2
Bumaengh Nthanmei Tii Keymei
1 Pentikost tingmik tangc pwkhou, kaniw kabamv akhat khou guang kaduai bam khwan e. 2 Khoutei thay mak liangna, tingpuk thangc rui pwanzingh ranvmei khwan kumcna khwan akhat keyna, mi tei rui kaniw dungc bammei bamv kapwm tei padik the. 3 Khoutei baley kumhmei maibwang kumhmei pang how the, kumna mi guay tei phak patna kaniw kathuic khou towlou the. 4 Kaniw guayna Bumaengh Nthanmei rui padik the, kumna Bumaengh tei rui tisalou tina, kaniw lat baih baihmei sa thau the.
5 Zaatc baih baih thangc rui guangmei ravning nthukmei Jihudimei meic mpeyna Jerusalem khou lungc bam khwan e. 6 Mi khwan tei chu lana, kaniw meic kangdai guang kaduai the. Kumna mi khou tei kaniw rui sa bammei lat guay tei kaniw khang kalat kalat khou chu pwkhou, kaniw ngak the. 7 Kaniw khang ngakna sa the, "Mi khou lat sa bammei nunc hei Galilimei nunc hamh nah cho? 8 Akumh tina kaniw rui sa bammei lat hei aniu kathuic karamc karamcmei lat khou chu bam tu cho? 9 Aniu hei Parthia, Media, Elam, Mesopotamia, Judia, Kappadokia, Pontas, Asia, 10 Phrugia, Pamphulia, Ijipt khatni Kureni daeng khou naimei Libia ramv guay khou rui guangmei nunc de. Aniu gaanv saekc rui Rom thangc rui guangmei Jihudimei khatni Jihudi guanhmei nunc de. 11 Gaanv saekc rui Kretmei khatni Arabiamei nunc de. Tiki Ravguangc rui taanvdaih taancloumei lam khou kaniw rui sa bammei ta hei, karamc karamcmei lat khou aniu chu the!" 12 Kaniw ngak the khatni kabah thay tangc ngam mak laa thena, "Mi hei tabui khang lana cho?" twna kaniw khat khat khou thanv the.
13 Tiki kaniw gaanv saekc rui mi nunc ta tei sinnuina, "Kaniw zouh zangv mba lana de," twna sa the.
Pitar rui Chamvdinhmei
14 Khoutei Pitar ziap ruhna akhat tei lev dingthauna, kauc ranvna meic kangdai khou tei sa the: "Jihudimeipu thiu khatni Jerusalem khou lungc bammei nangniw guay, alat nkinglou o. Mi lam khou hei ai rui salou puni. 15 Nangniw rui ningmei kumcna mi nunc hei zouh zangv mba lana hamh e; ntaw laukhwan ganvdak chakiu na di he. 16 Mi hei muhzwng Joel rui mi kumcna saloumei tei e:
17 'Ravguangc rui sa e:
Nkhamhpui ganv khou ai rui atuang Bumaengc
meic katana khou bun keylou puni.
Nangniw nac mpouh aluh guay ravmundinc puni;
alauc nunc rui ndawman how puni,
gaanvdaih nunc rui mang manv puni.
18 Ngguay, abangcpui,
abangcpu guay khou,
mi ganv khou kiu a Bumaengc bun keylou puni;
mi khou kiu kaniw ravmundinc puni.
19 Ai rui tingpuk khou charynmei taanv taanclou puni,
kandih khou sw nchinmei taanv lyanlou puni:
zei, mai khatni maikhou dai tihow puni.
20 Poubauhmei tuang daihmei khatni hymdaihmei tingmik guang makmei hu khou,
neihmik zingc puni,
bw zei kumcna haengc puni.
21 Mi ganv khou kiu,
Poubauhmei ta kawpui mei ta gulou puni.'
22 "Israelmeithiu, mi lat hei nkinglou o: Ravguangc rui kata charynmei taanv khatni sw nchinmei taanv mpeyna nangniw pang khou titaanclou khwanmei Nazareth mei Jisu hei Ravguangc rui ndiu guangmeipu e twmei lyanlou kanmei tei nangniw thay the. 23 Ravguangc kamei rui thayna raengcloumei katuang raeng thei layna, Jisu ta nangniw baanc khou tiilou khang Ravguangc rui swlou tina, nangniw rui kata kariak tat makmei nunc baanc khou tiilouna, theihchouc khou swluai kan the. 24 Tiki Ravguangc rui kata theihmei ramrianra khou rui tiduaklouna tiringcthaulou kan the. Kalam thu theihmei rui kata bangclou bam ngam mak e. 25 David rui kalam khou mi kumna salou e:
'Ai Poubauhmei ta ahu khou how tanh tan e;
kamei adaeng khou bam e,
kumna ai ryanramei ariw lak e.
26 Kumna alung neihlamei padik e,
akhou neihlamei lat padik e.
Kumna ai hei theic nimei maansei khwan sini,
lwmgayna zaeng nthaekc bam ni.
27 Kalam thu nang rui ata taruaih khou ganclou lak e;
khatni nang tuang Nthanmeipu ta tarou khou titaemclou lak e.
28 Ringhmei khou zayloumei chaeng,
nang rui akhou lyanlou the,
kumna nang bammei rui ai neihlamei padik puni.'
29 "Achana thiu, aniu pupouc David lam khou nthanna ai rui sa nimei thu: Kamei theic kan the, kumna katuang tarou aseic nganv aniu daeng khou nai bam e. 30 Kamei muhzwng akhat e, kumna Ravguangc rui kakhou nrianhloumei tei kamei thay e—Ravguangc kamei rui David kikta gaanv khat ta David tuang guanghbamvpaeng khou tidungclou puni twna ntipmei latryan swlou khwan e. 31 Thei thangc guang nimei ta kamei how e, kumna 'kata taruaih khou ganclou mak e; kapumc tarou khou taemclou mak e,' twna Khrista ringcthau nimei lam khou kamei rui salou e. 32 Mi Jisu ta hei Ravguangc rui tiringcthaulou kan the; mi kiu howmei kiu aniw hei the. 33 Kata kapu Ravguangc baanzat khou zay kauh thaulou the, kumna kamei rui nrianhloumei Bumaengh Nthanmei tei kapu khou rui laa the. Nangniw ntaw chu bammei khatni how bammei hei kamei rui aniu khou bun keyloumei katuang kaipat kiu the. 34 Tingkauh thangc kumei kiu David kamei hamh e; kamei rui mi kumcna salou e:
'Poubauhmei rui apoubauhmei khou sa e:
35 Nang ta zauczihmei nunc ta nang phaypav bangc khou ai rui tini binlou mak saanv,
nang abaanzat khou dungc bam o.'
36 "Mi zaeng rui, Ravguangc rui Poubauhmei khatni Khrista tiswloumeipu kiu nangniw rui chouhthaengc kanmei Jisu tei the twmei, Israelmei nangniw nthanna thay o."
37 Meic nunc tei mi tei chu pwkhou lungc kabiu the, kumna "Chana thiu, aniw tabui sw nina cho?" twna Pitar khatni baihmei Latdiutatmei guay khou tei sa the.
38 Pitar rui kaniw khou sa the, "Nangniw paap guay kuaklou khang, nangniw lunghlaicna Jisu Khrista zanc khou duilup o; kum pwkhou Ravguangc kaipat, Bumaengh Nthanmei tiilou puni. 39 Kalam thu Ravguangc kamei rui tii ni twna nrianhloumei hei nangniw khang, nangniw nac nunc khang khatni duh thangc bammei Poubauhmei Ravguangc rui kakhou guang khang kawloumei guay khang ni e."
40 Kumna lat baih baihmei mpeyna ni salouna, "Mi meicsimei nunc khou keylou nimei dandi khou rui pak duak laa tho," twna Pitar rui kaniw ta katiu the. 41 Kaniw meic mpeyna kalat tei lwm the, kumna duilup the. Mi nungc tei meic ching thumh dou kaniw phwam khou haplou the. 42 Kaniw tei Latdiutatmei nunc rui nchamloumei khou, phwam kariumei khou, tu zangv kariumei khatni huayneymei khou lunghgutna bam khwan e.
Lwmmei nunc Panty
43 Charynmei taanv khatni sw nchinmei taanv mpeyna Latdiutatmei nunc tei rui taanc lyanlou bam khwan e; kum tina meic guayna ping karim bam khwan e. 44 Lwmmei guay tei maniatna lungc bam khwan e khatni kaniw tuang nai naimei meic guayna tuang swna piu nzanh bam khwan e. 45 Kaniw tuang nai naimei zuancna syan tei kaniw pang khou kage nai naimei khang nzanh bam khwan e. 46 Tingmik pum Ravkai khou guang kariu bam khwan e, kaniw kai guay khou tu kariu tat bam khwan e, kaniw neihlana khatni tii niina tii patna tu zangv kariuna bam khwan e. 47 Ravguangc ta thuancna lungc bam khwan e, khatni meic guay rui kaniw ta kasyanna bam khwan e. Kumna Poubauhmei rui kaniw pang khou guloumei laamei nunc ta tingmik pum haplou bam khwan e.