna nrianhloumei kaipat ta tei nkhwan bam o. 5 John rui, dui rui duiluplou the; tiki asaanh makmei lungc khou, nangniw ta Bumaengh Nthanmei rui luplou puni."
Jisu Tingkauh Ku Dat Kanmei
6 Kumna kaniw guang kariupui ganv khou, kaniw rui, "Poubauhmei, mi ganv khou kiu Israel guangcdic tii guanglou dat puni the cho?" twna Latdiutatmei nunc rui Jisu khou thanv khwan e.
7 Khoutei Jisu rui kaniw khou sa the, "Mi kumhmei Pu karana ngamv rui dinglou kanmei kakwm kaganv tei nangniw thay khang hamh e. 8 Tiki nangniw khou Bumaengh Nthanmei guanglou pwkhou, nangniw pumtan laatow puni; mi ganv khou kiu, Jerusalem khou, Judia lev Samaria kapwm khou, khatni kandih tin tou nganv, nangniw alam khou dinh khang e." 9 Mi hei salou tangv pwkhou, kaniw hu khou rui kata laa thau kan the, kumna muangh rui kata laa thau kan the.
10 Kata laa ku kanmei ta tei, ngangcna phaengc bam khou, phey mphwanmei piumei gaanv nei kaniw daeng khou ding bam khwan e. 11 Kaney rui sa the, "Galilimei thiu, tabui swna nangniw mi khou hei dingna tingpuk thangc phaengc bam tu cho? Nangniw khou rui tingkauh thangc laa thau kanmeipu Jisu hei, kamei tingkauh tat kanmei ta nangniw howmei hei kumcna, kamei key dat puni."
Juda Phaan Kapahloumei
12 Mi tangv, Latdiutatmei nunc tei, Jerusalem khou rui Sabbath chaeng dak saan na khou naimei, Oliv Chyng khou rui mi kaidai khou tei guang dat the. 13 Kaniw kaidai khou tei gutna, kaniw bammei bamv kailuan kauh khou tei ku dat the. Kaniw kiu: Pitar, John, Jakob, Andriu, Philip, Thomas, Bartholomiu, Matthiu, Alphais nac mpouh Jakob, Simon Zealot, khatni Jakob nac mpouh Judas, mi nunc hei e. 14 Kaniw tei ntumei nunc, Jisu pui Meri khatni Jisu chana nunc lev lungh khat na swna huayney bam khwan e.
15 Mi ganv khou tei, lwmmei nunc meic phay khat nchuih dou guang kachunc bam khou, Pitar dingthauna sa the, 16 "Achana thiu, Jisu ta nymmei nunc ta chaeng zaymeipu Judas lam khou Bumaengh Nthanmei paan rui David rui dinc kasuakcloumei nthanmei latrik khou hyloumei tei guang tangc ni tina di the. 17 Kamei ni aniu pang khou kazauhna mi siamruai taanv khou hei kazauhlou khwan e."
18 (Katuang simei taanv khou rui laa guangmei syan tei rui liuloumei laupuk khou tei, kamei taek keyna theiclou the. Kamei kabung siauc phakna karei pat ngam khwan e. 19 Jerusalem khou bammei guay mi chamv tei chu the, kumna kaniw rui mi ramvphung ta tei Akeldama, twmei thu "Zei Ramvphung" twna kaw the.)
20 "Kalam thu,
'Kakai khou tei meic lungc taan kan di tho;
mi khou tei meic lungh mak kan di tho.'
'Meic baihmei rui kataanv bamv taanc lyn kan di tho,'
twna Kalumlu khou hylou e.
21-22 "Mi zaeng rui, John rui duilup khou tei rui thauna,b Jisu ta tingkauh thangc laa thau dat kanmei nganv, aniu lev Jisu thei tat nchamcloumei gaanv khat, kaipouc Jisu ringcthau datmei lam khou dinh khang, aniu pang khou kazauh nina the."
23 Kumna kaniw rui Barsabbas kawmei (Jastas twna ni kawmei) Joseph lev Matthias ta kadah patna, 24-25 "Meic guayna lungning thay ngammei Poubauhmei, kamei bam nimei bamv thangc tat kanmei Judas rui gancloumei latdiutatmei siamruai taanv hei lyn khang, mi nei kak khou hei thow ta nang rui kapahlou tu cho, aniw khou lyanlou o," twna kaniw huayney the.
26 Khoutei kaniw kaney khang san zauc the, kumna Matthias san khou pat the. Kumna kata latdiutatmei ruhna akhat pang khou tikazauhlou the.